Mwhgonq gou mboujrox raiz faenzcieng, hagseng seizhaenx, gou ceiq ukin dwg raiz cozvwnz, ndigah gij cingzcik yijvwnz gou cungj ngaiz cozvwnz raglaeng.

Camgya gunghcoz le yawj saw ngonz bauqceij lai le, simhoengz fwdfwd, hix gaem bit daeuj raiz gij saeh gou daraen rwzdingq haenx, douz hawj bonj si bause. Liuh mbouj daengz, gij faenzcieng dinjdet iqoiq gou raiz haenx caen ndaej daenghbauq dahraix.

Loeklak souhaeuj、loeklak doeksaet caemh vuenheij hawj gonjbit gou mbouj dingz mbouj duenh raiz roengzbae, bauqceij gwnzde ndaej ciengzseiz raen gij faenzcieng iqoiq gou.

Baenzlai bi daeuj, yienznaeuz raiz mboujok maz faenzcieng hungmbwk, hoeng lingh miz faenh souhaeuj daegbied ndeu——roxnaj bang canghraiz ndeu. Gyoengqde dwg vwnzyouj gou hix dwg lauxsae gou. Gyoengqde youq gak yienh bonj si, Sihlinz vwnzyouj ceiq lai.

Dahdozniengz boujciengx vunz Sihlinz, vunz Sihlinz ciep ndaej gij soeng’yungz、yiedcingz Dahdozniengz. Sihlinz vwnzyouj lai baez heuh gou bae Sihlinz liuh, hoeng Sihlinz gyae lai, gou mbouj gamj bae.

Daj roxnaj gyoengq vwnzyouj Sihlinz le, gou haihij haeujsim Sihlinz aen yienh iqet bienbik neix.

Sihlinz Yen youq gizdieg gapgyaiq sam sengj(Guengjsae、Yinznanz、Gveicouh), dwg aen yienh ceiq doeksat baihsae Guengjsae, vunzlai heuh de guh “Douhung Baihsae”, liz Bwzswz miz songbak hajcib lai goengleix.

Hwnjvangj bae bwzdu cij rox, gij vwnzva lizsij Sihlinz gyaeraez、 gaeuqgeq、 naekna:

Sihlinz dwg cwngci、ginghci cungsim aen guek gaeuqgeq Gouhdingh, vwnzva Gouhdingh Guekgeq dwg gij lizsij vwnzmingz ronghsien Bouxcuengh ndawde dingz ndeu.

Sihlinz dwg diegcoj Ranzcwnz “ranzndeu sam hakhung” Cingciuz byai guek raeuz. “Ranz ndeu sam hakhung” hungyienj seizhaenx, vunz- biengz cungj haeujsim gyoengqde.

Lizsij ndawde, diuz cagyinx daihngeih baez Yahben Cancwngh ——Saehgienh Majsaenzfuj hix heuhguh Sihlinz Gyauan, couh dwg youq Sihlinz Ding’anh Cin fatseng.

Sihlinz aeu ndaej aen mingzdaeuz “Mbanj Sahdangzgiz Cungguek”. Sihlinz mbawcaz、bit- maz、hingnuenz、lwgmanhndok daengj doenghgij huqdoj neix riuzmingz daengx biengz.

Dienheiq Sihlinz hab’eiq, seizhah mbouj ndathaenq, seizdoeng mbouj doeknae.

Gij ndei Sihlinz geq mbouj liux. Boux vwnzyouj ndeu raiz soujgo《Sihlinz Dwg Diegndei》, dawz gingjsaek、fungsug、sibgvenq、vunzcingz、huqdoj daengj lwnh vunzbiengz nyi.

Sihlinz swnghdai gyaeundei, doxgaiq ok- laeng fungcuk, funghcingz noengz, hoeng, aenvih bienbik, roenloh mbouj fuengbienh, cix lij “yo youq rugndaw”, ginghci sevei fazcanj haemq lotlaeng.

Doiq Sihlinz liujgaij yied lai yied muengh ndaej raen de, couh lumj dahsau yaek okhaq nei, simgip youh gaenjcieng. Gyoengq vwnzyouj lai baez heuh bae liuh, yienznaeuz sim hix siengj bae yawjyawj, hoeng roen gyae lai, roenloh mbouj fuengbienh cix mbouj gamj yamqdin.

Bi 2015 ngoenzhaenx, dah vwnzyouj youq Sihlinz senhconzbu hwnjban haenx heuh mehlwg dou bae Sihlinz liuh, dahlwg hix naemj bae caeuq dahcej（dahlwg vwnzyouj） liuh saek ngoenz song ngoenz, cingznaek nanzdoi, gou gietdingh bae lo.

Ngoenzde dou mehlwg daengz Bwzswz cehcan dap cihek Sihlinz. Roen dwg roen ngeihgaep, gvaq Lucwngz le, diuz roen bae Sihlinz goz bae goz dauq, ngutngut ngeujngeuj, ndaejnaeuz mbouj miz saek duenh roen dwg roensoh. Vunz youq gwnz ci bibuengq bae bibuengq dauq, lumj gonjganj aenbaetcung nei mbouj dingz saekgwq. Dungxsaej hix deng bibuengq doxdaemj, dungx in dangqmaz. Ci ngamq gvaq Lucwngz yaep he, dahlwg rueg lo, itloh hemq nanzsouh. Gou nai de naeuz nyaenx- nyaenx gawq ndeu couh daengz lo. Hoeng, gou rox cih “nyaenx” neix gangj ndaej yungzheih nanz guhdaengz! Mbouj geijnanz gou hix rueg lo, yaek rueg seizhaenx, ndawdungx lumjnaeuz miz raemxlangh youq ndawde geuj, hojsouh fouzbeij.

Rueg gvaq le, ndawdungx haemq bingz- dingh, roxnyinh ndeiyouq di lo, hoeng, didi “ndeiyouq” neix ngamq ndaej yaep ndeu, youh dungxhunx baez moq, gaenriengz youh rueg lo……Mehlwg dou doxlwnz rueg, mizseiz caemh rueg dem, aen conghcueng ndeu caenx song aen gyaeuj, aen hoz caenhliengh iet ok rogcueng bae, rueg hoemj rueg hai.

Saeknaj dahlwg haunyo, yiuhoz unqnyieg, lumjnaeuz dawz mbouj ndaej aen gyaeuj, gyaeuj de ngeng youq gwnzmbaq gou. Gou maeh saeknaj gou hix haunyo, gyaeujngunh haenq, daengx ndang unqnyiegnyieg, caen siengj ninz roengz yietnaiq. Hoeng gou lij aeu cangguh cingsaenz gvaekgvaek, vih dahlwg henhoh huhangz. Rueg sam seiq baez le, doxgaiq ndawdungx rueg bae liux lo, caiq rueg cix rueg gij raemxhaemz ndawmbei, doeklaeng cix rueg hawq.

Buenq loh seiz, dahlwg saedcaih nanzsouh, naeuz: Meh, raeuz dauq ranz ba, mbouj bae Sihlinz lo.

Gou naeuz gaenq caeuq dahheiz gangjndei ngoenzneix bae Sihlinz, lauheiq dahheiz seizneix gaenq youq cehcan caj raeuz lo, raeuz gangjvah aeu suenqvah. Caiq naeuz, buenq loh dap ci, mbouj miz vih mbouj hawj hwnj ci ne.

Dahlwg dingq le raemxda dawzgvaengx.

Itloh bibuengq itloh saenqdaenh itloh rueg, baenz haj aen cungdaeuz cij daengz Sihlinz, mehlwg dou deng boekfan yaek dai, lumj boux binghnaek nei. Roengz ci le cix youq rinlae bakdou cehcan naengh yietnaiq. Aen gyaeuj dahlwg doij youq gwnz gyaeujhoq gou, namnaeuz: Sihlinz baenzneix gyae, roen baenzneix yak byaij, rox yienghneix gou mbouj daeuj lo.

Aiq dwg gij yiengh saengxsanxranj dou hwk dwk dah vwnzyouj ba, de baez raen dou couh doeksaet, hemq: Vihmaz baenz yienghneix? Bingh la?

Gou naeuz: Itloh rueg.

De gingqyienz riuhaha, naeuz: Yienzlaiz dwg ngunh ci ha, gou laihnaeuz sou bingh dem, rueg baenz yienghneix, aendungx sou caen rox guh’unj, souh mbouj ndaej saekdi haplangh.

Gou daejriu mboujbaenz, naeuz: Dwg gij roen dieg sou goz lai, ngutngut ngeujngeuj lumj duzngwz raih nei, mbouj miz saek giz soh, vunz naengh gwnz ci, riengz ci bibuengq lumj raemyiengz nei, byawz souh ndaej ne?

“Ha ha!” Dah vwnzyouj youh riu, naeuz: Gou roxnyinh naengh ci lumj naengh aen gyoivenj nei onj dangqmaz, hwnj ci ninz ndiu ndeu couh daengz dieg lo.

Dah vwnzyouj neix dwg guh sinhvwnz meizdij, Sihlinz Bwzswz ciengzseiz baedauq, dungxsaej de gaenq hab’wngq gij saenqdaenh bibuengq haenx, dapci ndaej ninz doiq de daeuj gangj dwg cungj yiengjsouh ndeu.

Youq ranz de yietnaiq ngoenz ndeu, dou cij hoizfuk yienzheiq.

Seizhaenx ngamq dwg Sahdangzgiz Lij- youzcez, de dwg boux gicej, baenzngoenz nyaengq naj nyaengq laeng, banngoenz ganj bae gak dieg hozdung yienhciengz ingjsiengq, banhaemh ganj raiz gauj. De naeuz boenq ndaej song gong nyouh guh gong ndeu ok.

Dou mehlwg caeuq dahlwg de riengz baihlaeng de buet, lumj duznon riengz caekhaex nei, gwih max yawj va ngonz gak aen hozdung. De cix yut saekdi hoengq lwnh vwnzva Sihlinz hawj dou nyi, gij cihsiz cwkbwh de fungcuk, hawj gou boiqfug.

Ngoenz hozdung doeksat dwg youq Sihlinz Nazlauz, dou ndaej ngonz bin ganj doxdax. Diuz faexsaux raez ndeu, baek youq gizde, vunz bin hwnjbae, faexsaux rwenz gungj lumj aen gungnaq nei, raen yienghneix gou ndangndum liux, lauheiq faexsaux raek, boux haenx doek roengzdaeuj deng sieng. Giz- saed gou you dwg doyawz ndwi, ciengzmienh neix hawj vunz lau ndwi.

（1）