7 nyied 12 hauh, Gaiq Daihcibngeih Gvangjsih Gihcwngz Vunzlai Vwnzyi Comzyienj youq Gvei- gangj guh.

Gvangjsih gihcwngz vunzlai vwnzyi comzyienj dwg aen hozdung binjbaiz vwnzva vunzlai daengx gih gveihmoz ceiq hung、cwgoemq ceiq gvangq、yingjyangj ceiq hung, daj bi 2012 hainduj gaenq banh baenz 11 gaiq. Gaiq yienjheiq neix youz Swcigih Dangjveij Senhconzbu、Swcigih Vwnzva Caeuq Lijyouzdingh、Gveigangj Siveij Sicwngfuj、Vuzcouh Siveij Sicwngfuj caezcaemh cawjbanh, laeb gvangjcangzvuj、diuq foux、gyong laz gimz yienz、yienjheiq seiq loh, ginggvaq gih、si、yienh sam gaep gvangqlangh fatdoengh caeuq senjleh, miz 2500 lai boux bouxyienj daengx gih 18 aen doih daiqbiuj camgya yienjok.

Bineix dwg Cungguek moq laebbaenz 75 hopbi caeuq Siz Ginbingz cungjsuhgi youq gwnz aen hoih yaenglwnh hong vwnzyi gangjvah youqgaenj ndaej cib hopbi, baez comzyienj neix dwg 《Gvangjsih Gihcwngz Vunzlai Vwnzyi Comzyienj Canghcwngz》 okdaiz le guh baez daih’it, bineix hozdung engqgya yienh’ok haeujgyawj gihcwngz、vunzlai、seizdaih, cujciz anbaiz engqgya gohyoz, daengx gih gak cuz bouxminz cauhraiz yiedcingz hoenghhwd, comzyawj minzcuz doxgiet、lajmbanj saenqhwng daengj cawjdaez, doiok buek cezmuz moq depgyawj vunzlai、mizyinx、hawj vunz gyaez ndeu, gyonjcomz langhbaij gij cwngzgoj ceiq moq bi ndeu gvaqdaeuj daengx gih vunzlai vwnzyi hwngfat mwnhoengh.

Ciuq cam rox, vih bangrengz dieg ciepbanh cauh binjbaiz miz vwnzva daegsaek, gaiq comzyienj neix caeuq Gveigangj Si Gaiqcibseiq Vwnzva Ngaeux Baenzroix Hozdung caemh banh. Mboengq comzyienj lij miz yienjheiq hawj bouxminz yawj、cunzbaij vwnzva ngaeux、gaisau lohsienq ndei baeyouz daengj hozdung dem.

(Cinz Gyanghyiz daj 《Gvangjsih Yizbau》 aeu daeuj genj hoiz)