Bonjbauq siusik (gicej Cau Dwzfeih) Mboengqneix, gicej cam Swcigih Minzcunghveij roxyiuj, 2024 nienz Sawcuengh Vahcuengh suijbingz gaujsi 7 nyied 27 hauh youq Gvangj- sih Minzcuz Dayoz gauj.

Ciuq cam rox, baez gaujsi neix boux lawz bae gauj cungj ndaej, mboujlwnh sai mbwk、minzcuz、bi- ndwen、haglig、guh maz hong、 dieg lawz、guek lawz daengj, ciuq bouxvunz aeuyungh bae gauj, gag senj bae gauj aen daengjgaep lawz. Baez gaujsi neix cujyau dwg gauj boux bae gaujsi yungh Sawcuengh Vahcuengh ndaej baenzlawz yiengh, baugvat gij giekdaej Sawcuengh Vahcuengh、gyoeb swz cauh gawq、yawjdoeg roxyiuj、fanhoiz(Cuengh hoiz Gun、Gun hoiz Cuengh) caeuq raiz faenzcieng daengj. Gaujsi faen cogaep、cunggaep、gaugaep 3 aen daengjgaep, gak daengjgaep cungj dwg bizsi. Gaujsi yungh doengjit daihgang、doengjit okdaez、doengjit habgek biucinj、doengjit saenqsik guenjleix caeuq doengjit mbawcingq daengjgaep. Gaujsi mbawgienj muenxfaen 100 faen, gaujsi cingzcik 60 faen dwg diuz sienq habgek biucinj, gak daengjgaep faen daengjdaeuz、daengjngeih song aen daengjgaep, 80 faen(hamz) dox- hwnj dwg daengjdaeuz, 60-79 faen dwg daengjngeih.

Baez gaujsi neix doengjit youq gwnz muengx bauqmingz, boux naemj bae gauj youq 2024 nienz 7 nyied 4 hauh daengz 15 hauh daeng hwnjbae Swcigih Minzcunghveij Vangj（http：//mzw.gxzf.gov.cn/）, diemj “hidungj vangjloz bauqmingz Sawcuengh Vahcuengh suijbingz gaujsi” lanzmoeg le, ciuq daezsingj bae bauqmingz ndaej.