Youh daengz mwh vahenj homfwt、goliux yauzbaet, buek gunghcoz duiyenz capmbanj moq daiq aen loqsiengj saenqhwng lajmbanj daengz doengh aen mbanjrungh gvangqlangh bae. Raen gyoengqde yinxdaeuz hoenghfwd、gikcingz rimrad, hawj gou siengj daengz gij saehgonq capmbanj ngeihcib lai bi gaxgonq.

Bi 1996 seizcin, Cunghgung Nanz- danh Yenveij cujciz buek ganbu nienzoiq ndeu daengz lajmbanj guh Cunhminzveij fucujyin, seizhaenx hauxseng ndaw danhvei mbouj lai, lingjdauj couh doigawj gou lo. Gou ngaiz baij daengz Bazhih Yauzcuz Yangh Mbanjlizau, haenx dwg aen mbanj siujsoq minzcuz bienbik ndeu, liz yangh cwngfuj daih’iek ngeihcib lai goengleix, caeuq Vanzgyangh Mauz- nanzcuz Swciyen Conhsanh Cin、Muzlun Yangh, Gveicouh Swngj Liboh Yen Lauhcunh Yangh gapgyaiq, miz Boux- cuengh、Boxgun、Yauzcuz、Mauznanzcuz daengj minzcuz, gij vunz cungj mbouj gaeuq song cien, dwg aen mbanj sam mbouj doeng ndeu（raemx、dienh、loh cungj mbouj doeng）. Youq ndawyangh ninz haemh ndeu le, ngoenz daihngeih haetromh gou couh caeuq boux ganbu baucunh yangh cwngfuj Lanz Ginhlungz doxbuenx bae Mbanjlizau. Baez bae cungj dwg loh’iq aeu rinbya bu baenz, gumzgamx gvaengxgvax, dou daj gyanghaet gouj diemj byaij daengz gvaqringz seiq diemj lai cung, daihgaiq byaij le caet aen cungdaeuz cij daengz cunhbu.

Boux cujyin cunhveij Veiz Yingcouh、 boux cihbu suhgi Hoz Lanzgvei daengj ganbu “song veij” ndawmbanj senq youq gizhaenx caj dou lo. Veiz cujyin ndaej seiqcib bi baedauq, vunz Mauznanzcuz, boux vunz simvuen, hunghung sangsang, aiq miz mij bet yienghneix, vunzlai heuh de “Veiz Laujgauh”. Boux suhgi Hoz Lanzgvei samhaj bi, vunz Yauzcuz, bouxde hozraez unqswnh. Ngamq raennaj, Laujgauh cujyin couh gaem fwngz gou ndaetndi’ndi, yez- cingz gangj：“Luz dungzci sinhoj lo, baez- neix raeuz youh lai boux beixnuengx ndeu. ”

Haemhde, gyoengq ganbu ndawmbanj daegdeih youq ndaw ranzcaz cunhbu dwk feiz dawzoen’oen, hawj gyanghwnz bienqndaej ronghsagsag. Laujgauh cujyin daj ndawranz daiq huz laeujget ndeu caeuq geij gaen duhhenj daeuj, Hoz cihsuh daj ndawranz loengh daeuj geij gaen nohnousauj caeuq hoij nohlap ndeu, daihgya gvaengx youq henz gumzfeiz cix gwnlaeuj cix cej goj. Hoz cihsuh naeuz：“Seizneix, gij gunnanz ceiq hung raeuz dwg mbouj doeng goengloh.” Laujgauh cujyin gipmuengz cabvah naeuz：“Gwn- laeuj mbouj gangj cungj neix, sien gaej hwk Luz dungzci.” Haemhneix, gou ngaiz daihgya doxlwnz nai laeuj, gwn dwk fizfaengx ninzndaek fangzhwnz lo.

Ngoenz daihngeih banhaet, vunzlai ciuhai daengxcungq cunhgan veiyi baiz hong. Caengz capmbanj, aen bangunghsiz cujciz gensez gihcwngz hawj dou guh sonlienh, gvaciz cawjdaeuz dwg bang “song veij” ndawmbanj guh ndei dangj- gen、 fazcanj cizdij ginghci、 gouqgungz daengj hong youqgaenj. Gou coh “song veij” ndawmbanj gangj le aen yinvu gou, caemhcaiq maqmuengh ndaej daihgya cihciz. Daihgya cungj naeuz mbouj miz vwndiz. Laujgauh cujyin naeuz：“Luz dungzci dwg daeuj bang mbanj raeuz guh saeh, miz gunnanz lai bang de di. Daihgya caezsim gaprengz, doxbang doxgap, guh ndei saehcingz.” Gij vah Laujgauh cujyin hawj gou soeng roengzdaeuj, ndawsim roxnyinh onj raixcaix.

Hoih hai sat le, Laujgauh cujyin naeuz Yenzsangdui miz hoh geiqseng ndeu, aeu bae dunghcih mehdaiqndang daengz ndawyangh guh genjcaz, swnhbienh daiq gou bae “cunzcunz mbanj”. Yienghneix gou couh raek daehraemx、daenj gyaep- meg, hainduj gvaciz capmbanj baez daih’it roengz doih cunz mbanj.

Laujgauh cujyin、 boux ganbu ndaw- yangh Lanz Ginhlungz caeuq gou sam boux vunz benz gvaq cibgeij aen rungh, yungh le aen lai siujseiz cij yawjraen gizdieg “Yenzsang”. Aen doih neix youq ndaw- lueg, sam mienh bangxdat humxrop, caenh miz diuz loh iq dog doeng daengz baihgwnz. Diuz loh gumzgamx gvaengx- gvax, yungyiemj lingqlangq, mbangj dieg dap laefaex cij hwnjbae ndaej. Daihgya din fwngz caez yungh、lienz benz daiq ruenz, yungh caenh rengz cij daengz dingjbya. Naeuz Yenzsangdui dwg aen swnghcanjdui ndeu, dauq mboujyawx naeuz de dwg aen mbanj iq ngamq miz song vunz ndeu. Song ranz gak youq doeng sae song gyaeuj aenlueg, cungqgyang dwg gaiq reih mbouj daengz moux ndeu. Aenvih diegdaemq, ranz hwnq ndaej daemq, danghnaeuz mbouj nyinhcaen yawj gig nanz rox gizneix miz vunz youq.

Hoh youq baihsae de couhdwg ranz geiqseng Laujgauh cujyin yaek ra haenx. Seiz dou haeuj ranz cingqngamj bungz daengz daengx ranz vunz cungj youq, bouxcawjranz raen dou daeuj daengz cix mbouj geizheih, gangj le coenz vah ndeu: “Daeuj la, naengh ba”, couh mbouj gangj vah lo. Gou yawj seiqhenz, doeksaet liux： Neix dwg song fungh ranzhaz aeu ganjhaeuxyangz humx baenz haenx, seiq mienh doeng rumz, aeu maz mbouj miz maz, lienz benjcongz cungj mbouj miz. Gokranz, geij ndaek rin guh cauq, gwnzde gaq aen gu ndeu（aen guhang aeu ma cawj haeux）caeuq aen cauq cawj byaek rwz goenq ndeu. Ndawranz mbouj daengq mbouj eij, daengx ranz vunz caemh naengh hot faex ndeu. Bouxcawjranz heuh dou naengh, dwg heuh dou naengh youq gwnz doi faex henzdou. Gou yawjyawj ranz vunz neix, doiq gvanbaz neix mbouj daengz samcib bi, song dah lwgsau dah hung dah iq, dah hung bet bi, dah iq haj bi, maj ndaej cingqlili, hoeng aennaj heuhenj, yawj hwnjbae couhdwg yingzyangj mbouj cuk. Daengx ranz vunz naj saepsangsang, dinghdingh naengh youq gizhaenx. Lauj- gauh cujyin haibak gangj：“Mungz daeg- nuengx ha, ciuq cwngcwz rieng ndwen neix bawx mwngz aeu daengz ndawyangh guh genjcaz, mwngz ndaejhoengq buenx de bae ba.” “Ndei, gou rox lo.” Laujgauh cujyin youh gangj le coenz vah: “Sou aeu bae vaiq di ha”, liux couh baenqhangx okbae lo. Raen yienghneix, gou caeuq Lanz Ginhlungz hix gaenlaeng okbae. Daengz rogranz le, Laujgauh cujyin naeuz：“Mwngz dauqbae hai aen gu de, yawj miz gijmaz doxgaiq.” Gou couh cienjndang dauqma ndawranz, yawjraen dwg cauq mok lumj yungh nywj gueng mou、mbawfaex cawj baenz haenx. Gou lwnh hawj Laujgauh cujyin. De naeuz：“Neix dwg gij haeux- caeuz haemhneix gyoengqde.” Gou miz di mbouj saenq. De laebdaeb gangj：“Gizneix diuzgen yakrwix, ndaem haeux cungj mbouj gaeuq gwn. Lanz Ginhlungz hix gangj：“Daengz haj roek nyied mwh ceiq hwng, seiqhenz mbawsangh oiq di cungj ngaiz vunz mbit liux bae.” Gou dingq le, ndawsim gig hojyouq, mwh roengz bya song ga cix unq liux, itloh byaij roengzdaeuj byawz cungj mbouj gangjvah.

（1）