Sinhvazse Nanzningz 5 nyied 8 hauh dienh Cunghgung Cunghyangh Cwngcigiz cangzveij、Daengx Guek Cwnghez cujsiz Vangz Huningz 6 hauh daengz 8 hauh youq Gvangjsih diu- yenz. De naeuz, aeu haeujlaeg hagsib gvancez gij swhsiengj youqgaenj gyagiengz caeuq gaijndei hong minz- cuz Siz Ginbingz cungjsuhgi, aeu couqmaenh gij eiqsik caezcaemh Cunghvaz Minzcuz guh diuz sienqmeh hong minzcuz dangj caeuq gak hangh hong dieg minzcuz, dingjmaenh byaij diuz roen deng miz Cungguek daeg- saek gaijgez minzcuz vwndiz, cietsaed guh ndei hong minzcuz dangj seizdaih moq.

Vangz Huningz bae daengz Cungzcoj Si Gyanghcouh Gih Daih’it Siujyoz、Sinhhoz Cin Bujvah Cunh caeuq giyez guh dangz, Fangz- cwngzgangj Si Sizvansanh Yauzcuz Yangh Muzbaiz Cunh、 Dieg Baujhoh Swyenz Guekgya Gaep Bakdah Bwz- lunz caeuq baksok、giyez minzyingz diuyenz, roxyiuj couqmaenh gij eiqsik caezcaemh Cunghvaz Minzcuz haeuj ndawhag haeuj lajmbanj haeuj giyez、cauhlaeb minzcuz doxgiet baenaj、cienzswnj hwngfat minzcuz vwnzva、baujhoh swnghdai、saenqhwng laj- mbanj、vunzlai gvaqngoenz guhhong daengj cingzgvang. De naeuz, Gvangj- sih dwg aen dieg guhyiengh minzcuz doxgiet baenaj, aeu couqmaenh gij eiqsik caezcaemh Cunghvaz Minzcuz doeksaed daengz ginghci、gyauyuz、couhnieb、segih hwnqguh、vwnzva hwnqguh daengj gak hangh hong bae, ca saed ca saeq, hawj youq diegdeih Betgveiq doek rag laeglaeg bae. Youq Nanzningz, Vangz Huningz bae daengz Gvangjsih Bozvuzgvanj、Gvangjsih Minzcuz Dayoz、Cinghsiu Gih Fung- lingjbwz Segih diuyenz. De naeuz, Gvangjsih gak minzcuz doxcunz doxgyau doxyungz lizsij gyaeraez, aeu dingjmaenh aen Cunghvaz Minzcuz lizsijgvanh cinjdeng, gyagiengz vat- cimh yungh huqcaen gaujguj、vwnzva louzce、sijliu sijsiz, haeujlaeg yenzgiu gij vwndiz giekdaej hungnaek aen gungdungzdij Cunghvaz Minzcuz, daj aen gungdungzdij Cunghvaz Minzcuz bae gaemdawz gienz lwnhgangj lizsij caeuq gienz vahgangj.

Mwh diuyenz, Vangz Huningz naeuz, Gvangjsih nyinhcaen doeksaed gij anbaiz baijbouh Dangjcunghyangh, cietsaed doicaenh hwnqguh aen gih guhyiengh couqmaenh gij eiqsik caez- caemh Cunghvaz Minzcuz, gyamaenh hwngfat aen gizmen ndei minzcuz doxgiet、aenbiengz onjdingh、bien- gyaiq anningz. Aeu guh ndei hong couqmaenh gij eiqsik caezcaemh Cunghvaz Minzcuz, dingjmaenh yungh aen lijsiengj saenqniemh doxdoengz bae caezhoz guhhong, gyagiengz hwnqguh aen dijhi lijlun gungdungzdij Cunghvaz Minzcuz, haeujlaeg cauh- laeb caeuq senhconz gyauyuz minzcuz doxgiet baenaj, doicaenh gak minzcuz doxcunz doxgyau doxyungz, saedhengz aen hengzdoengh hwng bien fouq minz seizdaih moq, hawj gak cuz vunzlai lai nyinhdoengz aen guek- coj hungmbwk、Cunghvaz Minzcuz、Cunghvaz vwnzva、Cunghgoz Gung- canjdangj、sevei cujyi miz daegsaek Cungguek. Aeu gyagiengz dangj cienzmienh lingjdauj hong minzcuz, daezsang naengzlig caeuq suijbingz guh ndei hong minzcuz dangj seizdaih moq.

Vangz Huningz lij bae Gvangjsih Bouxcuengh Swcigih Cwnghez Gih- gvanh、Fangzcwngzgangj Si Cwnghez Gihgvanh diuyenz, yawj doengh boux daengx guek cwnghez veijyenz caeuq cwnghez gihgvanh ganbu youq Nanz- ningz.