2022 nienz 12 nyied 29 hauh, Denzlinz daengz Sihlinz gauhsuz goengloh daengx diuz doeng ci lo, gietsat le gij lizsij Sihlinz Yen mbouj doeng gauhsuz goengloh. Sihlinz Yen cibroek fanh gak cuz yinzminz angqvauvau, ciengq go guh fwen daeuj angqhoh.

Gangj hwnj Denzsih gauhsuz goengloh, gou dwg boux camgya caeuq boux guhcingq ndeu. Bi 2014 youq Nazlauz Cunh vuenhgaiq senjgij ndawde, gou miz fuk baenz Nazlauz Cunh boux donzcihsuh ndeu, daj mwhhaenx hwnj, gou rap hwnj gij hong donz dangj Nazlauz Cunh hix bang ndaw cunh guh gij hong wnq dem.

2019 nienz 9 nyied, youq baez veiyi ndeu ndaejdaengz aen siusik ndei ndeu: Denzlinz daengz Sihlinz gauhsuz goengloh yaek haigoeng lo!

Siusik baez cienz daeuj, ginzcung angqangq diuqdiuq, mwngz bauq gou, gou bauq mwngz. Daengz 10 nyied, Denzsih Gauhsuz Goengloh hong geizgonq hainduj lo, yienghneix, Nazlauz Cin Cwngfuj faen baij ganbu bae gak mbanj ciuhai aen dungyenz daihhoih gauhsuz goengloh cwngdieg caeuq senj moh, yauhgiuz ginzcung aeu yawj bae gyae, mbouj ndaej nguh hong guh roengauhsuz.

Seizhaenx cwngfuj anbaiz gou bae daengz Mbanjlaujgaih fucwz guenjleix senj moh. Miz vunz naeuz, Laujgaih dwg gizdieg cwngfuj dangdieg youq haenx, dungyenz gij vunz gwnz gai miz di sinhoj. Gou buenq saenq buenq ngeiz byaij haeuj Laujgaih bae, dajsuenq sawqsawq yawj.

Haemhhaenx dwg haemh miz ronghndwen he, lohdaeng hix cungj rongh hwnjdaeuj lo, gou caeuq boux fucujyin ndaw mbanj daeuj daengz Laujgaih, cij raen baenzbang vunz youq laj baizfuengrin caj haihoih. Gou caeuq Veiz fucuj- yin naengh roengzdaeuj, gou miz di gaenjcieng, lau yaep he gangj vah loeng roxnaeuz gangj mbouj ndei deng ginzcung riu ndaq, yienghneix gou yungh gen’gvaz doenghdoengh Veiz fucujyin naengh youq henz gou haenx, amqnaeuz hawj de gangj gonq. Veizfu hix doengh coh gou, hawj gou gangj vah gonq. Gou doi mbouj gvaqbae, yienghneix, gou hai bak lo:“Gak boux beix- nuengx, caezgya cungj rox haemhneix hai gijmaz hoih lo, vunz youq ndawrongh mbouj gangj vahlaep, haemhneix haihoih couh dwg roen- gauhsuz yaek gvaq baihlaeng aen mbanj raeuz lo, dou dwg daeuj guh gij hong cwngdieg caeuq senj moh gaxgonq. Guh diuz loh neix doiq raeuz daeuj gangj dwg cien bi nanz bungz, de dwg diuz loh doeng coh seiqgyaiq baihrog ndeu, dwg diuz loh vuenyungz cauhfuk beksingq ndeu……”

Gij vah gou caengz gangj sat, boux ginzcung ndeu sikhaek gatduenh gij vah gou naeuz:“Ngoenzcog couh sikhaek haigoeng lwi?” Yawj gij yienghceij de, dwg gip dwk yawj gij ciengz- mienh haigoeng ha. Gou vad fwngz riu naeuz:“Mbouj miz baenzlai vaiq, haemhneix couh dwg daeuj caeuq daihgya doxyaeng cwngdieg caeuq senj moh gij saehcingz neix, danghnaeuz caezgya cungj boiqhab ndeindei, haigoeng couh vaiq lo! ”

Hoihciengz caemrwgrwg, gaendwk Veizfu couh gangj gij saeh baenzlawz boizbouj hawj daihgya:“Nazraemx moux bouj ndaej 59500 maenz, reihrengx moux bouj 35700 maenz…… Gou yawj gyoengq ginzcung fanjwngq, cungj nyinhnaeuz gyoengqde baez dingqnyi yiengh boizbouj neix couh sikhaek ceng hwnjdaeuj, hoeng gou siengj loek lo, gyoengqde bouxsai miz vunz cit ien bapbap, miz mbangj mbouj gangjvah; miz di mehmbwk siuq haizdemh, miz mbangj siuq va.

Dingh yaep ndeu, bouxcoz Veiz Yizgvei cam:“Roengauhsuz haigoeng le, dou ndaej bae dajgoeng lwi? ” Gij saeh caeuq aen hoih mbouj doxgven neix, caezgya dingq le miz di ndeiriu. Gou naeuz:“Cijaeu haigoeng, gyoengq ginzcung deng cwngdieg haenx ndaej daeuj guh honglingz gonq, daengz mwhhaenx sou couh miz souhaeuj lo. ”

Vunzlai dingq le gig angq, hoeng daihgya lij caengz daezok gij yawjfap cwngdieg. Cujcangj Liuz Lihungz gangj:“Daihgya hix dingqnyi gij cwngdieg boizbouj Veiz fucujyin naeuz haenx, danghnaeuz mbouj miz gijmaz gangj, couh ciuq aen boizbouj neix bae cwngdieg, daengz seizhaenx daihgya gaej nauh.” Yinzda daibyauj Se Caijlenz naeuz:“Guh gauhsuz goengloh doiq raeuz mizleih, baezlaeng gij makgam makdoengj caeuq gij doxgaiq raeuz ndaem ciengx haenx couh ndaej gai okbae, caemhcaiq gyaqcienz ndei. Gou doengzeiq!” Se Caijlenz baenzneix naeuz, vunzlai foenxfoenx yaengx fwngz hwnjdaeuj riengz naeuz doengzeiq, couh yienghneix, gij saeh cwngdieg swnhleih doenggvaq.

Aen saeh daihngeih couh dwg senj moh, gou roxnyinh gienh saeh neix couh miz di hojbanh lo. Gou naeuz:“Gaengawq gij yauhgiuz guh gauhsuz goengloh, danhfanz aen moh youq gwnz sienqhoengz gauhsuz goengloh cwngdieg neix, cungj youq 10 nyied daengz 12 nyied cienzbouh senj deuz, miz sigbei aen 4000 maenz, mbouj miz sigbei aen 3000 maenz, ngoenzcog daihgya gaengawq dozceij yawjyawj aen moh bouxlawz deng senj couh senj okbae. ”

Vah ngamq gangj liux, gyoengqvunz couh miz di luenh, gyoengqde gangjvap, cijcij cetcet, gou siengj gienh saeh neix dwg mbouj ndei “gwn” lo. Gvaq geij faen cung le, Veiz fucujyin heuh gyoengqde dingz roengzdaeuj, miz vunz sikhaek yaengx fwngz naeuz:“Aen mohcoj gou bi’gvaq ngamq cingj deihleix sienseng Swconh daeuj ra dieg ancangq, yungh bae 20000 lai maenz, sou ngamq bouj 4000 maenz, gou mbouj dwg vei dai lo, caemhcaiq deihleix gig nanz gouz. Gou mbouj doengzeiq.” Miz mbangj gangj:“Gij moh sawqmwh deng senj deuz, dou mbouj miz saek di swhsiengj cinjbi, mbouj rox senj daengz gizlawz? ”

……

Haemhhaenx gij saeh senj moh couh yienghneix bouxboux mbouj hab’eiq cix sanq lo.

Ngoenz daihngeih, gou naeuz gij saehcingz veiyi haemhlwenz caeuq cin lingjdauj, cincangj Veiz Denhgyaz loq siengj di naeuz:“Ndei ha, gij saeh neix menhmenh guh, daj ngoenzneix hwnj, mwngz caeuq Mbanjlaujgaih Liuz cujcangj couh fucwz gij saeh Laujgaih senj moh.” Gou gaeugaeu gyaeuj laeng, byaij ok ranzbanhgoeng cinfuj.

Gvaq geij ngoenz le, gou lij nyapnyuk. Baenzlawz cij ndaej dungyenz vunzlai vuenheij bae senj moh ne? Gou gwn mbouj van, ninz mbouj ndaek. Mwh gou ndaenqmbouj rox baenzlawz guh, gou ngeixhwnj goeng Laujliuz boux Mbanjlaujgaih neix. “Leihyungh de, lauheiq caen ndaej doidoengh Laujgaih senj moh.” Gou baenzneix siengj.