6 nyied 28 hauh, 2024 nienz ciengz nduj Nanzningz Si aen gungh- cwngz vwnzva leih bouxminz vih bouxminz guh saedsaeh hanghmoeg “soengq heiq roengz mbanj” youq Hinghningz Gih Sanhdangz Cin Veizcunh Cunh banh, aen dem aen cezmuz ndeiyawj hawj dangciengz bouxyawj bekfwngz angq hemq, daengx ciengz nauhyied raixcaix.

Baez yienj heiq neix youz Nanzningz Si Yinzminz Cwngfuj cawj- banh, Nanzningz Si Vwnzva Gvangj- den Caeuq Lijyouzgiz ciepbanh, hozdung senj le 12 aen cezmuz ndeiyawj bae yienj, miz go foux、heiq、 roq gyong roq laz caeuq siujbinj daengj. “Soengq heiq roengz mbanj” hozdung mboujdan ndaej hawj ndwenngoenz vunzlai lajmbanj hoenghhwd, lij yungh cungj hingzsik neix daiqdoengh vwnzyi vunzlai lajmbanj hwngfat, hawj gyoengqvunz haenhndei.

Hozdung cungqgyang lij guh camdap ndaej ciengj dem, daezmoeg miz couqmaenh gij eiqsik caezcaemh Cunghvaz Minzcuz、sevei cujyi hwz- sinh gyacizgvanh、Nanzningz seuq- cengh、lajmbanj saenqhwng、baujhoh lwgnyez caengz hung daengj fueng- mienh, cungfaen fatok “soengq heiq roengz mbanj” senhconz goeng’yauq caeuq cozyung.

Bineix, Nanzningz Si yaek laeb- daeb comz aen doih yienjheiq bae gak yanghcin、hagdangz、dieg gaicawx hoengh、segih、giyez、dieghong caeuq gingjgih, guh 400 ciengz “soengq heiq roengz mbanj”、129 ciengz “soengq heiq haeuj hag” caeuq 25 ciengz“heiq ciuhgeq、heiq ndei haeuj gauhyau”hozdung yienjheiq vwnzva leih bouxminz, hawj gyoengqvunz ndwen- ngoenz lai yinx.

（Moz Lanzyenj）