Gangj daengz goeng Laujliuz, daihgya cungj rox de dwg boux gig cingdoeng deihleix Laujgaih, guh deihleix geij cib bi, de hix vih haujlai vunz ra ndaej diegbauj, dwg boux canghyawjdieg mizmingz haenx, vunz gig gingq de.

Yienghneix, gou cingj Laujliuz daeuj daengz ranz gou, gou naeuz:“Laujliuz, mazfanz mwngz bang gou mbat ndeu, leihyungh saenfaenh daegbied caeuq deihleix caizhag mwngz, bae gangjfug ginzcung, lauheiq gyoengqde saenq mwngz, gou dak mwngz la! ”

Laujliuz naeuz:“Senj moh dwg gienh saeh ceiq hojguh ndeu, gou lijgaij mwngz. Gizsaed, lajmbwn gizlawz miz gijmaz deihleix diegbauj? Cij mboujgvaq dwg gyoengqvunz daiq maez- saenq, yungh maezsaenq daeuj dak sim gyoengqde, gingqcungh sim’eiq gyoengqde. Ndei ba, gou couh sawq baez ndeu ba! ” Gou dingq gij vah de le, couh lumj gaemdawz geu fiengz gouqmingh nei, gaem fwngz de ndaetndaet bae.

De naeuz:“Ngoenzcog mwngz ciu gyoengq cawjranz bae diegmoh, gou bae yienhciengz gangjgangj. ”

Ngoenz daihngeih, gou caeuq Liuz cujcangj daiqlingx gyoengq ginzcung Laujgaih bae nyinh moh, Laujliuz hix bae lo, de daenj mauhnyangj, aemq daeh ndaem, ndaw daeh cang miz lozbuenz caeuq geij bonj saw deihleix. De youq dangqnaj daihgya naeuz:“Gak boux beixnuengx, aen mohcoj raeuz youq gizneix deihleix gig ndei, sou yawj, swix cinghlungz, gvaz begguk, cinghlungz goemq begguk, daihdaih ok vwnzvuj. Dangh- naeuz baezlaeng roengauhsuz gvaq gwnz mohcoj raeuz, loh ok camhsoufeiq youh gvaq laj mohcoj raeuz, deihleix deng buqvaih, couh mbouj dwg baujdieg lo, ngaeugih baez vat, gvej goenq diuz meglungz, cojcoeng couh youq mbouj roengz lo. Seizneix sou mbouj dwg mbouj rox gij cwngcwz guekgya, guekgya yaek aeu dieg, raeuz wnggai haenqrengz cihciz. Vihliux baujhoh ndei coj- coeng raeuz, mboujyawx seizneix daihgya swngz roengauhsuz lij caengz doenghgoeng, vaiqdi senj aen moh okbae ba……” Vunzlai baez dingq, caiq yawjyawj Laujliuz vix diuz roengauhsuz gvaq gizlawz gizlawz, gyoengqde lumj rox gijmaz nei.

Gvaq geij ngoenz le, Laujliuz caeuq vunz- ranz daiqdaeuz senj song aen moh laeng de okdaeuj lo. Ciuq yauhgiuz, gou caeuq Liuz cujcangj aeu bae yienhciengz daenghgeiq dwg gijmaz mingzcoh、ngoenz lawz senj moh、miz mbouj miz sigbei caeuq ingjsiengq daengj. Dou daeuj daengz giz moh Laujliuz, gyoengqde gaenq vat bae dingzlai, loh’ok aen biengxgim goengcoj lo.

Mwh Laujliuz song fwngz got hwnj aen biengxgim goengcoj, song coij raemxda de lae roengzdaeuj, ndaw bak nam naeuz:“Mehlaux, doiq mbouj gvaq ha, roengauhsuz couh gvaq gizneix lo, vihliux lwglan daihlaeng vuenyungz, dou senj mwngz daengz giz dieg wnq bae, yienzliengh gou guh lwg mbouj ndei……” Gou caeuq cujcangj ngawh youq henz, gangj mbouj ok vah.

Daihgya raen Laujliuz daiqdaeuz senj moh lo, caemhcaiq dou guh haujlai swhsiengj gunghcoz, gyoengqvunz Mbanjlaujgaih laebdaeb senj moh okbae. Duenh seizgan haenx, gou ca mbouj geijlai ngoenz cungj mbouj ndaej youq saek di, ngoenzngoenz caeuq vunzmbanj hwnj bya bae senj moh.

12 nyied dienheiq miz di nit lo, gou caeuq cujcangj moix haet cungj hwnq ndaej gig caeux, dou daenj buh na, daenj haizgaijfang buenq gaeuq buenq moq, caij gvaq raemxraiz, byaij gvaq ndaw oen, con gvaq diegmoh laep- yaemyaem.

Mwhhaenx, youq giz lingq moix aen moh, caeuxcaeux couh yawjraen aen bungzciengq ndeu laeb youq gwnz moh, gyoengqde coemh feiz coi nit, diemj yieng rangfwtfwt, hoenzfeiz ngeungeu daj ndaw bungzciengq biu okdaeuj. Gou rox, gyoengqde dwg ganj seizndei haiguh. Dou daeuj daengz seiz, gyoengqde gaenq bwh ndei lo. Gou ingjsiengq aen moh le, couh heuh gyoengqde vat lo. Gyoengqde naj bienq caemrwg, loq yiengh eiqsei dou mbon cojcoeng hwnj.

Senj moh buenq bi gvaqbae, gou raen boux vunzdai mbouj daengz song bi ndeu, gyoengqde hai faex seiz, raen gij buhvaq lij caengz naeuh liux, mumjgyumq yawjraen gyaq ndokhau dinghdingh ninz youq ndaw faex. Aen sim gou dwglau yaep ndeu, caiq mbouj ndaej yawj lai saek mbat. Haemhhaenx, gou guh aen fangzhwnz yakrwix ndeu, loq raen gyaq ndok haenx bienqbaenz geu hoenzheu ndeu, yaeng’yaeng bienqbaenz boux vunz ndeu yaeng’yaeng byaij daeuj coh gou……Yienzhaeuh gou deuz lo, gwnz gyaeuj gou raemxhanh mbaeqmbatmbat. Gyang- haet, gou doiq mehyah gangjriu naeuz:“Haemhlwenz gou raen fangz lo.” Mehyah naeuz:“Mwngz mbouj guh sat gij hong neix mwngz cij raen fangz!” Gou coh mehyah gingq aen laex ndeu naeuz:“Baujcwng guhliux gij saeh gou!” Yah bongx fwngz gou, riu dwk bae cawj ngaizromh hawj gou lo.

Cigdaengz 12 nyied 20 hauh, Nazlauz Cin betcib aen moh haenx cienzbouh senj deuz lo. Youq senj moh song ndwen ndawde, miz vunz gae gou, miz vunz riu gou, miz vunz ndaq gou.

2020 nienz 3 nyied, Denzsih Gauhsuz Goengloh cingqsik haigoeng, diuz roengauhsuz raez 198.6 goengleix neix, daj Denzlinz Lucwngz hainduj, itcig iet daengz Sihlinz Yen Bazdahoz Cin. Mbouj daengz bi ndeu, aen vunq dietloh gauhsuz couh yienh youq dangqnaj gyoengq- vunz. Mienhdoiq diuz gauhsuz goengloh neix, gou roxnyinh danqheiq fanh cien, danghnaeuz diuz roengauhsuz neix daezgonq coih daeuj, ciuhvunz gou hix mbouj miz baenzlai hojsik, daxmeh gou hix mboujyungh dai da mbouj laep.

Haenx dwg 2019 nienz 4 nyied 19 hauh, ngoenzhaenx gou lumj bingzciengz ityiengh hwnjban. Haet de cib’it diemj cibngeih faen, gou ciep denva daegnuengx youq ranzcoj Bingzgoj dwk daeuj naeuz daxmeh bingh gyanaek couh yaek mbouj baenz, heuh gou sikhaek ma ranzcoj. Gou doeksaet yat, sikhaek buet ok ranz- banhgoeng, caeuq mehyah dap aen banci Sihlinz daengz Bwzswz haenx ma ranz. Hoeng mwhhaenx mbouj miz gauhsuz goengloh, cijndaej byaij ngeihgaep goengloh, daj Sihlinz daengz Bingzgoj, miz 384 goengleix, aeu caet aen cung cij daengz. Banci byaijbyaij dingzdingz, daj banringz cibngeih diemj daengz lajbyonghngoenz seiq diemj cij daengz Bwzswz. Itloh, nuengxbawx denva daeuj naeuz lai baez, daxmeh cingq caj gou raen mbat naj ndeu, heuh gou caenhvaiq ganj baema. Youq ndaw denva, gou baez dem baez daengq daxmeh nyaenxnyaenx, itdingh caj dou daengz ranz ha! Daxmeh cij caj daengz lajbyonghngoenz seiq diemj, couh dingj mbouj ndaej lo, gaendwk de da mbouj laep cix bae lo.

Seizhaenx dou ngamq daengz Bwzswz, daegnuengx denva daeuj naeuz, gou gaenq raemxda rim naj. Dauq daengz ranz, gou cien hemq fanh heuh, boemz youq gwnz ndang daxmeh raemxda daej hawq liux, conghhoz hix hep lo. Gij seihaiz daxmeh genggyaengj ninz youq gwnz mbonq, lwgda cungj cengq hwnj gwnz mbwn bae, aen naj saekaeuj de yienh ok gij yienghsiengq haemzhoj haenx. Gou caeuq mehyah fwngz saenzdidi yaeng’yaeng rub aen da daxmeh laep hwnjdaeuj. Seizhaenx gou caen ndaenq diuz “loh” neix, danghnaeuz mwhhaenx Sihlinz doeng gauhsuz goengloh, song aen cung couh ndaej daj Nazlauz bae daengz Bwzswz, yienzhaeuh youq Bwzswz naengh dungceh seiqcib faencung couh bae daengz ranzcoj Bingzgoj, gou couh ndaej raen naj daxmeh, hawj daxmeh ninz youq ndaw rungj gou gvaqseiq.

Seizneix, Denzsih Gauhsuz Goengloh doeng ci lo, daxmeh hix mbouj youq lo. Ngeix daengz duenh saedceij senj moh caeuq gij saeh hoenzyaem baedauq seiz, gou lij dauqsiengj mbouj dingz.

Duenhneix, caiq fan bonj bitgeiq senj moh seiz, cij raen geiq miz Nazlauz Cunh Mbanj- laujgaih senj moh ceiq lai dwg ranz Veiz Denhyung, gungh senj ok cibngeih aen moh. Vihliux hawj bonj saw《Sih Damwnz》geiq- niemh duenh lizsij Denzsih Gauhsuz Goengloh gensez neix, gou bae caijfangj le Veiz Denh- yung.

Veiz Denhyung naeuz:“Senj moh doiq gou daeuj gangj dwg gienh saeh iq ndeu, guh roengauhsuz cij dwg gienh daihsaeh daih’it, danghnaeuz raeuz aenvih leih’ik swhgeij git hong gauhsuz goengloh, raeuz couh doiq mbouj hwnj guekgya caeuq yinzminz. Gangj coenz vah saedcaih, aen moh raeuz senj okbae haenx, seizneix gyoengq cojcoeng raen ci baedauq, raeuz guh maz baenz maz, bouxboux fouqmiz vuenyungz, gyoengqde youq ndawyaem hix roxnyinh vuenheij caeuq miznaj.”

Youq gwnz roen caijfangj, gou yaeng’yaeng siengj gij vah Veiz Denhyung, lumj yawjraen daxmeh hix sim’onj dwk doiq gou riu lo.

（2 sat）