第九期

原文：当夜五更时候，船已近曹操水寨。孔明教把船只头西尾东，一带摆开，就船上擂鼓呐喊。鲁肃惊曰：“倘曹兵齐出，如之奈何？”孔明笑曰：“吾料曹操于重雾中必不敢出。吾等只顾酌酒取乐，待雾散便回。”

却说曹寨中，听得擂鼓呐喊，毛玠、于禁二人慌忙飞报曹操。操传令曰：“重雾迷江，彼军忽至，必有埋伏，切不可轻动。可拨水军弓弩手乱箭射之。”又差人往旱寨内唤张辽、徐晃各带弓弩军三千，火速到江边助射。比及号令到来，毛玠、于禁怕南军抢入水寨，已差弓弩手在寨前放箭；少顷，旱寨内弓弩手亦到，约一万余人，尽皆向江中放箭：箭如雨发。孔明教把船吊回，头东尾西，逼近水寨受箭，一面擂鼓呐喊。待至日高雾散，孔明令收船急回。二十只船两边束草上，排满箭枝。孔明令各船上军士齐声叫曰：“谢丞相箭！”比及曹军寨内报知曹操时，这里船轻水急，已放回二十余里，追之不及。曹操懊悔不已。

却说孔明回船谓鲁肃曰：“每船上箭约五六千矣。不费江东半分之力，已得十万余箭。明日即将来射曹军，却不甚便！”肃曰：“先生真神人也！何以知今日如此大雾？”孔明曰：“为将而不通天文，不识地利，不知奇门，不晓阴阳，不看阵图，不明兵势，是庸才也。亮于三日前已算定今日有大雾，因此敢任三日之限。公瑾教我十日完办，工匠料物，都不应手，将这一件风流罪过，明白要杀我。——我命系于天，公瑾焉能害我哉！”鲁肃拜服。

（节选自《三国演义》第四十六回，人民文学出版社，1979年）

Hwnz de daengz seiz nguxgeng, gij ruz hai daengz aen ranzbing Cauz Cauh gwnz dah, Gungjmingz son bouxbing bingzbaiz van gij ruz, gyaeuj ruz coh baihsae, byai ruz coh baihdoeng, youq gwnz ruz itmienh roq gyong itmienh hemq aeu hoenxciengq. Luj Suz doeksaet yat, cam Gungjmingz:“Danghnaeuz gij bing Cauz Cauh caez okdaeuj hoenx raeuz, raeuz baenz- lawz guh？” Gungjmingz riu naeuz: “Mok baenzlai laep, gou liuhsiengj Cauz Cauh itdingh mbouj gamj baijbing gunghoenx raeuz, raeuz onjsim gwn laeuj guh’angq, deq ranzrongh mok sanq couh doxma.”

Caj gangj aen ranzbing Cauz Cauh youq gwnz dah baihneix, ndaejnyi vunzdig roq gyong hemq aeu hoenxciengq, Mauz Gai ndij Yiz Gin song boux doq foengx buet bae bauq Cauz Cauh, miz vunzdig hoenx daeuj lo. Cauz Cauh dingq le, mingling naeuz: “Seizneix gwnz dah mokfoenfoen, vunzdig foemhfwd daeuj, bietdingh demq ndei, mbouj ndaej luenh hoenx okbae, gojyij diuh gij binggung yungh naq luenh dwk vunzdig.” Youh baij vunz bae ranzbing gwnz deih heuh Cangh Liuz ndij Ciz Vang, moix boux vunz daiq sam cien boux binggung vaiqdi daengz haenzdah bang dwk naq hoenx vunzdig. Cauz Cauh mingling caengz daeuj, lau vunzdig(namzginh) ciengj haeuj ranzbing gwnz dah, Mauz Gai ndij Yiz Gin couh sien baij binggung youq dounaj ranzbing dwknaq hoenx vunzdig. Gvaq mbouj nanz, gij binggung ranzbing gwnz deih buet daeuj daengz haenzdah, daih’iek fanh lai binggung doengzcaez coh vunzdig ndaw dah dwknaq, gij naq na lumj fwn doek nei. Gungjmingz caiq son bouxbing fan aen ruz, gyaeuj ruz coh baihdoeng, byai ruz coh baihsae, hai ruz bikgaenh ranzbing gwnz dah Cauz Cauh, deq aeu naq, itmienh roq gyong itmienh hemq aeu hoenxciengq. Daengz ranzrongh daengngoenz hwnj mok sanq, Gungjmingz mingling gij bing sou ruz sikhaek dauqbae. Gij mauhnyinz gwnz ngeihcib aen ruz song mbiengj baek rim naq caez. Gungjmingz mingling gij bing gwnz ruz doengz- caez hemq naeuz:“Docih cwngzsieng soengq naq!” Deq daengz bouxbing haeuj ranzbing bauq naeuz Cauz Cauh seizde, raemxdah lae gip ruz youh mbaeu, Gungjmingz daiq bing hai ruz bae ndaej ngeihcib lai leix lo, gyaep hix mbouj dawz. Cauz Cauh ienqhoij lienzlienz.

Caiqnaeuz, Gungjmingz youq ndaw ruz doiq Luj Suz naeuz: “Moix aen ruz ndaej haj roek cien ci naq. Mbouj yungh Gyanghdungh ok buenq faen rengz, couh ndaej cib fanh lai ci naq. Ngoenzcog yungh gij naq neix dwk gij bing Cauz Cauh fuengbienh lai lo!” Luj Suz naeuz: “Sienseng caen dwg saenzsien a! Mwngz baenzlawz rox ngoenzneix mok baenzlai hung?” Gungjmingz naeuz: “Dang ciengq cix naeuz mbouj rox denhvwnz, mbouj sug deihseiq, mbouj gyaek boekgvaq, mbouj rox yaemyiengz, mbouj yawj dozcindi, mbouj mingz- beg bingseiq, dwg bouxsoemz. Gou sam ngoenz gonq couh dwk gvaq rox ngoenzneix miz mok hung, dajneix gou gamj bauq sam ngoenz ndawde guhsat cib fanh ci naq. Couh Yiz heuh cib ngoenz guh liux, cangh mbouj miz, caizliuh hix mbouj ceiq caez, de ndongqda aeu an aen coih gaj gou. ——Mingh gou ndij mbwn lienzhaeh, Gunghginj baenzlawz ndaej haih gou!” Luj Suz gig baiqfug Gungjmingz.

（平果市：梁金海/Liengz Ginhhaij）

Youq gyanghwnz haj geng, ruz gaenq bae gyawj mbanjraemx Cauz Cauh. Cuhgoz Lieng naeuz dawz gyaeuj ruz yiengq baihsae rieng ruz yiengq baihdoeng, baijhai baenz cih “it”, couh youq gwnz ruz roq gyong hemq hwnjdaeuj. Luj Suz doeksaet naeuz:“Danghnaeuz dwg bing Cauz Cauh caez ok, baenzlawz guh ne?” Cuhgoz Lieng riu naeuz:“Gou rox daengz Cauz Cauh youq ndaw mok hung itdingh mbouj gamj ok. Raeuz song boux gwn laeuj gvaqyinx gonq, caj mok sanq couh baema.”

Dauqnaeuz mbanj Cauz Cauh, dingq ndaejnyi baihrog youh roq gyong youh swenj, Mauz Gai、Yiz Gin song boux vunz neix vuengmuengz buet daeuj lwnh Cauz Cauh. Cauz Cauh naeuz:“Seizneix mok hung moengzloengz Dahcangzgyangh, bing de sawqmwh daeuj daengz, bietdingh miz gaenzgaeq, ciengeiz mbouj ndaej seizbienh luenh baij bing. Hoeng heuh bouxnyingznaq luenh nyingz naq couh ndaej.” Youh heuh vunz bae ndaw mbanj- rengx heuh Cangh Liuz、Ciz Vang gak daiq sam cien bouxnyingznaq, vaiqdi bae daengz henzdah bangcoh nyingz naq. Deq aen minghlingh de daeuj daengz, Mauz Gai、Yiz Gin lau namzginh ciengj haeuj mbanjraemx bae, gaenq heuh boux- nyingznaq youq dangqnaj mbanj nyingz naq; yaep he, bouxnyingznaq ndaw mbanjrengx hix daengz, daihgaiq miz fanh lai vunz, couh yiengq gyangdah cuengq naq, naq lumj fwn doek ityiengh. Cuhgoz Lieng heuh dawz ruz diuq dauq, gyaeuj ruz yiengq baihdoeng rieng ruz yiengq baihsae, hai bae gyawj mbanjraemx Cauz Cauh ciep naq, itmienh roq gyong itmienh swenj. Caj daengz daengngoenz hwnj sang mok sanq, Cuhgoz Lieng couh minghlingh dauqma. Ngeihcib diuz ruz gwnzde cungj cap miz naq, Cuhgoz Lieng daengq gyoengq ginhsw caez hemq naeuz:“Docih gij naq cwngz- sieng.” Cauz Cauh rox deng yaeuh lo, seizneix baihhaenx ruz mbaeu raemx riuz ndaej gip, ruz gaenq hai bae ngeihcib lai leix lo, gyaep hix gyaep mbouj ndaej. Cauz Cauh ienqhoij dangqmaz, Cuhgoz Lieng daeuj daengz ndaw ruz doiq Luj Suz naeuz:“Moix diuz ruz gwnzde miz haj roek fanh geu naq, mbouj yungh saek faen goengrengz, couh ndaej cib fanh geu naq, ngoenzcog couh yaek daeuj nyingz Cauzginh, mbouj dwg gig bienh ma.” Luj Suz naeuz:“Sienseng caen dwg vunzsaenz ha! Baenzlawz rox naeuz ngoenzneix miz mok hung?” Cuhgoz Lieng naeuz:“Boux daihciengq mbouj doeng gwnzmbwn, mbouj rox deihleix, mbouj rox dougeizheih, mbouj rox yaemyiengz, mbouj yawj cindoz, mbouj rox gij seizseiq hoenxciengq, dwg boux vunz hukngawz. Gou youq sam ngoenz gonq couh rox ngoenzneix miz mok hung, ndigah gamj gangj hanh sam ngoenz. Gunghginj heuh gou cib ngoenz banh caez, canghliuh doxgaiq, cungj guh mbouj ndaej, dawz gienh saeh neix daeuj dingh gij coih gou, mingzbeg yaek gaj gou. ——Diuz mingh gou dwg gwnzmbwn hawj, Gunghginj baenzlawz ndaej haih gou ne!” Luj Suz boiqfug dangqmaz.

（都安瑶族自治县：韦绉怡 / Veiz Couyiz）