“Iq ya, hwnq gwn mienh lo.”

Moix baez daengz ngoenzseng gou, gij sing daxmeh unqswnh youh ndeidingq couh daj ranz- dajcawj cienz haeuj ndaw rug gou daeuj.

Cin bae cou dauq, baez yaep da gvaqbae, youh daengz ngoenzseng gou lo. Gij sing daxmeh youh caiq yiengj hwnjdaeuj, de doq byaij haeuj rug gou doq naeuz:“Hwnq gwn mienh vaiqdi, cawj baenz gvaq.”

Moix baez dingqnyi gij sing neix gou couh ruxrez hwnq, okbae gwn duix mienh daxmeh cuengq youq gwnz congz haenx.

Geiq ndaej mwhnduj, daxmeh cawj mienh hawj gou cungj mbouj miz gyaeq ne. Miz ngoenz ndeu, gou naemj yoeg daxmeh cawj duix mienh gyaeq he hawj gou. Gou naemj bae ngeix dauq, sawqmwh naemj daengz gaxgonq lauxsae hwnjdangz seiz dwen daengz mienh, hix dwen daengz gyaeq. Aen siengjfap ndeu youq ukgyaeuj gou nyoenx okdaeuj lo.

Gou naeuz daxmeh:“Meh, lauxsae dou naeuz, boux lwgnyez gvaq ngoenzseng le, itdingh aeu gwn mienh caeuq gyaeq bw, aenvih mienhdiuz daibyauj souhgyaeu, gwn le mingh couh lumj mienh nei raezrangrang lo.”

Couh yienghneix, moix bi ngoenzseng gou, duix mienh baihndaw miz aen gyaeq ndeu, miz byaekheu, lij miz geij gaiq nohmou dem.

Byaij daengz ranzding, gij feihdauh mienh gyaeq biu haeuj ndaeng daeuj, rangrwgrwg, hawj vunz myaizrih.

Gou cingq meihfwdfwd dwk gwn mienh, sawqmwh siengj hwnj Dahfangh.

Dahfangh dwg dahsau ranznden gou, bohmeh de daj de lij iq couh ok rog bae dajhong, bi daengz haemh cij ndaej dauq ranz baez song baez. Dahfangh caeuq daxbuz de doxing doxbaengh youq ranzcoj. Ngoenzlwenz dou guhdoih bae youz, de naeuz:“Dahyingh, ngoenzcog dwg ngoenzseng gou lo, gou caen muengh daxmeh gou ndaej ma ranz yawj gou, engq muengh de lumj meh mwngz nei ndaej cawj duix mienh ndeu hawj gou gwn a.”

Naemj daengz neix gou cuengq dawh roengz- daeuj lo.

Seizneix duix mienh cuengq youq gwnz daiz, mbouj dwg gou caen mbouj naemj gwn, dwg ngeix daengz gij vah Dahfangh, naemj daengz gou caeuq de doengz ngoenz ndeu doekseng. Yawj gou, ninz hwnq couh miz gwn. Hoeng Dahfangh aeu swhgeij cawj haeux cawj byaek, lij aeu ciuqgoq daxbuz de dem, gig hojlienz.

Naemj yienghneix, gou gaem duix mienh byaij bae coh ranz Dahfangh.

“Dahfangh, vaiq daeuj, gwn mienh ngoenzseng lo.” Gou doq byaij haeuj ranz de bae doq heuh.

“Yo, mwngz youq gizlawz aeu ndaej duix mienh neix ne, lij miz gyaeq dem bw!” Dahfangh angqfofo cam gou.

“Ngoenzneix hix dwg ngoenzseng gou bw, raeuz doengz ngoenz doekseng, daxmeh gou cawj mienh hawj raeuz gwn le.” Gou dawz duix mienh ndenq haeuj gyang fwngz Dahfangh bae.

Caj Dahfangh gwn imq gou cij ma ranz, gou yamq din haeuj bakdou seiz, raen gwnz daiz lij miz duix mienh ndeu. Gou doeksaet yat, sawqmwh daxmeh youq ndaw ranzdajcawj byaij okdaeuj, naeuz:“Duix mienh ngoenzseng mwngz cawj baenz lo, gwn vaiqdi.”

Gij vah daxmeh gig unqswnh.

“Meh! Gou……”

“Lwg gou maj hung lo, roxsoq youh hauqswnh, meh gig haisim ne. Daj bi moq hwnj, gou bibi cawj mienh hawj sou song boux.” Daxmeh riuhehe caeuq gou gangj, doq gangj fajfwngz de doq rub naj gou.

Haujlai bi gvaqbae, gou cungj mbouj gamj caeuq daxmeh gangj, gij vah gaxgonq dwg gou luenh gangj bae yoeg de.

Seizgonq gwndaenj hoj, miz mienh gwn hix mbouj loek lo, bae lawz ndaej gwn gyaeq gwn noh dem.

Seizneix gvaq ndaej ndei, bouxboux gwn imq daenj raeuj. Ngoenzseng hix mbouj caiq miz vunz cawj mienh gwn lo, bouxboux cawx dangauh, ranzranz gaj bit gaj gaeq gwn.

Hoeng moix baez ngoenzseng gou, gou cungj lij ngeix daengz duix mienh gyaeq daxmeh cawj.

“Iq ya, hwnq gwn mienh lo.” Coenz vah daxmeh unqswnh youh ndeidingq cungj lumj youq henz rwz gou heuxgeuj.