Bonjbauq siusik （gicej Cau Dwzfeih）6 nyied 28 hauh, Swcigih Minzcunghveij、Swcigih Dijyuzgiz youq Nanzningz Si hai hoih doicaenh Gvangjsih bwhhoenx gaiq daih- cibngeih aen yindungvei dijyuz cienzdoengj siujsoq minzcuz daengx guek （lajneix cwngguh gaiq daih- cibngeih aen yindungvei minzcuz daengx guek）. Aen hoih cienzdaengz hagsib le gij cingsaenz hoihcouzbi baez yindungvei neix, gangj geizgonq Gvangjsih guh le gijmaz hong、guh ndaej baenzlawz yiengh, caiq baijbouh hong baezlaeng. Boux dangjcuj suhgi、boux cujyin Swcigih Minzcunghveij Lij Cinlinz, boux dangjcuj cwngzyenz、boux fugizcangj、yizgiz sinzsiyenz Swcigih Dijyuzgiz Luz Yivwnz camgya aen hoih caemhcaiq gangjvah.

Aen hoih yinxok, cujciz camgya aen yindungvei daengx guek gvancez guhsaed le gij swhsiengj youqgaenj gvendaengz gyagiengz caeuq gaijndei hong minzcuz Siz Ginbingz cungj- suhgi, doicaenh hwnqguh aen gih guhyiengh couqmaenh gij eiqsik caezcaemh Cunghvaz Minzcuz, coicaenh hwngfat saehnieb daengx biengz lienh ndang. Aeu haeujlaeg roxnyinh daengz gij cwngci iugouz yunghcawq caeuq yiyi youqgaenj camgya doxdax, rox daengz camgya doxdax dwg sawjmingh, yaek dawzrap、cagaenj guh. Yaek ciuq gij iugouz couqmaenh gij eiqsik caezcaemh Cunghvaz Minzcuz bae guhhong, camgya doxdax cix ndaej coicaenh gak minzcuz “samgyau”, cauxbaenz aen ranzmbanj cingsaenz caezmiz Cunghvaz Minzcuz. Yaek baengh baez hoih neix, langhbaij gij cingzcik baenz mboengqneix Gvangjsih hwnq- guh aen gih guhyiengh couqmaenh gij eiqsik caezcaemh Cunghvaz Minzcuz, yienh’ok vunzlai gak minz- cuz youq seizdaih moq miz aendangj dazyinx, caez hwnq ranzmbanj gyaeundei、caez cauh ngoenzcog ndei raeuh.

Aen hoih daegbied gangjnaeuz, aen yindungvei neix mbouj daengz haj ndwen couh haimuq, gak aen danhvei、gak aen doih aeu nyinhcaen cujciz、gaenxmaenx bwhhoenx, aeu biucinj ceiq sang、iugouz ceiq yiemz、fuengfap ceiq mizyauq bae sonlienh, roengz- rengz saedyienh aen muzbyauh“cingzcik doxdax caeuq cingsaenz vwnzmingz song sou lai”.