Daegmbauq he gwih cimozdoz doz Dahcih haeuj mbanj daeuj, “fw” sing he youh hai haeuj gyangmbanj bae.

“Dingqnaeuz Dahcih caeuq daegmbauq neix doxlienh, bouxwnq cungj ra diegndei haq, de dauq yaek haq haeuj ndawrungh bae ne.”

“Seizneix songde doxgyaez cingq naemq, mbouj naemj bae gyae, daengzcog couh rox lo.”

“Lwgmbwk mbouj dingqgangj, naihhoz mbouj ndaej!”

Laj gorungz bakmbanj vunz lwnhsaengsaeng. Auluz baez daengz ciengz, engq nauhyied lo, gyoengq- vunz cawz lwnh gij saeh Dahcih, lij lwnh gij saeh wnq, byawz siengj rox siusik moq, daeuj laj gorungz bak- mbanj couh baenz.

Auluz vunz sang hung, aen sing caemh hung, youq ndaw mbanj hix gangj baenz vah, mboujlwnh ranzlawz saeh hung saeh iq cungj ra de doxyaeng.

Ranz Dahcih miz seiq beix- nuengx, de dwg lwgdaeuz. Seizhaenx ndawranz hoj, vih ciengx gyoengq lwg, daxboh Dahcih ciengzciengz caeuq geij bouxsai nienznomj ndang cangq ndawmbanj bae vat meiz rap meiz.

Mboengqhaenx gaenx doekfwn, namh yungz, haethaenx, boh Dahcih gyoengqde geij boux daengz meizyiuz guhhong mbouj geijnanz, aen meizyiuz doemq roengzdaeuj lo, boh Dahcih gyoengqde cungj deng moek youq lajnamh.

Auluz daiq gyoengq vunzmbanj ganjdaengz meizyiuz gizde. Gyoengq- vunz vat namh daengz laj meiz seiz, boh Dahcih gyoengqde gaenq mbouj baenz yiengh lo.

Meizyiuz lauxbanj naeuz：“haet- neix gyoengqde daeujdaengz, gou naeuz haemhlwenz doekfwn namh unq, mbouj hawj gyoengqde roengz- bae guhhong, gyoengqde mbouj dingq……”

Auluz daiqdaeuz haenqrengz caeuq lauxbanj gangj, lauxbanj cij hawj boh Dahcih gyoengqde boux boiz faenh cienz he. Seizhaenx Dahcih lij iq, ndawsim de gig gamjgik Auluz.

Auluz raen Dahcih gyoengqde mehlwg haj boux hojlienz, lumj cae reih rauq naz gij hongnaek neix, de cungj bang.

Ndawranz saetbae boux cawj- daeuz, meh Dahcih uk luenh fatbag lo, de mizseiz gag gangj gag naeuz, mizseiz bae henz moh bouxgvan gag daej gag riu, mizseiz lij vet vunz.

Haemh he byonghhwnz, meh Dahcih youh vet vunz lo, aen sing youh sen youh hung, de daj gij vunz gyaeujmbanj vet daengz gij vunz byaimbanj, dandan mbouj vet Auluz.

Haetlaeng, Auluz caeuq geij boux vunz bae ranz Dahcih, naeuz meh Dahcih gaej vet vunz baenzlai.

Meh Dahcih lumj gukmeh yak nei, cung gvaqbae, aeu song fwngz nyaj gyoengqvunz, loengh ndaej gyoengqvunz cungj sanqdeuz, mbouj gamj haeuj gaenh de.

Daj neix hwnj, Auluz caeuq gyoengq vunzmbanj mbouj caiq leixlangh meh Dahcih gyoengqde, youzcaih gyoengqde guh vang guh raeh.

Daxmeh baenz yienghneix, gyoengq nuengx doegsaw gwn daenj yaek yungh cienz, Dahcih doeg cuhcungh sat le, couh okrog dajgoeng lo.

Youq baihrog, miz daeg mbauq he heuh Daegdungz caeuq Dahcih doxndei lo. Ranz Daegdungz youq Runghvaiz, liz mbanj Dahcih mbouj gyae, fan gvaq raeb bya he couh daengz. Mbouj rox bouxlawz laeuh saehcingz okbae, Dahcih baeznduj daiq Daegdungz daeuj ranz, bakmbanj couh lwnhsaengsaeng lo.

Meh Dahcih yienznaeuz ukgyaeuj mbouj cing, hoeng rox Daegdungz dwg vunz Runghvaiz, couh sing hung vet hwnjdaeuj, vet Daegdungz yaeuh dahlwg de, vet Dahcih miz lwgda mbouj miz ngveih……

Dahcih caeuq Daegdungz souh mbouj ndaej, lienzhaemh gwih aen cimozdoz gaeuq naeuh haenx dauq Runghvaiz.

Dahcih caeuq Daegdungz baenz- gya le, Daegdungz naemj bae cawx geij duz cwz geij duz yiengz daeuj ciengx, hoeng mbouj miz bonjcienz, songde guhdoih okbae dajgoeng lo.

Dahcih caeuq Daegdungz youq dieghong buen cien rag sa rag naez. Gij hong neix uq youh sinhoj, hoeng cienzhong lai, Dahcih caeuq Daeg- dungz nienznomj miz rengz, roxnyinh caiq baenzlawz sinhoj hix dij.

Bouxgaenx miz gwn, ndaw daeh miz di ngaenz le, Dahcih song gvanbaz naemj dauq ranz guh di gijmaz.

Daegdungz naeuz:“Gyawj bya baengh bya, gyawj dah baengh raemx, raeuz bae cawx geij duz cwz geij duz yiengz daeuj ciengx ba.”

Dahcih naeuz:“Dajciengx boux ndeu guh couh ndaej, gou naemj bau hong ‘Laujyangh Gyahyenz’ daeuj guh.”

Doengh geij bi neix guekgya banggungz, guh haujlai ranzlaeuz, heuh “Laujyangh Gyahyenz”, hawj gyoengqvunz ranz youq ndawrungh roxnaeuz byawz diuzgen ngamjhab, cungj ndaej buen haeujbae youq.

Dahcih youq rog guhhong geij bi, doiq guh ranzlaeuz gij saeh neix, yienghyiengh cungj rox. Gyoengq vunzmbanj raen Dahcih boux meh- mbwk he daiq baenzlai vunz guhhong, cungj doeksaet lo, Auluz hix anj lo.

Gyoengqvunz naemj: Mbouj miz di cienz caeuq bonjsaeh, byawz gamj ciep gij hong neix daeuj guh? Gyoengqvunz cungj bae ra Dahcih guhhong.

Ndaejhoengq seiz, Auluz hix naemj bae caeuq Dahcih guh di hong.

Auluz aeunaj, baez naemj daengz gaxgonq, couh mizdi mbouj eiqseiq. Daj boh Dahcih dai, meh Dahcih fatbag vet vunz, gij vunz ndawmbanj cungj mbouj leixlangh gyoengqde, Auluz hix mbouj caiq gvansim gyoengqde, seizneix, caen mbouj rox baenzlawz haibak cam Dahcih guhhong.

Dahcih romh bae hwnz dauq, ngoenznaengz nyaengqnyaennyaen. Ranzlaeuz guh baenz lo, gyoengqvunz gaen Dahcih guhhong hix cungj ndaej ngaenz coq daeh, bouxboux angq- fwngfwng.

Auluz miz song boux lwg, lwgdaeuz okbae dajgoeng le, haq bae dieggyae. Daeg lwgngeih youq baihrog guhhong lij caengz baenzgya, seizneix ndawranz cij miz Auluz song gvanbaz gag gwn gag youq.

Aen ranz Auluz gaxgonq giekranz vat feuh lai, seizgan nanz le, giekranz mizdi doemq lo, yaek laemx mbouj laemx, vaihvadvad, doekfwn lij laeuh raemx dem, youq gig mbouj an’onj. Cwngfuj hix anbaiz Auluz haeuj “Laujyangh Gyahyenz” bae youq. Auluz naeuz:“Sou anbaiz bouxwnq bae youq ba, daengzcog gou lingh guh ranzmoq.”

Vah naeuz Dahcih daiq gyoengq- vunz guh sat “Laujyangh Gyahyenz” le, gizlawz miz hong guh, Dahcih couh daiq gyoengqvunz bae gizde guh.

Miz cienz hwet ndongj, Dahcih cek ranzvax ranzmeh naeuh haenx bae, guh aen ranzlaeuz sam caengz buenq sang he, daegnuengx hix swnhleih baenzgya lo.

Yiengh ndeu ndei, yienghyiengh ndei, gij bingh meh Dahcih hix ciemhciemh ndei lo, de daengx ngoenz umj lan iq riunyumnyum, gyoengq vunzmbanj hix ciemhciemh dep.

Moixbaez dauq ranzmeh, Dahcih muengh aen ranzgaeuq Auluz, naemj daengz seiziq Auluz bang gvaq ranz cihgeij, cihgeij hix aeu bang de cij ndaej.

Baezneix Dahcih youh dauq ranzmeh, raen Auluz youq gyanghongh gag naengh ngaezfwd, Dahcih gvaq- daeuj dongx naeuz:“Au, daeuj caeuq mwngz gangjgoj saek yaep.”

Vah liz mbouj ndaej laux bonjhangz, Dahcih caeuq Auluz youh gangj daengz gij saeh guhranz neix.

“Au, raeuz cek aen ranzgaeuq mwngz bae, lingh guh ranzmoq.”

“Geq lo, lwgnyez youh mbouj youq ranz, mbouj naemj baenzlai lo.”

“Vunz yied geq yied aeu hoh ndei aen ndang, aen ranz laeuh raemx, ndawranz ciengzseiz dumzswd mwtmat, yungzheih baenzbingh.”

Dahcih caeuq Auluz mwngz coenz gou coenz.

Auluz daj ndawdaeh mbon ien daeuj cit, muengh gij hoenz ien yied biu yied gyae, sim naemj：Byawz siengj youq ranznaeuh ne? Dangh- naeuz geij bi gonq mehyah mbouj baenz ciengz binghnaek haenx, seizneix hix mbouj hoj baenzlai.

Gvaq geij ngoenz, Auluz ngamq hwnqcongz, Dahcih daiq cib lai boux vunz daengz ranz.

Dahcih riu naeuz:“Auluz Simjluz, ngoenzneix ndei doemq ranz, mwngz caeuq Simjluz sien buen bae ranzmeh gou youq gonq. Sou gaej you gij ngaenz guh ranz, gou ok gonq.”

Auluz gig doeksaet muengh coh Dahcih, mbouj rox gangj maz ndei.

Dahcih doemq aen ranzgaeuq Auluz le, couh sikhaek doenghnamh vat giekranz.

Song ndwen lai le, aen ranzlaeuz song caengz moqsag he guh baenz lo.

Dahcih doiq Auluz naeuz：“Au, guh ranz gungh yungh bae cib’it fanh. Gak cungj caizliuh bae gouj fanh, gaxgonq hawj ranzmeh guhranz lijmiz sam fanh maenzngaenz ganghginh, gijneix mbouj suenq cienz, ngaenz- hong song fanh, hix mbouj suenq cienz, suenq daeuj deng roek fanh, raeuz bingzyaenx ok, gou ok sam fanh, mwngz ok sam fanh.”

“Yienghneix gyawz ndaej, guh- ranz bae geijlai cienz, couh suenq geijlai.” Auluz naeuz.

“Geij bi neix daxsimj baenz- bingh, yw bae haujlai cienz, gaxgonq mwngz bang ranz gou, gou hix aeu bang mwngz.” Dahcih naeuz.