Bi 1983，

Gihyijveij iucingj;

Raeuz bae daengz Namzningz,

Hai dunghsinyenz vei.

Bauq Sawcuengh fuzganh,

Vih banh ndaej engq ndei;

Gak boux youq gak deih,

Comz ma neix doxyaeng.

Youq cwngfuj lijdangz,

Angq lingjdauj baugau;

Sawcuengh gig cung’yau,

Raeuz dingq ngeix rapnaek.

Bouxcuengh youq Cunghvaz,

Minzcuz baiz daihngeih;

Youq lajmbwn seiqgyaiq,

Baiz daih seiqcib bet.

Bouxcuengh raeuz sawcih,

Cihmeh seih Lahdingh;

Ngoenzneix ndaej doihengz,

Ndwn bingz gak guek saw.

Vih Bouxcuengh vwnzva,

Muengh daihgya cengheiq;

Senhconz baudauj ndei,

Couh hingz ndaej biengz haenh.

Vih Mbanjcuengh fouqmiz,

Aeu sawcih yinxloh;

Mbwk sai hung iq rox,

Gungzhoj bae mbouj dauq.

Banneix seizdaih moq,

Aeu gohyoz gisuz;

Hong neix sou bae guh，

Sawcuengh miz maqmuengh.

Goujcib roek boux doih,

Mbwk sai comz youq neix;

Dingq coenzcoenz miz ngeih,

Vuenheij bekfwngz angq.

Bause gij lingjdauj,

Youh daeuj guh cijsi;

Faenzcieng baenzlawz sij,

Gidij lwnh hawj raeuz.

Lwnh siusik yenzcwz,

Lwnh faenzcieng Sawcuengh;

Lwnh laeb’eiq sanjvwnz,

Lwnh sei fwen vangraeh.

Dingq le son veh neix,

Doiq faenzcieng daezsang;

Doiq dawz gingniemh gangj,

Youh yamq sang mbaeklae.

Daihgya caez daujlun,

Un ngoenzgonq baenaj;

Raeuz gak boux gangj vah,

Byaujdaz ndawsim ngeix.

“Gou bae daengz dieg ranz,

Ndaw mbanj miz saeh moq;

Bien sei fwen siujcoz,

Bause rox siusik.”

“Gou daengz dieg hagdangz,

Son ‘sueng’vah（sanghyij） gyauyoz’;

Saw Gun Cuengh caez rox,

Caez coh bauq geiq gauj.”

“Gou bae daengz danhvei,

Haenqheiq sij faenzcieng;

Iu doih veh sei fwen,

Caez yiengq bause soengq.”

Lingjdauj guh cungjgez,

De gujli gyoengqraeuz;

Veh saeh ndei hawj bauq,

Aeu naj hawj Mbanjcuengh.

Haemh bae gih lijdangz,

Angq yawj vwnzgunghdonz;

Yienjheiq hawj raeuz ngonz,

Caen ndaenggon raixcaix.

Youq lijdangz bakdou,

Caez ciuqsiengq louzniemh;

Baen bouxvunz mbaw siengq,

Guhyiengh ce lwglan.

Haethaenx yaek doxbiek,

Nanz biek youh nanz faen;

Cog byawz ndaej doxraen,

Caiq daeuj un cingzcik.

Bae gak yienh bonjmbanj,

Bae danhvei gunghcoz;

Caez roengzrengz sejcoz,

Bauqceij coh ok yinz.

Gyangngoenz muengz hwnjdangz,

Angq son nyez hag saw;

Haemh vunz gaenq ninz caem,

Ngeix faenz ndei youh veh.

Naengz doiq ngoenz lijbai,

Saenq byaij bae yienh geiq;

Haet bae riengz ndaundeiq,

Haemh dauq miz ronghndwen.

Ngoenzneix loh ci doeng,

Bae soeng liuz haujlai;

Haet riengz ci bae gvaiz,

Caih louz haw yawj doih.

Yienznaeuz nienz caetlingz,

Ging haemzhoj vandiemz;

Raen guekgya daihbienq,

Lienz ninz fangzhwnz veh.

Aenvih ndang ndi bingh,

Aen sim goj leix coz;

Duiyouh hong ndi doz.

Veh fwen go danq(angq) ciuz.

Gij doih raeuz caemh hoih,

Guhdoih daeuj sij fwen;

Gaijgwz hailangh diemz,

Caez veh fwen rim deih.

Aeu raemxhaij guh maeg,

Lag mbwn ma guh ceij;

Dangj raeuz gij cingzngeih,

Ndei byawz veh ndaej liux.

Seiqcib bi gvaqbae,

Laeq（ngonz） siengq dunghsinyenz;

Venj gyangdangq gwnz ciengz,

Guhyiengh gou gaenx veh.

Bi 2023，

Bause gvensim gou;

Caiq bingz ndaej funglouz,

“Youhsiu dunghsinyenz.”

Caez yiengq baihnaj siengq(ngonz),

Muengh dunghsinyenz raeuz;

Nyinhcaen bae sij gauj,

Banh ndei bauq minzcuz.