Aen Vunqsik Diuzgaij “Ngveihlwgloux”

Bwzliuz Couqmaenh Gij Eiqsik

Caezcaemh Cunghvaz Minzcuz

Bineix doxdaeuj, Bwzliuz Si cauhmoq guhhong, Bwzliuz Siveij Dungjcanjbu guhdaeuz, caeuq Bwzliuz Si Fazyen、Bingzcwng Cin Dangjveij Cwngfuj youq Bingzcwng Cin Mbanjsizliuz guh fungh ranz diuzgaij “ngveihlwgloux”, bang vunzlai gak minzcuz gaijgez doengh gij vwndiz gaenj guh、hoj guh、youheiq、maqmuengh haenx. Neix ndaej gaijgez ngaekngeu、coi huzndei, coicaenh gak minzcuz lumj ngveihlwgloux nei gotndaet youq giz ndeu.

Aen doihdiuzgaij dwg doengh boux ganbu Bingzcwng Fazdingz、Aen Cunghsinh Cunghci ndawcin、baicuzsoj、swhfazsoj、song veij ndawmbanj、bouxgingqnaek ndawmbanj caeuq Aen Hoih Coicaenh Saehnieb Goeng’ik daengj. Gyoengq diuzgaijyenz sugrox vunz、dieg、fungsug daengj, miz ngaekngeu gyoengqde diuzgaij gonq, coh daengz fazgvanh saemjbuenq, guh daengz vaqgej ngaekngeu、swhfaz nyinhdingh、diuzgaij hengzguh doiqciep ndaej ndei, hohndei gij gienzik habfap gak minzcuz vunzlai.

Laebbaenz fungh ranz diuzgaij neix, daezsang le gij naengzlig ceihleix hongsaeh minzcuz, guh caez guh ndei aen daihbuenz aeu lai fuengsik ceihleix hongsaeh minzcuz. Neix caemh okrengz coicaenh Bwzliuz Si cauhlaeb aen si guhyiengh minzcuz doxgiet baenaj daengx guek, doicaenh gih raeuz hwnqguh aen gih guhyiengh couqmaenh gij eiqsik caezcaemh Cunghvaz Minzcuz.

（严玉莲/Yenz Yilenz）