Seiq nyied cobet “Ciet Duzvaiz” vunzlai gangjgangj riuriu, sing cienz youq ndaw lueg iqet neix, lumj raemxmok sanq mbouj bae, daxmeh swiq cingh aen rekdiet hung、swxduk ndaw ranzdajcawj gyuek faenx haenx. Naeuz dwg yaek daengz Ngux Nyied Co’ngux, ndaw ranz rog ranz cungj yaek baet seuq bae, daengz seiz le dumq rek faengxdaeuh ndeu, baenz- neix cij engq hawj vunz sim’angq ne.

Dingq daengz gij vah neix, gou lumjnaeuz yawjraen baenz caz baenz caz rongfaengx yot raez maj sang, dingqnyi rek faengx homswdswd ndeu goenjhuhu, caeuq nyouq daengz gij heiqrang mbawrong caeuq ganj rienghaeux.

Doiq gou daeuj gangj, ngeix daengz Ngux Nyied Co’ngux, engq lai dwg ngeix daengz ngaeuz baihlaeng boux vunz ndeu、 gyoengq vunz ndeu、goengq bya mwncup ndeu, gyoengq beixnuengx ranzmbanj ciuhvunz ngoenznaengz youq ndaw bya simhai najyungz、youq ndaw mbanj cwxcaih youqlag.

Siujmuenx gvaqlaeng, gova go- nywj mwncum rangfwt. Miz vunz daengngoenz caengz ok couh hwnq- daeuj, ranz yied daeuj yied rongh, coemh gaem fiengz ndeu, hoenz mbinmiegmieg ndit hainduj ronghsag, daeuh baenz dong yiengq coh daengngoenz, nyengq roengzdaeuj, seizhah bya heu raemx saw haenx daeuj daengz lo.

Lwgfeiz riengz goengq bya baihsae doek roengzdaeuj, raemx- daeuh daj baengzsa maedsaed lae roengzdaeuj, cimq gij haeuxcid ndaw buenz luenzlu raengnwng. Raemx dwg raemxgoenj, daeuh dwg daeuh fiengz. Raemxdaeuh caeuq haeuxcid dox- yungz seiz, fwi swng hwnjdaeuj, nyinh aen ndang gou dumz lo.

Daxmeh riuj aen swx byaij okbae, gwnz hwet raek aen loengzcax ndeu, faglienz doxbungq yiengjgyatgyat sing riengz de itloh cienz bae. Dou byaij daengz gwnz ndoi diegsang, youh riengz ndoengcuk roengz laj lingq bae, ginggvaq cib leix vahaeux、ginggvaq giuzfaex、ndoenggyoij, riengz henz mieng byaij coh baihbaek, doeklaeng byaij haeuj ndaw caz rongfaengx bae. Youq gwnz roen neix, gou dingqnyi sing duzgoep diuqyetyet saet roengz ndaw naz, hix siengj gwn makseq baenz naed baenz naed deihyaen- yaen hoengyenyen venj youq gwnz gomakseq.

Byaij daengz dieg, rongfaengx heuswdswd youq dangqnaj gou, mbawmbaw maj coh baihgwnz, hohhoh daengjvidvid, baenz caz baenz caz sang miz saek mij youq henz nienjraemx, mbaw rongfaengx hung lumj fajfwngz sohnengneng、heu- seuseu, youq gwnz diegnamh maj bae yawj mbouj raen henz. Gou caeuq daxmeh couh byaij youq ndaw caz rongfaengx, genjaeu mbawrong hung doxlumj、saek yiengh ndeiyawj, gwnz- gyaeuj ndit ronghgywggywg, henzrwz raemx laesasa, dauqcawq caemrwgrwg. Yaepyet, ndaw swxduk mbawrong couh doxdaeb rimrwdrwd lo.

Dou riengz loh gaeuq dauqma, byaij youq henz diuz mieng gaebgeb ngamq ndaej cuengq song faj din, yamq bae riengjret, lumjnaeuz byaij youq gwnz roen gvangqlangh bingz- bwd nei. Bae seiz raen roen hoj byaij, dauqma sim’angq najhai. Haeuxcid gaenq youq ndaw raemxdaeuh ndongqndikndik, suek faengx yaek yungh daengz duhhau、duhbenj, daxmeh gaenq baez yiengh baez yiengh coq haeuj ndaw rek bae aeu feiziq saz, gou hen youq baksaeuq yawj feiz, daxmeh guhmuengz dawz aen nyaqgve ndeu, youh bae daengz henzdah swiq mbawrong lo. Nyaqgve dwg aeu lwggve ndaw ranz gag ndaem daeuj guh, caj lwggve cug、naenggve bienq henj, baihndaw ro geq liux mbaet bae, aeu nohgve、ngveih, aeu ngveih daeuj guh cehgve, nohgve cix aeu daeuj guh gaiq swiq vanj swiq rek. Youq ndaw swyenz, mboujdan miz lwgduh、haeuxgok doengh gijneix aeu naed ngveih baihndaw hawj raeuz gwn yungh, lij miz aen lwggve yienghneix geq liux, bang raeuz baet cingh namhfaenx. Gyoengq beix- nuengx ranzmbanj youq Minzdung Cunh haenx, cingq baengh dongh gova go’nywj ndoengfaex neix raeuj ndang、ganqciengx, menhmenh majhung.

Haeuxcid gaenq dauqcungz swiq cingh, youq ndaw swxduk ndik raemx hawq, noh、duhhau、duhbenj gak cungj liuh ndei hix bwh caezcup. Cawzliux noh heh baenz gaiq seiq fueng, daxmeh youq ndaw batlij dawz doengh gij lwgduh loq cug neix caeuq haeuxcid doxgyaux, coq di gyu ndeu, gyaux yinz bae. Gwnz batlij saek- hoengz、 saekhau、 saekheu、 saekhenj doxciuq doxingj, singjsien yienhda. Cungj batlij vava loegloeg coux doxgaiq neix henz mbanj ca mbouj lai ranzranz cungj bwh miz, gij va singjsien neix gangj ok gij maq- muengh vunzlai, muengh ndwen- ngoenz coglaeng gyaeundei vuen- yungz.

Doeklaeng, daxmeh youh aeu aen ndoengj daezgonq swiq cingh haenx daeuj, gig suglienh dawz aen batlij、aen vanj iq cang noh、ganj riengz- haeux、mbawrong ndik raemx hawq baez yiengh baez yiengh cuengq hwnjbae. Daxmeh naeuz, cungj baij youq ndaw ndoengj luenz, suek faengx seiz yungh daengz couh fuengbienh, hix ndaej coux gij haeuxcid mbouj siujsim doek okdaeuj haenx, mbouj vaih haeux.《Seiging Daihdoeng》naeuz: “Bojsingh baihnamz, mbouj ndaej vad raemz, doujsingh baihbaek, mbouj ndaej daek laeuj.” Ndaw sei “boj” “douj” cungj dwg gij coh singhco ciuhgeq, yienzbonj eiqsei dwg aendajcaeng. Aen ndoengj luenz daxmeh yungh haenx cix dwg yiengh doxgaiq mizok haemh moq, bingz- ciengz, daxmeh aeu daeuj raeng haeux vad raemz, dak byaek rengj、lauxbaeg rengj doengh gijneix, aenndoengj yunghcawq lai raeuh, geq mbouj rox liux.

Yienghyiengh bwh ndei le, daxmeh vaiqvit yot ok song mbaw rongfaengx, baihlaeng mbawrong dox- gap, daeb baenz aenlaeuh sam gak, sien cang dingznoix haeuxcid caeuq lwgduh, coq gaiq noh seiq gak iq ndeu, caiq dienz rim dieghoengq rongfaengx. Daxmeh daeb mbawrong geij baez le, ganj riengzhaeux heux geij gien, aen faengx yiengh sam limqcuenq couh suek baenz lo. Baezbaez daxmeh song fwngz suglienh suek faengx, gou cijaeu youq ranz, couh itdingh youq henz ciuq hag riengz guh. Hoeng baenzlai bi lo, mboujguenj gou hag geijlai baez, mboujguenj daxmeh baenzlawz naih- sim son gou gujli gou, gou baez ndeu ceiq lai cij ndaej suek baenz saek aen song aen faengx. Baenzneix, gou cijndei youq henz bang raed mbaw- rong、ganj riengzhaeux laiyawz haenx, youq aen rekdiet hung baihlaj gya fwnz dumq faengx.

Gaenq daengz banringz, seiqhenz yaepyet bienq caemrikrik. Gwnz gosamoeg bakdou ranz saek seiz miz geij sing bid ciuz cienz daeuj, ndoengcuk haenzdah ngauzngednged, fwnz ndaw saeuq dekbyanbyan, caeuq daxmeh daek haeuxcid aensieg ngad batlij yiengjgvatgvat……Gou rox, neix dwg gij sing aen mbanj gag miz, gij sing angqyangz neix dwg gyoengq beixnuengx ranzmbanj aeu ndoeng- faex、gohaeux dajndaem dajciengx cij vuenh ndaej. Doenghgo doenghduz dinghdingh majhung, hix ndaej hoenghhwd swyouz youq ndaw mbanj cuengq sing ciengq go.

Aenfaengx cimq youq ndaw raemxgoenj, dumq ndaej sam seiq diemj cung, gij heiqrang mbawrong senq iemq haeuj ndaw faengx bae. Raemxlae、raemxraiz、nywjfaex、gohaeux, doengh gijneix gyoengq vunzmbanj ngoenznaengz yawj gvenq haenx, deng mbawrong duk maenh- mwd, ndawde duk miz gij vahdaengq bohmeh, duk miz Cunghvaz geij cien bi vwnzva gihyinh, caez haeuj daengz ndaw dungx raeuz, lae youq ndaw ndang raeuz.

Raemx goenjbwdbwd, gou raen gij raemx goenj ndaw rekdiet hai ok duj dem duj va hau hungloet. Varaemx hai baenz duj baenz duj, ndatfoegfoeg muenx aen dem aen faengx, youh sanq bae. Daengz Ngux Nyied Co’ngux lo, youq gizneix dauqcawq dwg heiq faengx rangfwtfwt, gou dingqnyi aen ndang gou laeglemx maj ok saekheu, lumj baenz nyup baenz nyup rongfaengx henz nienjraemx neix.