Seizgan gvaq ndaej vaiq lumj naq, mbouj rox mbouj nyinh gvaqbae geijcib bi lo. Geijcib bi gaxgonq, gou lij rengzrwdrwd, guhhong maenh- ndwtndwt. Vih vut aen mauhgungz, gou……

Codaeuz, gou ngamq bae hag Sawcuengh, miz di vunz yawj mbouj swnh da, baihnaj gou ndaq naeuz: “Bawx baenz bang, lan baenz gyoengq, namh yaek moek daengz giuzndaeng lo, lij buet bae mbanjrog caeuq gyoengq bouxcoz hag gijmaz Saw- cuengh, caen mbouj rox najmong.” Gyoengqde lij eu naeuz:

Gaeqmeh hamj gvaq ciengz,

Daet rieng guh gaeqhangh,

Baenz meh ga ndungqndangq,

Lij angq guh sau daeuz.

Gou lumj boux rwznuk nei mbouj leixlangh gyoengqde, ndawsim gag gangj gag naeuz: Yawjyawj ba, ngoenzlaeng dauqdaej dwg byawz najmong. Lwg gou bawx gou cungj cihciz gou gujli gou, heuh gou haenqrengz hagsib ceng’aeu guh baenz boux miz vwnzva rox gohyoz, caemhcaiq ndaej yungh gohyoz daeuj cijdauj swnghcanj, gaijbienq yiengh- siengq gungz, yamq hwnj diuzloh baenzfouq. Daj neix hwnj, gou engq mbouj lau vunz youq baihlaeng gangj vahvaih, mbouj lau roen gyae loh rwix, genhciz haemhhaemh benz bya gvaq lueg bae camgya bansaujmangz Saw- cuengh. Mbouj geij nanz, gou hag rox Sawcuengh lo, rox doeg rox yawj Gvangjsih Minzcuz Bau, rox yungh Sawcuengh daeuj sij saenq sij faenzcieng, gou sim’angq dangqmaz, gou lumjbaenz bienq coz lai lo. Din mbaeu sim siengj bae son daihgya baenzlawz yungh gohyoz daeuj dajndaem dajciengx. Hojsik vunzlai doiq gou buenq saenq buenq ngeiz, miz di vunz naeuz gou gangjboq, lij youq baihlaeng nyaeuq ndaeng cut dem. Gvaqlaeng, gou caen baengh gij gohyoz youq gwnz Gvangjsih Minzcuz Bau hag ndaej haenx daeuj cijdauj swnghcanj caeuq ndaem ciengx baenzfouq lo, dingzlai ginzcung hix gaendwk gaijgez vwndiz imq raeuj haenx lo. Hoeng miz di vunz lij dingz youq ndaw gungz mbouj bienq. Daj neix hwnj, vunzmbanj doiq gou youh gingq youh boiqfug, engq haenh ndei. Mbouj caiq ngeiz lo. Haemhhaemh cungj comz daeuj ranz gou caez naengh rongqliengz gangjgoj guh- caemz, heuh gou gaisau swnghcanj gingniemh.

Bihaenx miz haemh ndeu, rongh- ndwen ronghsagsag, ndaundeiq deih- yaenyaen, hoengheiq daegbied singj- sien. Gyanghongh gou cungj naengh rim vunz liux, heuh gou daeuj gaisau swnghcanj gingniemh. Gou lumj boux gisuzyenz nei youq gyang vunzlai doeg gij gohyoz gisuz ndaem ciengx gwnz Gvangjsih Minzcuz Bau haenx hawj daihgya dingq. Daihgya caemrwgrwg haeujsim dingq, gou yied doeg yied miz rengz, youq ndaw gyanghaemh deih caem vunz cingx, gij sing’yaem gou cienz haeuj mbwn haeuj fwj bae. Ronghndwen yiengq gou riuoiq ndaundeiq doiq gou yaepda, lwnh gou hwnz lo. Doeklaeng, gou baenzneix ciengq geij hot fwen naeuz:

Gou miz bawx baenz bang,

Gou miz lan baenz gyoengq,

Lwg bawx swhsiengj doeng,

Soengq gou bae hagdangz.

Gou mbouj lau najmong,

Song gvanbaz guhdoih,

Baenz sueng youh baenz doiq,

Ra gyoengq oiq bouxcoz.

Gaeqmeh hamj gvaq ciengz,

Gvaq biengz hag vwnzva,

Hag rox Sawcuengh ma,

Doeg hawj daihgya dingq.

Gou ciengq caengz liux, vunzlai couh bekfwngz robrob haenh mbouj dingz.

Dan doenghboux bak raeh vah lai haenx, roxnyinh cihgeij najmong nanzgvaq, mbouj gamj ok sing. Gaeq haen lo, vunzlai cij sanq baema ninz.

Daengzlaeng, youq gyanghongh gou banh bansaujmangz Sawcuengh, hag gohgi ndaem ciengx……