“Mwngz ngoenz youqlaklak, cungj mbouj dawz dangzceh bae cam Dahlienz aeu gawq vah vaiq di dem? Vahsug naeuz: ‘Bak ngoenz bumz fwn cungj miz ngoenz rongh.’ Gaenx byaij cij ndaej baenz bw! ”

“Gaej mboen baenzlai, louz di rengz, mwngz lij lai naihsouh geij bi.”Daegnyieg simnyap doiq mehlaux naeuz.

“Mwngz bakgeng lai, daengz seizlaux gadog, couh ienqhoij mbouj gib bae!”Mehlaux daengx da caengz de mbat ndeu, haep bak mbouj miz heuj haenx, hozgaek dwk muengh coh baih ndoeng mwncupcup gizgyae haenx, mbouj caiq dap vah.

Daegnyieg lij iq seiz, daxboh gvaqseiq caeux, caeuq daxmeh dox- baengh gvaq ndwenngoenz, gwndaenj noix, ndangdaej nyieg lai, vunz ndaw mbanj daj iq cungj heuh de Daegnyieg.

Gangj daengz Dahlienz haenx, de vunz caen mbouj loek, simsoh youh gaenx guh. Vunz maj ndaej sang seuq, naengnoh miz di hoengz, caemhcaiq heuj de cingjcaez ronghsag, baez riu couh lumj Liuz Sanhcej nei gyaeundei.

Gvan de dwg lwggyax, lwgnyez lij caengz gekcij, gvan de couh baenz bingh biek de bae lo. Lai bi doxdaeuj, de mehdog daiq lwg, giengiengz gvaq saedceij, gag ndwnj gij haemzhoj roengz dungx bae, cij muengh ciengx daeglwg baenz vunz.

Ngeih

Ngoenzhaenx haetromh, Dahlienz youh yaek okhong lo.

Rumzcin cifefe, cij raen gij mok hau heuxgeuj bya moengzmoengz loengzloengz, mbouj dingz mbouj duenh. “Mok hwnj mbouj sou, fwn saeq mbouj dingz; mok hwnj couh sou, daengngoenz okdou.”Dahlienz doq byaij doq muengh fwj mok doq gag nambedbed.

Mwh banringz, mehmbwn sou mok hau hwnjbae le, daengngoenz loh naj okdaeuj, seiqlengq ronghsagsag, lwenqda myabmyab.

Ngoenzneix, de langh vaiz haeuj bya, gvej liux song ndoi iengcoengz, lajbyonghngoenz couh bae ra di faexcab, siengj raemj baenz duenh le, gyoeb baenz doi, ngoenzlaeng caiq daeb hwnj aen civaiz, dawz bae ndaw cangj gai, ci ndeu geij bak maenz, ndaej bangbouj ndaw ranz haujlai bw.

Sawqmwh, vaizlaux doek roengz aen gumz gut laeg song mij lai ndeu bae, youzcaih Dahlienz baenzlawz hemq “bawh、yied”vaizlaux cungj baenqlulu bin mbouj hwnjdaeuj.

Dahlienz raen mbwn yaek laep, siengj daengz duzvaiz baenzlawz cungj rag mbouj hwnj, daeglwg cuengq hag lij caj de dauqbae cawj haeux gwn…… Siengj daengz gij haemzhoj haenx lumj cien fanh bingmax bongh gvaqdaeuj, at dwk de nanz diemheiq bae, de nyaenx mbouj ndaej sing hung daejww. Sing daej dongj haeuj ndaw lueg caemrwgrwg haenx, gig siliengz.

Sam

Gij ndoeng Daegnyieg faen daengz gizlaeg ndaw ndoeng, souhong seiz bietdingh ginggvaq benq ndoeng Dahlienz.

Mwh de raen Dahlienz naengh youq ndaw caz gut siengsim daej- subsub, couh roengzbae yawj mbat ndeu. Cij raen duz vaizlaux ndwn youq ndaw gumz, ngiengx gyaeuj song lwgda fouznaih muenghyawj Dahlienz, seiz mbouj seiz ngauz gyaeuj baet rieng,“Nge nge……”heuh dwk. Lumj naeuz nai Dahlienz bouxcawj neix nei.

Daegnyieg sikhaek roengz baihlaj bae bang rag vaiz, hoeng hix rag mbouj hwnj.

De sijsaeq cazyawj yaep ndeu, couh youq baih daemq haenx vat diuz luengq hung ndeu, cix laeh duzvaiz okdaeuj.

Mbwn yaek laep seiz, Daegnyieg caeuq Dahlienz song boux gonq laeng doxgaen laeh vaiz haeuj mbanj daeuj.

Ginggvaq gorungz gyaeujmbanj seiz, gyoengqvunz cungj gangjsebseb.

Daj neix hwnj, gyoengqvunz gangjgoj cungj lai miz aen goj ndeu lwnh lo.

Mizseiz, lij miz vunz riu cam mehlaux Daegnyieg:“Saeh neix baenz luba? ”

Meh de rox maz saeh le, gag vuenheij, muengh saeh neix baenz caen. Gaxgonq lwgbawx de youq baihrog dajgoeng geij bi, couh gaen vunz deuz lo, vut dahlan sam bi hawj mehlwg de geij bi lo, saedcaih hojsik lai. De caen maqmuengh Daegnyieg ndaej caiq baenzgya.

Yienghneix, couh mbouj dingz mbouj duenh coi Daegnyieg cagaenj bae cam Dahlienz. Loengh ndaej Daegnyieg ngoenznaengz simfanz saeksaek —— Ciengx mehlaux caeuq dahlwg cungj dwgrengz lai lo, lij aeu ciengx Dahlienz mehlwg ndeu, yungzheih guh ndaej baenzgwn lwi? Neix mbouj dwg nyoengx song ranz vunz haeuj gumz feiz bae ha? “Laj linx at dai vunz!” Vah banlaux caen gangj mbouj loek.

Seiq

Baez yaepda couh haeuj seizhah, daengz banhaemh seiz, gij langh ndat lij seiz mbouj seiz daj seiqlengq coemj gvaqdaeuj.

Gwn gvaq vanj souh ndeu le, Daegnyieg hix daiq Dahdan daengz laj gorungz hung bae caeuq vunzlai itheij yietliengz、 gangjgoj. Gij naetnaiq doengxngoenz haenx, hix ciemhciemh riengz rumz ci siu bae lo.

Yaep ndeu, Dahlienz rap doiq doengjraemx ndeu, daiq daeglwg de ginggvaq laj gorungz. Dahdan couh angqvauvau riengz Dahlienz mehlwg bae henz cingj rwed byaek guhcaemz lo.

Daj ndaw mbanj doeng raemx- swlaiz le, aen cingj haenx dingzlai dwg hawj vunzmbanj rap bae rwed byaek lo.

Aenvih cingj laeg, gyoengqvunz daeuj rap raemx seiz, cungj haengj daiq diuz cagvaiz ndeu cug aen doengj bae daek raemx. Gwnz cag moix gek song sam cap couh hot aen hoh ndeu, fuengbienh song fwngz doxlwnz caeu doengj aeu raemx hwnjdaeuj.

“Dahdan! ”

Sawqmwh, henz cingj cienz daeuj mbat sing mehmbwk hemq haenx,“dung”sing he youh mbouj raen vunz lo.

Gyoengq vunzmbanj laj gorungz dingqnyi le, geij bouxsai sikhaek buet bae coh cingj haenx.

Mwh gyoengqde buet daengz henz cingj, cij raen gij raemx cingj fanfoed bop mauh mbouj dingz.

“Dahdan, mwngz mbouj miz saeh ba?” Daegnyieg sim saenz liux bae, lau dwk dungxmbouq raixcaix.

Gvaq geij faen cung le, daihgya raen Dahlienz dumzdwddwd mauh ok mienhraemx, fwngzswix got aen hwet Dahdan, fwngzgvaz youq gwnz raemx bek mbouj dingz.

Mbouj rox bouxlawz sikhaek cuengq aen doengj daiq cag Dahlienz haenx roengzbae.

Dahlienz cuengq lwgnyez haeuj ndaw doengj bae, doq nai doq son de gaem ndaet diuzcag, hawj doengh bouxsai baihgwnz rag hwnjbae. Songde couh gouq ndaej hwnjdaeuj lo.

Daegnyieg sikhaek song fwngz got Dahdan ndaetndaet bae, lau dahlwg lumj geu ien mbaeu ndeu mbin deuz bae.

Mbouj geij nanz, mbouj rox byawz youh vab naeuz: “Daegnyieg caen nyieg, dahsau cadi deng meh- maiq haek dai lo…… Meh haenx aeu mbouj ndaej……”

Daj neix hwnj, Dahlienz mbouj- lwnh bae guhhong roxnaeuz souhong ma ranz, cungj daegdaengq ndoj- gyae’gyae bae, mienxndaej caeuq Daegnyieg doxbungz.

Daegnyieg gag rox, baez yungyiemj haenx, caen dwg Dahdan dam youz cauhbaenz, aeu docih Dahlienz gouqmingh Dahdan cijndaej.

Daegnyieg yied siengj caeuq Dahlienz gangjvah, Dahlienz ndaw sim couh yied nanzgvaq, baenzbaenz cungj mbouj cwxcaih.

Haj

Mbouj rox mbouj nyinh, seiz- doeng gvaqbae seizcin youh daeuj daengz lo.

Mboengqhaenx, mehmbwn doek fwn oemq, cib ngoenz cib hwnz cungj mbouj dingz, caen lumj vahsug naeuz“coit doek fwn, oemq cibhaj”. Gij fwn seizcin nyinh gyoengqbya caeuq daihdeih dwk raemx rih raemx roenx, miz haujlai faex cungj deng rinnaez unq haenx nyoengx laemx bae.

Dahlienz hix doiq gij faex bonj- faenh haenx gvansim dangqmaz.

Ngoenzhaenx mbwn ngamq rongh, Dahlienz couh laeh vaiz hwnj ndoi lo. De bae raemj gij faex laemx haenx hawj duzvaiz rag ma ranz.

Mwh yaek daengz banringz, youh doek raq fwn hung ndeu, faex hung yaek laemx haenx youh ngamj laemx roengzdaeuj, Dahlienz ndoj mbouj gib, deng faex hung dub daengz ga’gvaz bae, gij in daj goekga conq haeuj simdaeuz daeuj…… Gij sing fwn sing rumz cungj dumh gvaq sing hemq sing daej de.

Mbwn baez bienq, Daegnyieg hix ganj baema lo. Hoeng bya sang loh gyae, de gaenq deng fwn rwed dumz liux lo.

Youq mwh ginggvaq ndoengfaex Dahlienz, de daegdaengq yawjyawj Dahlienz dauqma caengz.

Dingz roengzdaeuj le, de cix dingqnyi sing daej Dahlienz. De sim anj, ngiengx gyaeuj yawj gvaq byahung doiqmienh bae, raen Dah- lienz caen ngaiz faex hung at dawz lo.

De ganjgip soemh fwn buet bae coh bya doiqmienh. Haizgaijfang de mbouj rox seizlawz gaenq deng cengq byoengq lo, lingh cik hix loemq roengz naez bae, gij buhvaq cungj dwg boengz, hoeng de gijmaz hix goq mbouj ndaej lo, lumj duzgaeq doek raemx nei haenqrengz buet coh Dahlienz……