第九期

原文：当夜五更时候，船已近曹操水寨。孔明教把船只头西尾东，一带摆开，就船上擂鼓呐喊。鲁肃惊曰：“倘曹兵齐出，如之奈何?”孔明笑曰：“吾料曹操于重雾中必不敢出。吾等只顾酌酒取乐，待雾散便回。”

却说曹寨中，听得擂鼓呐喊，毛玠、于禁二人慌忙飞报曹操。操传令曰:“重雾迷江，彼军忽至，必有埋伏，切不可轻动。可拨水军弓弩手乱箭射之。”又差人往旱寨内唤张辽、徐晃各带弓弩军三千，火速到江边助射。比及号令到来，毛玠、于禁怕南军抢入水寨，已差弓弩手在寨前放箭；少顷，旱寨内弓弩手亦到，约一万余人，尽皆向江中放箭：箭如雨发。孔明教把船吊回，头东尾西，逼近水寨受箭，一面擂鼓呐喊。待至日高雾散，孔明令收船急回。二十只船两边束草上，排满箭枝。孔明令各船上军士齐声叫曰：“谢丞相箭！”比及曹军寨内报知曹操时，这里船轻水急，已放回二十余里，追之不及。曹操懊悔不已。

却说孔明回船谓鲁肃曰：“每船上箭约五六千矣。不费江东半分之力，已得十万余箭。明日即将来射曹军，却不甚便!”肃曰：“先生真神人也！何以知今日如此大雾?”孔明曰：“为将而不通天文，不识地利，不知奇门，不晓阴阳，不看阵图，不明兵势，是庸才也。亮于三日前已算定今日有大雾，因此敢任三日之限。公瑾教我十日完办，工匠料物，都不应手，将这一件风流罪过，明白要杀我。——我命系于天，公瑾焉能害我哉!”鲁肃拜服。

（节选自《三国演义》第四十六回，人民文学出版社，1979年）

译文：

Byonghhwnz nguxgeng seiz, ruz gaenq gyawj mbanjraemx Cauz Cauh. Gungjmingz heuh vunz hai gyaeuj ruz coh baihdoeng, rieng ruz coh baihsae, guh rangh ndeu, couh youq gwnz ruz roq gyong hemq hwnjdaeuj. Luj Suz doeksaet naeuz:“Danghnaeuz bing Cauz Cauh doengzcaez okdaeuj, raeuz mbouj miz banhfap o?” Gungjmingz riu naeuz:“Gou senq rox Cauz Cauh raen mok naek itdingh mbouj gamj okdaeuj. Raeuz ciuq gwn laeuj guh’angq, caj mok sanq couh dauqma.”

Ndaw mbanj Cauz Cauh, dingqnyi roq gyong vunz hemq, Mauz Gai、Yiz Gin song boux vuengmuengz bauq coh Cauz Cauh. Cauz Cauh roengzlingh naeuz:“Gwnz dah mok naek, vunzdig yaep daengz, dingh miz vunz gaenzgaeq, mbouj ndaej seizbienh okbae. Hawj bang bingraemx yungh naq luenh nyingz gyoengqde couh ndaej.” Youh baij vunz bae ndaw mbanjrengx heuh Cangh Liuz、Ciz Vang gak daiq bouxbing dawz naq sam cien vunz, vaiq daengz henzdah bang nyingz. Hauhlingh daeuj daengz, Mauz Gai、Yiz Gin lau bing baihnamz ciengj haeuj mbanjraemx daeuj, gaenq hawj bouxbing dawz naq youq dangqnaj mbanj nyingz; ngamq gvaq yaep ndeu, gij bing dawznaq ndaw mbanjrengx hix daengz, daih’iek fanh lai vunz, cungj yiengq ndaw dah cuengq naq：Naq lumj fwn doek nei. Gungjmingz heuh diuq ruz doxdauq, gyaeuj coh baihdoeng rieng coh baihsae, gaenhgyawj mbanj- raemx aeu naq, doq roq gyong doq hemq hwnjdaeuj. Caj daengz daengngoenz hwnj sang mok sanq le, Gungjmingz lingh sou ruz gip dauq. Ngeihcib aen ruz song mbiengj, gwnz nya naq rim caez. Gungjmingz minghlingh gij bing gak aen ruz caezsing heuhnaeuz:“Docih gij naq cwngzsieng!” Gij bing ndawde bauq Cauz Cauh rox seiz, ruz mbaeu raemx gip, gaenq hai bae ngeihcib lai leix lo, gyaep de hix mbouj gib. Cauz Cauh doeknaiq linlin.

Gungjmingz ma dauq gwnz ruz doiq Luj Suz naeuz:“Gij naq moix aen ruz daihgaiq haj roek cien diuz lo. Mbouj yungh raeuz buenq faen rengz, gaenq ndaej cib fanh lai diuz naq. Ngoenzcog couh yaek yungh daeuj nyingz gij bing Cauz Cauh, caen bienh!” Luj Suz naeuz:“Sienseng caen dwg vunzsien! Baenzlawz rox ngoenzneix mok hung yienghneix?” Gungjmingz naeuz:“Dang bingdaeuz cix mbouj rox mbwnheiq, mbouj rox deihleix, mbouj rox geiqfap geizheih, mbouj yawj yaemyiengz, mbouj yawj doz, mbouj rox song mbiengj bing dwg baenzlawz, dwg boux bonjsaeh yoq ndeu. Gou youq sam ngoenz gaxgonq gaenq suenq dingh ngoenzneix miz mok hung, ndigah gamj hanh sam ngoenz neix guh ndaej. Gunghginj heuh gou cib ngoenz guh caez, boux guhhong caeuq doxgaiq cungj mbouj hawj doh, dawz gienh saeh neix haih gou famhcoih, mingzbeg yaek gaj gou. ——Diuz mingh gou dwg youq gwnzmbwn, Gunghginj baenzlawz ndaej haih gou ne!” Luj Suz fug caez.

（平果市：滕 滕/Dwngz Dwngz）

Haemhhaenx seiz nguxgeng, doih ruz gaenq depgyawj diegyingz raemx Cauz Cauh. Cuhgoz Lieng heuh gyaeuj ruz yiengq baihsae, rieng ruz coh baihdoeng, vang baenz diuz sienq ndeu, baenz liux heuh bing youq gwnz ruz roq gyong haenqrengz hemq. Baenzneix hawj Luj Suz doeksaet liux, naeuz:“Danghnaeuz gij bing Cauz Cauh gaj okdaeuj baenzlawz guh?” Cuhgoz Lieng riu doiq: “Gou guj Cauz Cauh raen mok hung hauhneix mbouj gamj ok bing. Raeuz mboujguenj de, youq gwnz ruz gwn laeuj guh’angq, caj mok sanq le caiq dauqbae.”

Seizneix, youq ndaw diegyingz Cauz Cauh, lwgfwngh nyi ndaej baihrog sing gyong hungdumdum, Mauz Gai caeuq Yiz Gin song vunz couh buet bae baugau Cauz Cauh. Cauz Cauh cienz roengz minghlingh naeuz: “Gwnz dah laemhmok naek, vunzdig sawqmwh daeuj daengz, bietdingh demq cuengq raeuz, raeuz aeu dinghsim mbouj ndaej luenh doengh. Ndaej heuh gyoengq bouxgungnaq bingraemx yiengq vunzdig luenh nyingz.” De lij baij vunz bae diegrengx heuh Cangh Liuz、Ciz Vang gak daiqlingx sam cien bouxgungnaq, vaiqdi ganj bae henzdah caemh bang nyingz naq. Deq gij minghlingh Cauz Cauh cienz daengz, Mauz Gai caeuq Yiz Gin lau vunzdig baihnamz gaj haeuj diegyingz raemx daeuj, gaenq baij boux- gungnaq youq baihnaj cuengq naq lo. Itgwq, gyoengq bouxgungnaq diegrengx hix daengz, miz baenz fanh lai vunz, cungj nyingz naq bae ndaw dah, diuz naq lai lumj roengz fwn nei. Cuhgoz Lieng heuh gij ruz baenq gvaqdaeuj, hawj gyaeuj ruz yiengq baihdoeng, rieng ruz coh baihsae, depgyawj henz aen diegyingz raemx raeb naq nyingz daeuj, youh caemh heuh gyoengq bing loih gyong ndoiq laz hemqvatvat. Caj mbwn rongh mok sanq, Cuhgoz Lieng minghlingh sikhaek sou ruz riengjvaiq dauqbae. Seizneix, vunzfiengz song henz ngeihcib aen ruz haenx cungj baek rim naq liux. Cuhgoz Lieng minghlingh gij bing gak aen ruz okrengz caez hemq:“Gyo’mbaiq gij naq cwngzsieng!” Mwh deq daengz Cauz Cauh nyi ndaej baugau neix, doih ruz Cuhgoz Lieng gaenq riengz raemx lae haenq hai okbae ngeihcib lai leix, gaenq neb mbouj hwnj lo. Cauz Cauh cij doeknaiq raixcaix.

Doihruz dauqma le, Cuhgoz Lieng caeuq Luj Suz naeuz:“Moix aen ruz cungj baek miz haj roek cien diuz naq. Raeuz mbouj yungh vuengz mwngz okrengz saekdi, couh aeu ndaej cib lai fanh diuz naq. Ngoenzcog aeu de dauq nyingz Cauz Cauh couh ngaih lo!” Luj Suz fug le cam de:“Mwngz caencaen baenz sien ha! Baenzlawz rox ngoenzneix miz mok baenzneix hung ne?” Cuhgoz Lieng naeuz:“Dang bouxdaiq- bing, danghnaeuz mbouj rox yawj mbwnbienq, mbouj rox gizlawz leih raeuz, mbouj rox guhfap, mbouj rox yaemyiengz, mbouj yawj dozhoenx, mbouj liujgaij bingseiq giengz nyieg, couh hoenx mbouj ndaej hingz ne. Gou sam ngoenz gonq gaenq suenq ok ngoenzneix miz mok hung, ndigah gamj dapwngq aen geizhanh sam ngoenz. Couh Yiz heuh gou cib ngoenz banh sat gienh saeh neix, hoeng bouxcangh caeuq doxgaiq cungj mbouj doh, de couhdwg yaek ra giz gyaijbak daeuj gaj gou ne. Mingh gou youz mbwn dingh, Couh Yiz baenzlawz haih ndaej gou ne!” Luj Suz dingq le boiqfug raixcaix.

（云南富宁县：农忠恳/Nungz Cunghgwnj）