Mboengqneix, buek byaek moq ndeu swnhleih banh sat gij soujsuz doenggvan, daj Nanzningz Vuzhih Gozci Gihcangz yinh bae Majlaizsihya, neix dwg buek byaek moq Gvangjsih baez nduj gai hawj Majlaizsihya, dwg byaekgailanz caeuq reuzbyaek.

Youq Gvangjsih Vujcouh Ginh- gyauz Nungzcanjbinj Mizhanh Gungh- swh aen cunghsinh genjleh boiq- soengq, vunz guhhong cingq dajbau byaek caepcawq cuzgouj. “Neix dwg buek dinghdan nduj dou sawqsawq aen hawciengz Majlaizsihya, riengz- laeng dou yaek ciuq hawciengz, diuzcingj loh huq ok rog guek bae gai.” Aen gunghswh neix fucungj- ginghlij Maj Yinyenz naeuz.

Ciuq cam rox, vih baujcang buek byaek neix ndaej swnhleih ok guek, Yunghcouh Haijgvanh gyagiengz caeuq giyez senhconz bwh’anq、bauq canjbinj、genjnen genjyiz、guek cingouj iugouz daengj cwngcwz; laebbaenz aen gihci cienban bangfuz, bangcoh dieg dajndaem guhndei doenghgo sawjyungh guenjleix、gamcaek baenz bingh miz nonhaih caeuq gamhanh huq miz doeg miz haih, dazyinx aen giyez gyagoeng laebbaenz caeuq hengzguh aen dijhi gamhanh gijgwn ancienz veiswngh aeu faensik sienghaih caeuq banhfap yawhfuengz gamhanh guh goek; haidoeng “diuzroen saekheu”, laeb- caez bauq cuzgouj、gamguenj genjyiz daengj liuzcwngz cezdenj, doq bauq doq genjyiz doq cuengq, caenh’itbouh daezswng doenggvan yauqlwd. Nanz- ningz Sanghvugiz gaenxmaenx boiq- hab giyez swnhleih guhsat baez neix byaek ok rog guek gai daengz Majlaizsihya, bang ra comz byaek、daehyinh daengj, coenghrengz giyez gya’gvangq diuz roen moq aeu byaek gai bae Dunghmungz.

(Loz Cing Dwng Can)