Gou dwg vunz Bouxcuengh, caeuq sojmiz Bouxcuengh doxdoengz, rox gangj Vahcuengh dwg gienh saeh bingzciengz ndeu. Gou lij iq, gwn- daenj youq ndaw bya, rox gangj coenz vah daih’it couhdwg Vahcuengh. Gou lij caengz bae hagdangz doegsaw gaxgonq geij bi, baeznaengz guhcaemz guh’angq cungj dwg gangj Vahcuengh.

Gou ndaej caet bi lo, aemq aen daehsaw bae hagdangz doegsaw, cij rox lajbiengz lij miz vah wnq dem. Lauxsae son gou doeg Sawgun, caemhcaiq aeu Vahcuengh son gou gij cihmoq roxnaeuz coenz vah dwg maz eiqsei. Gou lij sing hung cam boux Veiz lauxsae:“‘Niux bohboh’hoiz baenz Vahcuengh dwg ‘cwz- bohlungz’ lwi?” Gyoengqnyez ndaw ban couh riuswdswd hwnjdaeuj.

Youq lajmbanj doeg siujyoz bizyez le, gou bae cunghyoz ndaw cin doegsaw, miz doengzhag gwnz haw ndaw cin bingzciengz gangj Vahgun, gou boux ndaw bya ndaw lueg okdaeuj, couh dap mbouj hwnj de saek coenz. De riu naeuz:“Mwngz baihgwnz baihlaj ngongz lailai, Vahgun hix mbouj rox gangj saek coenz.” Gou mbat daih’it roxnyinh cij rox gangj Vahcuengh gingqyienz deng vunz riu.

Daengzlaeng, gou bae Bahmaj aen hagdangz minzcuz swhfan doegsaw. Youq gizde, sojmiz hagseng doeg liux seiq bi bizyez, cungj ndaej faen bae guh lauxsae. Ndigah, gou hag rox ciengq go、diuq foux、sij cih、vehveh daengj gak cungj gak yiengh caizmaeg. Aenvih ngoenzlaeng aeu guh lauxsae, gyoengq hagseng dou, itdingh aeu hag ndei Sawgun gangj ndei Vahbujdungh. Ceiq hawj gou angqyangz couhdwg dou lij ndaej hag Sawcuengh. Sawcuengh dwg gij sawcih Bouxcuengh raeuz. Caiq mbouj miz bouxlawz riu gou gangj Vah- cuengh lo!

Couhcinj rox gangj Vahcuengh hix mbouj suenq lai maz bonjsaeh, rox yungh Sawcuengh daeuj sij saek duenh vah roxnaeuz sij saek bien faenzcieng ngamq suenq maenh’ak. Hoeng gou seizde hag mbouj daengz giz, aeu Sawcuengh sij mbouj ok coenz vah ndeu. Seizhaenx, Cinz Siengzcouh lauxsae son dou hag Sawcuengh. Rox gangj Vahcuengh hawj gou hag Saw- cuengh gig vaiq, beij gyoengq doengz- hag cij rox Vahgun, ceiqnoix doeg Sawcuengh mbouj baenzneix gazgaz gadgad. Cinz lauxsae seizde dwg bouxcoz loeklik ndeu, youq gwnz dangz cawzliux son dou hag Saw- cuengh, hix son dou eu fwen, ndaw dangz heiqfaenh angqvuemvuem. Geijcib bi gvaqbae, gij fwen Cinz lauxsae son dou de, lij lumj ngoenz- gonq ngamqngamq son nei, seizneix gou lij ndaejgeiq:

“Yawjraen dahnuengx byaij gvaq daeuj,

Mbouj sang mbouj daemq boux vunzndei;

Song da ronghruemj lumj ndaundeiq,

Ngangx gyaeuj rongh ndaej gouj diuz gai.

……”

Baenzneix vaiqlangh hwnjdangz, gyoengqdou gig gyaez hag. Seizde, ndaw hagdangz miz mbawsiengq geij boux dahsau gyaeundei ndaej guh aen fungmienh 《Sam Nyied Sam》, gou gig dahoengz gyoengqde, youh gag ngauz gyaeuj gangj gij yienghceij bonjfaenh neix aeu mbouj ndaej dahraix. Yienznaeuz seizde gou ndaej hag Sawcuengh song bi gvaq, hoeng doeklaeng bizyez gou faenboiq daengz lajmbanj dang lauxsae, doeklaeng diuh daengz hagdangz ndaw singz, hoeng song aen hagdangz neix mbouj son hagseng Sawcuengh. Gou hix mbouj miz gihvei lumh Sawcuengh, liz Sawcuengh yied bae yied gyae lo.

Gou bingzciengz mbouj yungh Sawcuengh geijlai, hoeng gou bingz- ciengz caeuq bouxgeq ndaw mbanj gangjgoj lai gangj Vahcuengh. Youq henzndang gou, gyoengq nyez neix haujlai gaenq mbouj rox gangj Vahcuengh lo. Gou ndaw hoz gag ngeix naeuz: It dwg guekgya raeuz youq daengx guek cienzmienh doigvangq Vahbujdungh, gyoengq nyez gaenq gvenq gangj Vahbujdungh lo, densi、soujgih boq maz dingzlai dwg gangj Vahbujdungh; ngeih dwg seiz- neix gyoengq daxboh daxmeh, haujlai hix mbouj rox gangj Vahcuengh geijlai, gyoengq lwgnyez daj seiz iq couh mbouj miz vunz son gangj Vahcuengh. Gou youq hagdangz ndaw singz diucaz gvaq hagseng ndaw ban, aiq miz byongh lai hagseng mbouj rox gangj Vahcuengh, gou sawq yungh Vahcuengh cam gyoengqde geij coenz, haujlai mbouj rox gou gangj maz. Gyoengq hagseng ndaw singz neix, haujlai daj lajmbanj daeuj hwnjdangz le couh menhmenh lumz gangj Vahcuengh lo!

Gou gag ngeix: Aiq miz ngoenz ndeu, gij Vahcuengh raeuz gangj daih dem daih, youq daihlaeng couh menhmenh mbouj gangj, doeklaeng couh deng saetcienz lo. Youq lajmbanj ndaejnyi daxbuz daxgoeng caeuq gyoengq lan gangj gij Vahgun saek ndip saek sug de, yaek riu daej mbouj ndaej. Raeuz daj seiz iq couh rox heuh di doenghgij doihduz lumjbaenz duzbit、duzgaeq、duzma、duzmeuz、duzvaiz、duzcwz daengj, seizneix gangj ok ndaw bak gyoengq nyez daeuj dwg yienghneix——Duzbit dwg “gaga”, duzgaeq dwg “vovo”, duzma dwg “vang’vang”, duzmeuz dwg “meumeu”…… Gyoengq nyez mbouj rox aeu Vahcuengh bae heuh gij coh doihduz neix. Gyoengq nyez mbouj rox gizsaed doenghduz miz gij coh Vahcuengh, mboujdan miz gij coh Vahgun. Hoeng bouxlaux ndawranz naeuz gou:“Mwngz yienghneix siengj couh simyou lailai lo! Gyoengq nyez hag maz mbouj yungzheih, Vah- cuengh ndaej loegyaem ce roengz- daeuj, Sawcuengh youq ndaw saw, lij lau gyoengqde doeklaeng mbouj rox gangj Vahcuengh?”

Gangj ndaej deng, gou couh yawjraen gak cungj sinhvwnz dwen daengz Gvangjsih mizmbangj yienh mizmbangj cin, miz saek aen hagdangz hwnj dangz Sawcuengh. Seizneix ciengzseiz raen baez daengz ngoenz- ciet gizneix gizde baij daiz doxdax eu fwen, miz haujlai daegmbauq dahsau camgya, lij miz di lwgnyez vunz lij daemqdetdet, mbeihung hwnj daiz caeuq bouxhung doxbeij, hai bak eu ndaej goksadsad, eu sat gyoengq- vunz lajdaiz bekfwngz daddad, haenh mbouj dingz.

Vahcuengh dwg vahcoj Boux- cuengh raeuz, aeu lai gangj di Vahcuengh, seizneix gou hix menh- menh dauq yawj di faenzcieng Sawcuengh lo, maqmuengh Vah- cuengh Sawcuengh yied daeuj yied hoenghhwdhwd!