6. Cungguek Moq Laebbaenz

Baekging angqyangzyangz,Gvangjcangz vunz goenjoj,Gwnzgai va nding’oq,Cungguek moq laebbaenz.Couh dwg vih ngoenzneix,Ngeih bet bi deng haemz,Mingz raen dwg raemxhoemz,Gaemzgaemz ndoet daengz laj.Vih laeb gunghozgoz,Daj coz buek daengz geq,Ngeih bet bi muengh deq,Duzreh bienq mbaj gyaeu.Vih caux Cungguek moq,Rox gwn hoj geijlai,Ngeih bet bi buek dai,Bi’ndwen sai byongh ciuh.Geiz fagfouj fagliemz,Yinx vunz cien vunz fanh,Ngeih bet bi rumzlangh,Fwj sanq iengj daengngoenz.Diegguek ndaej gaijfang,Lwgminz angqvauvau,Ngoenzneix ndaej mbwnfauz,Goenglauz Gungcanjdangj.Daengngoenz angj gyangmbwn,“Cungguek ndwn hwnjdaeuj”,Rumz unq ndit youh raeuj,Va hoengzaeuj rim biengz.

Caet、Ndaej Ngangx Gyaeuj Gwnzbiengz

1. Hai Din Byaij Roen MoqDaengngoenz ndonj okdaeuj,Ndaej raeuj rungh raeuj bya,Mwnqmwnq nywj did ngaz,Gizgiz va hai angj.Dangj daiq raeuz lwgminz,Hai din byaij roen moq,Yaek biek haemz biek hoj,Caux ngoenz moq ngoenz ndei.Daengx guek gauj dujgaij,Lumj feiz raih hazliu,Duzfangz naeuz duziu,Ra giz deuz giz ndoj.（30）