Mbwk:

Cuengq boux lwg haenznaz,

Lwg gwn nya gwn nyak,

Daej daengz ndang fatndat,

Bae gvaq bak ngaenzyw.

Sai:

Seiz lwg bae hagdangz,

Lauxsae bang saeg bouh(buh),

Beuj haex caiq beuj nyouh,

Bouxboux cungj haenh ndei.

Mbwk:

Aemq lwg caiq dawz rap,

Byaij batci batcaiz,

Gaxgonq hong vunzlai,

Meh loenq geijlai hanh.

Sai:

Seiz lwg hwnj hagdangz,

Meh cix angq bae doengh,

Baedauq miz boux soengq,

Bae doengh hix mbouj you.

Mbwk:

Lwg daej youq baihlaeng,

Meh hix raen dungx cieg,

Lwg cix daej dungxiek,

Meh dungx cieglinlin.

Sai:

Seiz lwg bae yozyau,

Dauq daengz ranz cix gwn,

Mbouj deng ndit deng fwn,

Gwn gijmaz caih genj.

Mbwk:

Bouxlwg aemq baihlaeng,

Meh raen baeg yaek dai,

Donq hong mbouj caengz gvaiz,

Meh daraiz ndaw naz.

Sai:

Bae doegsaw naengh ceh(ci),

Bohmeh hix mbouj you,

Mbouj lumj ciuhgeq raeuz,

Aen hwet gaeuzngvemngvem.

Mbwk:

Ngoenzngoenz buetndaeundaeu,

Lumj aen daeuq daemjbaengz,

Ngoenzngoenz baenqyaeng’yaeng,

Ndang ndaem lumj duzdoengh.

Sai:

Gwqneix mbouj sinhoj,

Noh hau lumj valeiz,

Haethaemh ndaej gwn ndei,

Dwkgeiz youh diuq angq.

Mbwk:

Gaxgonq hong vunzlai,

Mbouj ninz gvaiz saek donq,

Cib yiengh hong doxgyonj,

Youq mbouj onj mbouj an.

Sai:

Reihnaz faen daengz hoh,

Bouxboux doq saeuqyouz,

Daengz ngoenz ndaem ngoenz sou,

Mboujyungh naeuz doxheuh.

Mbwk:

Gaxgonq hong vunzlai,

Guh dai gwn mbouj doh,

Ngoenzngoenz bae’ngo’ngo,

Haeux coq bak mbouj rim.

Sai:

Reihnaz faen daengz ranz,

Lwglan cungj raen angq,

Raeuz gag boux gag ganq,

Ndaej vangq couh eu fwen.

Mbwk:

Banhaemh dauq daengz ranz,

Ganq gueng mou gueng gaeq,

Lwg raen meh cix naeh,

Fanz dungxsaej yaek dai.

Sai:

Gwqneix mbouj gangj geq,

Nyeq(noh) biz hix mbouj gwn,

Yawj yienghyiengh naeuz nywnx,

Gwn byaekcenz feihdauh.

Mbwk:

Hojlienz boux duicangj,

Gangj lai hix dwgrengz,

Bouxlawz guh mbouj deng,

Doxceng ngoenz daengz haemh.

Sai:

Seizneix raeuz gag ganq,

Fouz boux guenj boux naeuz,

Donq gwn ngaiz gwn caeuz,

Aeu fwen daeuj doxhaenh.

Mbwk:

Dwgcoh boux duicangj,

Gvangjbo heuh mbouj dingz,

Haet heuh daengz banringz,

Sing hep daengz hozmanh.

Sai:

Seiz gak ranz gak bae,

Mboujcaeq（caiq） naeuz doxheuh,

Guhhong mbouj doxeuq,

Ganq liux cix dauq ranz.

Mbwk:

Gaxgonq caen dwg yaez,

Geij diuz faex caep rauq,

Dawz ndaej song sam sauh,

Aen rauq baenz dwk feiz.

Sai:

Seiz gihgai rauqfaz(diet),

Daz bae caiq daz dauq,

Mbouj dwg naeuz gangj fauh,

Ngoenz rauq bak moux naz.

Mbwk:

Gaxgonq dawz caefaex,

Cae bae naekngaeungaeu,

Duzvaiz hwet cix gaeuz,

Boux yaeuj(riuj) cae hix gyaih.

Sai:

Seizneix dawz rauqfaz(diet),

Gwed hwnj mbaq cix mbaeu,

Reihnaz lai mbouj you,

Rauq bae mbaeufiegfieg.

Mbwk:

Aeu doengjfaex rap raemx,

Doengjraemx laeuhyeye,

Aeu namhnding daeuj nez(fong),

Yied nez de yied laeuh.

Sai:

Seiz mbouj gangj yungh doengj,

Raemx gag soengq daengz ranz,

Aen laeuz geij caengz sang,

Hix ndaej an daengz dingj.

Mbwk:

Aeu doengjfaex rap raemx,

Gaemh mbaq naekngae’ngae,

Byaij yamq dinj yamq raez,

Foedfwed bae yaek liux.

Sai:

Seizneix raemx gag lae,

Raeuz mboujcaeq（caiq） yungh mbaq,

Doengjfaex seiz mbouj ra,

Aen mbaq mbouj dwgrengz.

Mbwk:

Gaxgonq ndaem haeuxdoj,

Raeuz mbouj rox naeuz ndei,

Naed iq lumj duzreiz,

Beibei(bibi) gwn mbouj doh.

Sai:

Seizneix ndaem haeuxhek,

Mbek raihraih cungj baenz,

Moux ndaej geij cien gaen,

Bouxboux raen cungj ngah.

Mbwk:

Ndaem haeux mbouj fatnga,

Go’nya sang lumx hoq,

Yawj le raen namh gyoq,

Aeu maz goq daengx ranz.

Sai:

Seizneix miz gohyoz,

Rox guenj cix fungsou,

Haeux moq yaek baenz sou,

Haeux gaeuq lw gvaq fanh.

Mbwk:

Gaxgonq ndaem haeuxdoj,

Caen gwn hoj yaek dai,

Gode mbouj baenz lai,

Raeuz ngaiz iek geij ciuh.

Sai:

Seiz miuzit miuzngeih,

Go beij go baenz lai,

Gwn mbouj liux caiq gai,

Ndaej cienzcaiz roengz daeh.

Mbwk:

Gaxgonq raeuz ndaemnaz,

Lumj mo bya mo nyauh,

Ngoenz ndaem geij luengj rauq,

Dauq bibuengq linlin.

Sai:

Seizneix raeuz ndaemnaz,

Mbouj miz maz youqgaenj,

Loek gihgai baez baenq,

Haenq（ak） gvaq bak vunz ndaem.

Mbwk:

Gaxgonq raeuz ndaemnaz,

Ra cik caiq ra conq,

Hong vunzlai doxgyonj,

Rau conq aeu goengfaen.

Sai:

Seizneix raeuz ndaemnaz,

Mbouj ra cik ra conq,

Danhfanz ukgyaeuj fonj,

Onj ndaem couh onj sou.

Mbwk:

Ndaemnaz aeu cik rau,

Lumj duz gyumqgyau raih,

Fajfwngz ndaem mbouj vaiq,

Raih aeu ndaem geij ngoenz.

Sai:

Seiz ndaemnaz le ndek（vut）,

Haeux cix dek dauq byai,

Bibi haeux baenz lai,

Gai mbouj liux fat mod.

Mbwk:

Seizgonq raeuz ndaemnaz,

Lij aeu daz diuz sienq,

Daengngoenz hwnj geij ciengh,

Daz sienq hix caengz baenz.

Sai:

Seizneix raeuz ndaemnaz,

Mbouj ra maz daz sienq,

Boux cawj byaek caengz bienh,

Baenqcienq dauq daengz ranz.

Mbwk:

Seizgonq raeuz ndaemnaz,

Gen ga haenqdingding,

Gyaeuj ngaem lumj ndungjndingq,

Yaek ce mingh ndaw naz.

Sai:

Seizneix raeuz ndaemnaz,

Laep da hix ndaej ndek(vut),

Gen ga baenqvetvet,

Mbouj begfeiq goengrengz.

Mbwk:

Seizgonq ndaemnaz numq,

Gumq sienq bae coh mbwn,

Ronghndwen hwnj daengz gwnz,

Ndwn gyangnaz daengz haemh.

Sai:

Seizneix raeuz ndaemnaz,

Laep da cix ndaej raih,

Gihgai ndaem ndaej vaiq,

Saedcaih ndaej soeng rengz.

Mbwk:

Fwngz ndeu mbek go’gyaj,

Faj ndeu cix daeuxhoq,

Hwet gaeuz bae’ngo’ngo,

Lumj gyaeujhoq yaek bod.

Sai:

Seizneix hwet mbouj gaeuz,

Raeuz caiq mbouj daeuxhoq,

Mbouj dwg lumj ciuhboh,

Daeuxhoq cij ndaemnaz.

Mbwk:

Ngoenz ndaem ndaej naj naz,

Song da dotngaeungaeu,

Daengngoenz ciuq roengzdaeuj,

Gyaeujngunh lumj yaek dai.

（1）