6 nyied 6 hauh, Gvangjsih Minzcuz Yenzgiu Cunghsinh ciuhai aen hoih doicaenh hong souyo yijyenz vwnzva siujsoq minzcuz Gvangjsih. Bouxdawzrap gak aen siujcuj goqdaez caeuq cwngzyenz guh gij hong neix, gij vunz mizgven laeng aen danhvei de gungh 20 vunz camgya aen hoih.

Bouxconhgyah gaisau buek sawgauj yijyenz siujsoq minzcuz laeng ndaw《Gij Souyo Yijyenz Vwnzva Cunghgoz》, doengbauq gij sawgauj《Dauq Saw Souyo Yijyenz Vwnzva Siujsoq Minzcuz Gvangjsih》saemjdoeg caeuq gaij ndaej baenzlawz yiengh, ingj、loeg caeuq yenzgiu miz maz daegdiemj daengj. Caemhcaiq daezok yigen dazyinx gyoengqvunz baijbouh biencieng、guh dijli、dinghcinj diuzmoeg、ingj mbawdoz、gejnaeuz neiyungz daengj. Gak aen siujcuj goqdaez lij bauq gyoengqde guh ndaej gijmaz hong, miz maz hojnanz, dwg vih gijmaz, baezlaeng yaek baenzlawz guh.

Aen hoih giengzdiuh, gak cuj aeu gaijndei caeuq guh caez fuengfap、banhfap bae guhhong, maenhsaed daj ndaej giekdaej. Aeu gibseiz roi ndei、faen loih、hauh coh caeuq geiqloeg doengh gij doz caeuq yinhsibinz ra ma haenx. Guhhong daegbied dwg guh gisuz lumjbaenz ingj、raed、bien gij doz caeuq yinhsibinz, aeu ra boux rox guh daeuj bang. Yaek guh vaiqdi, gibseiz guh sat, youh guh ndaej ndei, roengzrengz dajcauh aen hanghmoeg souyo yijyenz vwnzva siujsoq minzcuz Gvangjsih baenz gaiqak.

Daj bi 2021 doxdaeuj, Gvangjsih Minzcuz Yijvwnz Yenzgiu Cunghsinh couh cujciz guh gij hong souyo yijyenz vwnzva siujsoq minzcuz Gvangjsih. Seizneix gaenq guh le 7 aen hanghmoeg: Mauznanzyij Vanzgyangh、Vahcuengh Vujmingz、Menjyij Ginhsiu、Yizyij Lungzlinz、Myauzyij Yungzsuij、Vahcuengh Ningzmingz、Ginghyij Dunghhingh. Doengh aen hanghmoeg neix diucaz soura liux le, yaek cug bi doxgyonj okbanj 《Dauq Saw Souyo Yijyenz Vwnzva Siujsoq Minzcuz Gvangjsih》.

（韦 超/Veiz Cauh）