Haeuj daengz ngoenz ndei fwen goksad,

Gou dawz gyong laz okdaeuj roq;

Bouxboux simhai gyaez ciengq go,

Roq gyong ndaek laz daeuj boiqhab.

-

Faex miz rag le raemx miz goek,

Raeuz angqyoekyoek miz gaenyouz;

Bouxboux ciengq go ndaw sim raeuj,

Lungz fungh hix daeuj diuqyekyek.

-

Beijfwen riuzcienz geij cien nienz,

Cienz daengz ngoenzneix caen ndei lai;

Sanhcej dawz fwen saj seiqbaih,

Hawj raeuz daihdaih ndaej ciengq caez.

-

Ngoenzneix okdaeuj eu fwen moq,

Bouxboux ndaw hoz cungj angqyangz;

Diuz fwen ndaw sim soengq hawj dangj,

Va lengj va rang hai rim deih.

-

Couh youq ngoenzseng aendangj raeuz,

Gou angqyaeuyaeu dawz vah gangj;

Hungmbwk Cungguek Gungcanjdangj,

Swnhrumz buqlangh bongh mbouj dingz.

-

Caet nyied it hauh dwg ngoenzseng,

Daengx guek seiqlengq geiznding bongh;

Doxgiet riengz dangj byaij coh rongh,

Gwndaenj ngoenz ndongq bae coh ngoenz.

-

Miz Gungcanjdangj daeuj daiq roen,

Lumj raen daengngoenz rongh angjdangx;

Daiqlingx bouxminz ndaej gaijfang,

Byaraemx gvangqlangh nding fanh nienz.

-

Ngoenzneix yaek dauq un dangjsij,

Gangj gij vijsij hawj vunz rox;

Fanhleix cangzcwngh caen sinhoj,

Cungqvunz dingq goj raemxda roengz.

-

Bihaenx Nanzcangh sing cungq yiengj,

Dangj miz lijsiengj hwnj guh saeh;

Dwk Gozminzdangj gij bwzfeij,

Doeklaeng hwnj bae Cingjganghsanh.

-

Sien gangj mwhgonq aen ruz haenx,

Rumz haenq fubfab youq Nanzhuz;

Vih hawj bouxminz ndaej hingfuz,

Haemhlaep vad ruz bongh baenaj.

-

Ngoenzseng aendangj raeuz caez siengj，

Bihaenx dwkciengq lwed hanh lae;

Lwed nyumx Sienghgyangh nyumx Cizsuij,

Doeklaeng cij ndaej bae baihbaek.

-

Hungzginh ciengj gvaq Luzdinggyauz,

Geijlai ndeilau gangj mbouj caenh;

Vunzdig cungq haenq feiz coemh haenq,

Seiqlengq deih daenh lumj mbwn loemq.

-

Hungzginh benz gvaq lienhdiet bae,

Bouxboux doengzcaez mbouj lau dai;

Bing gyaeg gyaeuj giuz deng dwk baih,

Hungzginh vunzlai ndaej gvaq dah.

-

Youh gvaq byanae caeuq diegnywj,

Hungzginh gwq byaij gwq souh nanh;

Mbouj lau dai hix mbouj lau anj(baeg),

Hwnj daengz Yenzanh cij yietnaiq.

-

Dwk Yizbwnjgveij Gozminzdangj,

Doeklaeng youh vang gvaq Vangzhoz;

Gwn gvaq geijlai nanh caeuq hoj,

Cunghgoz gwzming cij ndaej hingz.

-

Gyo gyoengq bouxak Gungcanjdangj,

Aeu mingh daeuj bang lauxbeksingq;

Vih gij vunzlai bae buekmingh,

Hawj vunz beksingq ndaej hwnjsoengz(ndwn).

-

Cienz sim cienz eiq bae buekbinq,

Caen vih bouxminz laeb goenglauz;

Lwed lae gyaeuj doek hix mbouj lau,

Caeuq gij caeg laux buek daengz daej.

-

Minzcuz doxgiet rengz cij hoengh,

Mbouj lau caeggyoengq daeuj hengz yak;

Gungcanjdangj raeuz saedcaih ak,

Dawz gij fangz yak siumied caez.

-

Daengx guek gaijfang minz vuenheij,

Hajsingh Hoengzgeiz mbinyauyau;

Miz Gungcanjdangj daeuj lingjdauj,

Guekcoj hunglaux ndwn baihdoeng.

-

Guekcoj youz nyieg bienq baenz giengz,

Bouxminz caez riengz dangj byaij loh;

Bouxboux ndaw sim cungj caez rox,

Miz dangj guekcoj cij vuenyungz.

-

Dangj vih bouxminz hai loh fouq,

Ngoenzneix mbouj you gwn caeuq daenj;

Saekloeg swnghdai guh gwnhbaenj(gaenbonj),

Ciuh lan ciuh laenj fuk engq daih.

-

Miz Gungcanjdangj caen cix ndei,

Bouxminz doengzcaez gvaq siujgangh;

Ngoenzneix singz mbanj gizgiz angq,

Saeh ndei yaek gangj gangj mbouj liux.

-

Mbwn engq lamz le raemx engq saw,

Vunz youq gizlawz cungj simsangj;

Caez hoh ngoenzseng Gungcanjdangj,

Vansou vuzgyangh biengz cij hingz.

-

Youq laj dangjgeiz gou muengh ngeix,

Guhlumj lwgnyaeq gingq daxmeh;

“Caet It” aeu fwen daeuj guh lex（laex）,

Soengq hawj daxmeh Gungcanjdangj.

-

Dangj lumj daengngoenz youq gwnzmbwn,

Ciuq laj ciuq gwnz ronghsagsag;

Couh baengh dangj raeuz bonjsaeh ak,

Daengx biengz gak dieg cungj vuenyungz.

-

Rumzcin ci daeuj dangjgeiz mbin,

Ndaw sim bouxminz bongh hwnj langh;

Bouxboux gaenriengz Gungcanjdangj,

Guekcoj fu’gyangz bi dam bi.

-

Ngoenzseng aendangj dwg ngoenzneix,

Sing riu sing beij(fwen) angq doxcoh;

Vunzlai doengzcaez daeuj goenghoh,

Dangj raeuz yinx loh bae fanh bi.

-

Dangj raeuz it bak lingz sam bi,

Guekcoj gizgiz ngoenz bienq mwn;

Fagliemz fagcuiz geiz yaengx hwnj,

Gwnzbiengz lajmbwn vunz vuenyungz.

-

Dajswh miz le Gungcanjdangj,

Bouxminz fanndang daeuj danggya;

Saedceij ngoenzngoenz cungj ndei gvaq,

Bouxboux ronghnaj youq dienyah.

-

Ngoenzseng aendangj raeuz simhai,

Daengx biengz bouxminz doengz angqyangz;

Ginggvaq geij daih yaengx geiz sang,

Cij ndaej siujgangh daeuj daengz ranz.

-

Aen daeng yaprongh ciuq baihnaj,

Byaraemx gwnzlaj cungj rongh caez;

Loqsiengj bak bi fanh vunz maez,

Cungguek ngoenzneix ak dahraix.

-

Mbanjcuengh Diegyauz doeng vangjloz,

Baenzfouq duetgungz engqgya vaiq;

Hwnzngoenz youq ranz yungh “Wi-Fi”,

Yaepyet huq gai daengz guekrog.

-

Docih dangj raeuz aencingz laux(hung),

Nywj heu doxdauq mbwn raeujrub;

Raemx sawyauyau biengz hoenghhwd,

Ciuh raeuz sangjswt mbouj youcaeuz.

-

Ngoenzneix haeuj mbanj bae yawjyawj,

Gizgiz dauqcawq miz ranzlaeuz;

Ci hung ci iq hai gvaqdaeuj,

Haethaemh noh laeuj rangfwdfwd.

-

Henzmbanj goliux mbinfufu,

Cien fanh roegduz heuhcica;

Bo gwnz bo laj hai rim va,

Mak venj gwnz nga binongnong.

-

Haeuj daengz ndaw ranz sim engq hai,

Byaek ndei gwnz daiz hom daengx ranz;

Naengh roengz gwn caz ndoet laeuj van,

Cwz yiengz bit hanq noh miz caez.

-

Vunz gwn laeuj fiz sim mbouj fiz,

Raeuz miz ngoenzneix bouxlawz hawj;

Bouxminz danggya ndaej guhcawj,

Gungcanjdangj hawj gaiq duhraeuz.

-

Aen Gungcanjdangj laeg lumj haij,

Vunzraeuz fanh daih mbouj ndaej lumz;

Mboujguenj fwn doek rox hwnj rumz,

Riengz Gungcanjdangj cij miz muengh.

-

Seizneix angq ciengq ngoenz “Caet It”,

Guhlumj duzbit ndaej roengz raemx;

Mbouj lumz cosim le doiqsaemh(doengzban),

Vuenyungz cienz baengh Gungcanjdangj.

-

Bak bi fukhwng guh baenz caen,

Ciuh raeuz yawjraen angq mbouj dingz;

Ngoenzneix youh ciengq 《Baihdoeng Nding》,

Cungguek dingh hingz bae fanh daih.

-

“Caet It” yinhcangh rongh gimhenj,

Youhsiu dangjyenz ndaej byaujcangh;

Guh ok gungyen cungqvunz angq,

Bouxboux cungj gangj yaek yozsiz.

-

Gyoengqraeuz seng youq laj geizhoengz,

Ciuhvunz sungyoengz(yungz) ndaej rumz raeuj;

Doengzcaez haenqsim guh hwnjdaeuj,

Hawj biengz engq raeuj va engq hoengh.

-

Guh boux dangjyenz mbaq couh naek,

Gyanghaemh gyanghaet cungj yaek geiq;

Lai vih vunzlai bae naemjngeix,

Cij miz yienghneix caengj baenzgoeng.

-

Bouxminz baij youq daih’it vih,

Dangj raeuz caen cix guh ndaej daengz;

Vih minz siengj gonq youh siengj laeng,

Couh lumj aen daeng rongh gyanghaemh.

-

Bouxminz ndaej gvaq swnghhoz ndei,

Ngoenzneix “Caet It” cietmoeg lai;

Lwnhgangj dangjsij simcingz hai,

Doengzcaez bijsai ciengq fwenhoengz.