Dou lij ndaej ngonz “gwiz moq haeujdou” aen ciengzmienh neix dem. Gizneix bouxsai okhaq caeuzyah aeugvan, neix dwg aen fungsug ceiq miz daegsaek、 ceiq mizmingz Nazlauz Cin.

Cauhcangz cunhbu baij song baiz congzraez, gwnzde miz haeuxdaeq、lwgmaenz、lwgbiek、faengxsamgak、haeuxnaengj、moegsawz、ceiz daengj doxgaiq gwn neix, hawj gyoengq bouxhek cimz. Song dah sau iq henzndang gou angq dwk hemq naeuz: Yi! Baez nduj raen baenzlai doxgaiq gwn, mbouj rox gwn gaiq lawz ndei. Songde cimz loh daemh yiengh, yaepyet couh hemq dungximq yaek dek!

Banringz, Nazlauz vwnzyouj daiq dou bae youz Gunghbaujfuj. Gunghbaujfuj dwg gong ranz ciuhgeq ndeu, ciemqdieg seiq fanh bingzfangh- mij, hungloet caemh yo ndaej ndei, hawj vunz saenqdoengh. Gij ranz neix gaek lungz veh fungh, deu gak cungj dozanq, ndeiyawj、miz yinxdaeuz, neix yienh’ok gij lizsij naekna caeuq laiyiengh vwnzva Sihlinz. Gunghbaujfuj dwg diegcoj ranz Cwnz Cingciuz byai guek raeuz, ranz Cwnz ok sam boux hakhung: Cwnz Yiyingh、Cwnz Yibauj、Cwnz Cunhsenh. Cwnz Yiyingh dwg boux Yinzgvei Cungjduh. Daegnuengx de Cwnz Yibauj dwg boux dailij Yinzgvei Cungjduh, daeglwg de Cwnz Cunhsenh dwg Song Gvangj Cungjduh. Hak ranz Cwnz bouxboux miz dungxcaiz, goengfou ak.

Mwhhaenx yencangj Cangh Mingzfung hix dwg boux miz dungxcaiz ndeu. Goh Mozyoz boux caizmaeg hung guek raeuz dwg lwggwiz Sihlinz.

Sihlinz Yen liglaiz yawjnaek vwnzva, yawjnaek vwnzyoz, yawjnaek beizyangj vwnzyoz vunzcaiz moq, daengx yienh gwnzgwnz lajlaj vwnzyoz fwnhveiz noengz, Nazlauz Vwnzyoz Se ndaej vih de guhcingq, neix hawj diegwnq haenh mbouj dingz.

Baezneix daeuj Sihlinz, hag ndaej haujlai doxgaiq, hag ndaej haujlai cihsiz, soundaej haemq lai, mbouj dauq ndwi.

Sihlinz dwg diegndei, hoeng roen gyae、 roen goz、 yak byaij. Dauqma seiz, mehlwg dou youh ngaiz rueg hoemj rueg hai baezmoq. Dahlwg naeuz hitdai ma mij caiq bae Sihlinz lo.

Bi 2018, gou youh bae Sihlinz baezmoq. Mbatneix gou roxhit lo, gaijbienq lohsienq, daj Bwzswz dap dungceh daengz Yinznanz Gvangj- nanz, caiq dap cihek byaij roen ngeihgaep bae Sihlinz. Diuz roen ngeihgaep neix roen goz hix lai, ci youq gwnz roen ngoegngoeg ngauxngaux baenz song aen lai cungdaeuz cij daengz dieg, gou lij ngaiz rueg lai baez, daengx ndang unqgviz liux. Daj baezde hwnj gou hix hit lo, miengnaeuz dailix cungj mbouj bae Sihlinz lo, danghnaeuz miz roengauhsuz cij bae.

Hoeng, Sihlinz ndaej miz roengauhsuz lwi? Aen yienh iqet bienbik neix, lienz hojceh、dungceh cungj gvinx mbouj gvaq, de ndaej miz roengauhsuz ha? Guekgya ndaej vih dieg gyae dieg iq baihsae Guengjsae raeuz douzcienz guh roengauhsuz ha? Lauheiq guekgya lumz de bae dem. Neix dwg gij siengjfap seizhaenx gou.

Hoeng, gij naengzlig guh roen guek raeuz caen hawj gou liuh mbouj daengz. 2020 nienz 3 nyied, Sihlinz roengauhsuz haihong. Ginggvaq Cungguek Nwngzgen Gwzcouhba Cizdonz caeuq vunzlai seiqhenz caemh ganhoj haenqrengz guh, diuz roengauhsuz neix ndaej daezgonq bi ndeu guhbaenz, youq 2022 nienz 12 nyied 29 hauh doeng ci. Dingqnaeuz youq mwh guh roen, cauh- baenz haujlai gizciz, neix dwg gij yienghndei gensez gauhsuz goengloh, daejyienh canloz guekgya caeuq sevei cwzyin. Densi、vangjloz、meizdij doxceng baudauj gienh saehhung neix.

Denzsih(Denzlinz bae Sihlinz) Roengauhsuz dwg diuz roen doeksat Guengjsae “yienhyienh doeng gauhsuz”, neix gaijbienq gij lizsij Sihlinz Yen mbouj doeng gauhsuz. Seizneix, mbouj rox vunz Sihlinz angq baenzlawz? Neix dwg gij siengjmuengh gyoengqde lai bi haenx ha!

Gou hix angq dangqmaz, nyaenx mbouj ndaej couh fat siusik hawj dah vwnzyouj: Sihlinz doeng gauhsuz lo, gou ndaej bae liuh lo. De sikhaek hoizdauq: Daeuj vei, daeuj vei, Sihlinz seizseiz angqcoux sou.

Gwncieng le, dou sam bohmehlwg hai ci bae Sihlinz liuh. Denzsih Roengauhsuz sohvid bingzbwd, vunz youq ndawci, roxnyinh mbouj miz saekdi saenqdaenh roxnaeuz ngoegngaux. Ci lumj mbin nei, vut doenghgo henzroen dauqlaeng, dou mehlwg maez youq ndaw gvaqyinx “vaiq” haenx. Dahlwg youh ngeixdauq gij hojnanh baez nduj bae Sihlinz, naeuz: Boh, gou lwnh mwngz nyi, baezde gou caeuq daxmeh lumj duzgaeq haeujngoenh nei, ndang’unq yiubed liux, hozhawq bakhaemz, youqhoj yaek dai. Daxboh de naeuz: “Haenx baenz lizsij lo.”

Itloh ngonz gingjsaek, itloh gangjgangj riuriu, gig vaiq couh daengz Sihlinz lo. Song aen lai cungdaeuz, onjonj dangqdangq, mbouj miz saekdi naetnaiq, lij cingsaenz gvaekgvaek yienghgaeuq.

Dahlwg hemq: “Sihlinz mwngz ndei!”

Baezneix daeuj Sihlinz gizsaed dwg daeuj daejniemh roengauhsuz. Itloh gvaqdaeuj rox- nyinh Denzsih Roengauhsuz mboujdanh fueng- bienh okdou、hwnghwnj lijyouz, engq youqgaenj dwg de daiqdoengh fazcanj canjnieb, mboujdanh hawj Sihlinz yinzminz daiqdaeuj leih’ik hung, lij ndaej hawj seiqhenz sengj (Yinznanz、Gveicouh) yinzminz daiqdaeuj bienhleih.

Denzsih Gauhsuz mboujdanh dwg diuz roen hawj ci、vunz baedauq ndeu, engq dwg diuz roen minzswngh、roen canjnieb、roen baenzmiz daengj leih’ik beksingq, hix dwg diuz roen cingzngeih Sihlinz yinzminz caeuq gak dieg bouxhek.

Gwnzloh dauqma, dahlwg ninz gyaenfifi, ninzonj lumj youq ranz ninz mbonq nei.

Yawj baihnaj, gou raen gij ci baedauq gwnzroen cingq nengh gij huqdoj Sihlinz bae dieggyae……

Gou dwg boux guenjroen(bouxciengxroen) ndeu, ngeihcib lai bi gvaqdaeuj, gou guenj gvaq roennamh、youzloh seiqgaep、youzloh ngeihgaep. Moix baez rox yienh lawz doeng roengauhsuz, gou cungj vih gyoengq bouxguenjroen gizde sim’angq. Aenvih roengauhsuz doeng ci, ndaej gemjnoix gij cehliuzlieng roen ngeihgaep dangdieg, yienghneix gij hong gyoengq boux- guenjroen couh ndaej gemjmbaeu di, gou baenzlawz mbouj angq ni?

Dauqngeix gij gyaudoeng fazcanj Guengjsae raeuz, Gveiliuj(Gveilinz bae Liujcouh) Gauhsuz dwg Guengjsae daih’it diuz roengauhsuz, youq 1997 nienz guhbaenz doeng ci. Denzsih (Denzlinz bae Sihlinz) Gauhsuz dwg Guengjsae diuz doeksat roengauhsuz, youq 2022 nienz 12 nyied 29 hauh guhbaenz doeng ci. Ligseiz ngeihcib haj bi, Guengjsae ndaej guhsat yienhyienh doeng gauhsuz. Ndaejdaengz Swcigih Dangjveij、Cwngfuj yawjnaek gauhsuz gensez; Swcigih Gyauhdunghdingh daengj mizgven bumwnz caemh dawzrap、caez roengzrengz, caeuq ciencien fanhfanh bouxgensez gunggeng haekfug gunnanz guh baenaj, guhbaenz diuz dem diuz roengauhsuz, hawj Bazgvei daihdeih gizgiz yienh’ok rengzhoengh.

Seizneix gou dwg boux duiyouh cizgungh goengloh laeng hidungj ndeu, Guengjsae raeuz yienhyienh doeng roengauhsuz, gou roxnyinh miznaj caemh simhai dangqmaz, caensim hoh Guengjsae raeuz ngoenzcog engq ndei!

（2 sat）