Sai:

Gvaq gwnz haenz bae ndek,

Haeux lez dek laeng go,

Gaem gyaj sanqsoso,

Gogo cungj baenz haeux.

Mbwk:

Gumq cix sienqlitlit,

Ndit caiq remj baihlaeng,

Ndit ndat hanh cix daengz,

Baihlaeng yaek dai manh.

Sai:

Seiz reihnaz daengz ranz,

Ganq liux cix ndaej naengh,

Ngoenzlawz nditndat haenq,

Mbaenqlawz hix mbouj bae.

Mbwk:

Gaxgonq guenj haeuxnaz,

Mbouj rox maz gohyoz,

Gohaeux daemqbobo,

Gag dainyoj roengz namh.

Sai:

Seizneix miz gohyoz,

Raeuz rox yungh couh ndei,

Ranzranz cungj baenzmeiz(miz),

Haeux ndei gwn mbouj liux.

Mbwk:

Gaxgonq baez sou haeux,

Gangj daeuj caen sim’in,

Gohaeux caij lajdin,

Naedhaeux sinz roengz namh.

Sai:

Gihgi daeuj daj haeux,

Raeuz bouxboux cungj angq,

Raih naz caiq naeuz gvangq,

Ngoenz ganq ndaej geij doengh.

Mbwk:

Ngoenzgonq seiz souhaeux,

Ngaem gyaeuj gvej mbouj dingz,

Sou haeux daengz banringz,

Gangjvah sing mbouj ok.

Sai:

Gihgai bae dajsou,

Haeux gag lae roengz daeh,

Fad haeux mbouj yungh faex,

Ngoenz ndaej geijcib raih.

Mbwk:

Gaxgonq aeu fad haeux,

Hanh dumz gyaeuj dumz rwz,

Rauheiq lumj duzcwz,

Swz lumj yaek dai mingh.

Sai:

Seizneix caen ndei lai,

Gihgai fad couh ndaej,

Song fwngz bwnq haeujbae,

Naed haeux laecaca.

Mbwk:

Aensangz banz bu law,

Dawz umj haeux cix fad,

Song faj ga baez cab,

Swz lumj naeuz bag fwnz.

Sai:

Seiz sou haeux mbouj gyaih,

Gihgai mbaenqmbaenq meiz(miz),

Ciuh seizneix caen ndei,

Ra yiengh beij mbouj cawq.

Mbwk:

Aensangz nyengq bu law,

Dawz umj haeux cix fonj,

Raih haeux fad geij donq,

Doxgyonj ndaej saek loz.

Sai:

Yungh gihgai daj haeux,

Daeuj lumj raemxdiuqdan,

Geij boux vunz daeuj bang,

Raeuz cang daeh mbouj gib.

Mbwk:

Gaxgonq yaek bae haw,

Cawj souhsaw dwk mbaij,

Bohmeh ngaenz mbouj daih(lai),

Daiq bae riengz guh ringz.

Sai:

Seizneix raeuz bae haw,

Miz ngaenz dawz dwk daeh,

Yaek gwn maz cungj ndaej,

Sawj ngaenz sim mbouj in.

Mbwk:

Mbaij souh fouz fa goemq,

Haeu soemj youh haeu yai,

Mbouj gwn iek yaek dai,

Mbouj lau vunzlai lwnh.

Sai:

Seiz miz ngaenz ndaw daeh,

Saej(sawj) geijlai mbouj in,

Ngoenz bae haw gwnringz,

Noh imq laeuj hix doh.

Mbwk:

Seizgonq raeuz bae haw,

Ngeix dawz genxlele,

Bae haw mbouj miz ceh(ci),

Boux deq boux byaijroen.

Sai:

Seiz yaek ok bakdou,

Bae youz hix naengh ceh(ci),

Mbouj dwg lumj ciuhgeq,

Boux deq boux byaijroen.

Mbwk:

Seizgonq raeuz bae haw,

Dawz hazraeu bae riengz,

Doxbuet bae’ndiengndieng,

Ndaemndieng laemx geij baez.

Sai:

Ciuh seizneix ndei lai,

Vunz fatcaiz cawx ceh,

Bae haw cawx gaen nyeq(noh),

Ndaej naengh ceh dauq ranz.

Mbwk:

Gaxgonq byaij roennya,

Uq namh daengz gagoek,

Caiq bungz daengz fwn doek,

Ndaek lumj gaeq doek daemz.

Sai:

Seizneix raeuz bae haw,

Ci dawz raeuz baedauq,

Byajraez fwn doek laux,

Aen mauh hix mbouj dumz.

Mbwk:

Seizgonq byaij roen bya,

Oen daep ga raeuz lwed,

Dawz rap caiq doxbuet,

Bae lumj hwet yaek gauz(geuz).

Sai:

Goengloh doeng daengz mbanj,

Gag ranz gag cawx ceh(ci),

Ndaem lwgmanh lwggve,

Miz ceh bang raeuz yinh(hoenh).

Mbwk:

Dawz rap byaij gvaq nya,

Dinvaq rengqrere,

Dawz rap byaijyeye,

Ndoksej lumj yaek gauz(geuz).

Sai:

Mbanjmbanj byaij roen bingz,

Lumj Baekging Sanghaij,

Miz ci doz raeuz byaij,

Maij bae dauq mbouj you.

Mbwk:

Yaek bae haw bae mbanj,

Ganq diuj gen diuj ga,

Swz lumj naeuz duzma,

Byaij gvaq bya gvaq rungh.

Sai:

Gungcanjdangj daeuj goq,

Byaijloh diuzdiuz bingz,

Ngoenz baedauq Namzningz,

Gvaq ringz mbouj caengz haemh.

Mbwk:

Gaiq rap youq gwnz mbaq,

Vaq ga hwnj ga roengz,

Byaij geijcib leix roen,

Cij ndaej doeng daihloh.

Sai:

Dawzrap mbouj byaijdin,

Seiz ninz hix miz ceh,

Mbouj dwg vah lwgnyez,

Ceh baedauq fuengbienh.

Mbwk:

Gaxgonq caen daih yoq(ca),

Suenqsoq daep hohfwngz,

Ukgyaeuj ngeixfwngfwng,

Yungh hohfwngz guh maenh.

Sai:

Seiz yungh gisongi,

Didi suenq cungj vaiq,

Dawz byaek bae haw baij,

Hix daiq aen de riengz.

Mbwk:

Gaxgonq caen daih yoq(ca),

Hoj daenj caiq hoj gwn,

Suenqsoq daep hohfwngz,

Ukgyaeuj mwnhsaesae.

Sai:

Seiz raeuz yungh soujgih,

Raen gij ndei lailai,

Boux bae cawx bae gai,

Hai aen de bangcoh.

Mbwk:

Banneix seizdaih moq,

Gizgiz doq bienq ndei.

Daengz bouxmbanj bouxhei(haw),

Gyaeujvaq meiz(miz) soujgih.

Sai:

Boux lwg youq gwnz ceh,

Bouxmeh youq ndaw naz,

Miz saeh yaek doxra,

Vah ndaej doeng baedauq.

Mbwk:

Gaxgonq yaek doeng vah,

Ndaenq cienz mbouj gvaqbae,

Bingh yaek goenq hozsae,

Dai bae vunz mbouj rox.

Sai:

Soujgih youq lajvaq,

Gvaq gizlawz hix raen,

Ndaw daeh raeuz miz ngaenz,

Ciengx aen de hix heih.

Mbwk:

Gaxgonq raeuz seng lwg,

Dwg yahgeq daeuj bang,

Bouxlwg seng ok ndang,

Meh sing sang mbouj ok.

Sai:

Seizneix raeuz seng lwg,

Dwg bae daengz yihyen,

Canghyw youq bangxhenz,

Raeuz mbouj gen mbouj heiq.

Mbwk:

Gaxgonq boh baenz bingh,

Yaek ce mingh gwnz sangz,

Mbouj miz ngaenz gwnz ndang,

Baenz fangz hix fouzfap.

Sai:

Seizneix miz yihbauj,

Laux nyaeq bingh mbouj you,

Miz guekgya bang raeuz,

Mbouj you gwn you bingh.

Mbwk:

Ngoenzneix daeuj guh fwen,

Dwen raen maz cix gangj,

Dungxsaw gou mbouj gvangq,

Gangj mbouj deng gaej riu.

Sai:

Ngeix maz cix gangj maz,

Ra roen mbouj raen rag,

Gij gwn dou couh ak,

Cak(cauh) fwen cix mbouj baenz.

Mbwk:

Ngoenzneix daeuj guh fwen,

Dwen gij haemz gij hoj,

Mbouj gangj vunz mbouj rox,

Ciuhboh caen dwgrengz.

Sai:

Ngoenzneix daeuj guh fwen,

Dwen gij ndei mbouj caenh,

Miz gwn caiq miz daenj,

Ciuhneix maenh’ak lai.

Mbwk:

Ma iek maij gwn nyeq(noh),

Vunzgeq maij eu fwen,

Ngoenzneix raeuz simvuen,

Fwen ngoenz laep ngoenz haemh.

Sai:

Ma iek maij gwn nyeq,

Vunzgeq maij vuenyungz,

Ciuhvunz baenzneix hung,

Aeu vuenyungz gvaq ciuh.

（2 sat）