Yungh baenz aen singhgiz, gou cienj doh haj aen benq ngeihcib lai aen mbanj Mbanjlizau, ciepdwk couh hainduj guh hong dangjgen. Gou aeu cauhlaeb “dangjyenz hozdungsiz” guh giz roengzfwngz bae doidoengh cihbu gensez, youq yienhsingz guh le dangjyenz hozdungsiz、 geizdangj、 vahmieng haeuj dangj 、“sam hoih it goq” daengj cidu baizbienj caeuq doxgaiq, hawj vunz daiq daengz aen cwngfuj Bazhih Yangh, caiq cingj vunz ram daengz cunhbu, baij doxgaiq venj mbawbenj. Ndwen ndeu couh hwnj ciengz liux lo. Fungh ranznamh rwix gaeuq、boenqbibi ndeu aeu doengh gij gvaengzgingq hoengz heu baez cang, yawj daeuj bienq gvangq bienq rongh lo, Laujgauh cujyin caeuq cihsuh yawj le riu dwk bak mbouj haep.

Mbanjlizau youq laeng gex lueg gex bya, rin lai. Gyoengqvunz youq ndaw gehrin hung lumj vanj、gaeb lumj hanz haenx guh gwn, cawz ok ciengx gaeq、 gueng mou vuenh saekdi doxgaiq ngoenzyungh, cix mbouj miz maz ndaej cauhngaenz lo, cizdij ginghci ndawmbanj cengdi dwg “lingz”. Gou ciucomz daihgya ok geiqmaeuz ra roenloh. Laujgauh cujyin naeuz：“Geij bi neix ciengx yiengz gai ndaej cienz, genyi ciengx yiengz.” De baez gangj daihgya couh yaengx fwngz doengzeiq. Hoeng daj gizlawz aeu ngaenz bae cawx ceh- yiengz ne?” Gou doq naeuz：“Gojyij baema baugau danhvei lingjdauj, ceng’aeu di ngaenz bangfuz.”

Gvaqlaeng, gou couh aemq geij gaen nohnousauj, daemj dwngx byaij daengz Aen Camhhojceh Gvanhsih ma Nanzdanh. Haemh ndeu, gou heuh danhvei lingjdauj daengz ranz gou gwn laeuj gwn nohnousauj. Gwn daengz gyang, gou naeuz Mbanjlizau guh cizdij ginghci yaek aeu ngaenz bae haidoengh, lingjdauj sikhaek couh doengzeiq ok roek cien maenz ngaenz hawj Mbanjlizau cawx cehyiengz. Neix hawj gou angqvauvau, haemhde aenvih sim’angq lai, fiz daengz ngoenz daihngeih gvaqringz haj diemj lai cung cij rox singj.

Ngaenz daengz le gou couh ciu ganbu ndawmbanj caeuq mbangj boux vunzmbanj bae Mbanjliloz cawx yiengz. Seiq haj ndaek vunzsai boux bangx hix miz, boux gwed hix miz, boux aemq hix miz, dawz seiqcib lai duz yiengz loengh daengz cunhbu. Doeklaeng ciuq aen hezyi “cienzcanh baenbuenq” fat yiengz cawx ma haenx hawj song hoh nungzminz ciengx. Daengz neix, aen hanghmoeg cizdij ginghci ndawmbanj couh miz roen- loh lo.

Coih doeng goengloh dwg gij loqsiengj geij daih vunz ndawbya, lai bi doxdaeuj, gak gaiq dangjveij cwngfuj youq gwnz coih loh guh cuk faenzcieng、ok le haujlai goengrengz, hoeng aenvih gak cungj yienzaen cungj gwx bae gwx dauq mbouj ndaej sathong. Seizde loh gaenq coih daengz aen gemh heuhguh Dunggungz ndeu, liz cunhbu lij miz haj goengleix baedauq. Yienh fuzbinzban、gyauh- dunghgiz hawj leizgvanj ywbauq, hoeng lij aeu vunzlai ok rengz guhhong cijndaej. Gou caeuq geij boux ganbu ndawmbanj gwed faex- saux, doiq diuz sienqhoengz bouhmonz gyaudoeng biu ndei haenx rau bae rau dauq, faen duenh baij hong, faen hong daengz benq、daengz doih. Caenhguenj vunzlai ndatsim guhsaeh, hoeng diuzloh yaek gvaq haenx cungj dwg rin hung mieng laeg, deihhingz gig fukcab. Aenvih noix gij sezbei guhhong senhcin, vunzlai dan baengh gangciem ngauqcuiz, bauq caq feiz coemh aeu, diuz roen guh ndaej gig menh. Seizde gou lij siengj gvaq, danghnaeuz swhgeij dwg bouxsien ndaej diemj rin baenz gim、yaengx fwngz couh dawz bya bienq dieg- bingz, yaep he dingh hawj gizneix bingzbwdbwd、gizgiz cungj doeng, mbouj hawj vunzlai dwgrengz.

Mbanjlizau liz aen haw Bazhih gyae lai, vunzlai byaij lohbya yaek byaij geij aen cungdaeuz daengz haw ndawbya laeng doiqhamq diuzdah bae cawx doxgaiq ngoenzyungh, gig mbouj bienh, cix aeu vad ruz roxnaeuz vad saz gvaq dah, bungz daengz seizfwn raemxrongz、 diuzdah raemx hwnj, baedauq mbouj ancienz. Yienghneix “song veij” ndawmbanj daez naeuz youq dieg hoengq dangqnaj cunhbu hwnq aen hawciengz genjdanh ndeu. Gou caeuq ganbu ndawmbanj fat- doengh vunzlai, mbouj daengz ndwen ndeu couh dap hwnj song baiz ranzbungz genjdanh de, baez bungz haj bungz cib couh dingh guh ngoenzhaw. Hawciengz hwnq ndei le, caen miz vunz dawz mienh、gyu、faenj saegbuh caeuq mbangj di huqdoj daeuj gai. Moix baez miz song sam bak vunz daeuj haw. Daengz haemh, gyoengq bouxcoz saimbwk siujsoq minzcuz yaengx dendungz、gwed aen gih loegyaem daj seiqhenz daeuj gizneix, mbangj boux ciengq gij fwen vahsaeq Yauzvaqhau、 miz boux ciengq “liuxlangzleh” Mauznanzcuz, nauhnauh yiedyied, guhcaemz daengz ranzrongh, aen cunhbu caemrwgrwg haenx cix bienq nauhyied lo.

Capmbanj bi ndeu gvaqlaeng, aenvih gij hong gaxgonq gou youq danhvei fucwz haenx yaek fukhaed niemhsou, danhvei gietdingh vuenh vunz, yienghneix gou cijndei baema lo. Geiqndaej ngoenz lizhai Mbanj- lizau haenx, Laujgauh cujyin soengq gou bae daengz Aen Camhhojceh Gvanhsih, bae daengz gemh Dung- gungz seiz, gou baenq gyaeuj yawj aen ranzhaz vaxfaex daemq ndawrungh、reih haeuxliengz ndawbya、diuz loh cabluenh haenx, ndawsim gag raen najmong caeuq hojyouq. Laujgauh cujyin danq naeuz：“Siengj gaijbienq gij cingzgvang Mbanjlizau seizneix hix mbouj dwg gij saeh saek song ngoenz neix, aeu ginggvaq geij daih vunz roengzrengz guh.” Yienznaeuz Lauj- gauh cujyin yienghneix gangj, hoeng ndawsim gou vanzlij dwg luenh- nyaengnyaeng, cij luenh ngaek gyaeuj sat lo.

Doeklaeng, aenvih gak cungj yienzaen gou caiq mbouj dauqma Mbanjlizau gvaq. Seizneix, ngeihcib lai bi gvaqbae, gou lij ndiepniemh aen mbanjrungh iq gaxgonq noix raemx mbouj doeng dienh haenx. Geij bi gaxgonq, dangj caeuq cwngfuj guh hong duetgungz gunggeng, neiyungz engq gidij、banhfap engq cingcinj、douzhaeuj engq lai. Seizneix, gaenq haeuj daengz mwh lajmbanj saenq- hwng, gou siengj Mbanjlizau itdingh mbwn fan deih boek、 gaiqgaiq hwng- fwdfwd lo.（sat）