（ciep geiz gonq）

Ndawmbanj diegdeih gig biz, gingjsaek gyaeundei, lij ok gak cungj huqdoj dienseng ndei de. Boux bawx iq daj Gvangjdungh haq daeuj haenx, ukgyaeuj lingzhoz, de swhgeij youq dauzbauj hai aen diemq ndeu, youq gwnzmuengx gai gij huqdoj ranz de, siu ndaej gig ndei.

Baez cienjda daengz bi 2018. Bihaenx, vangjloz sibinz dinj gig hwng, boux lwgmbwk iq bingzseiz aen soujgih mbouj liz fwngz haenx, ingj sibinz dinj, hawj aen diemq de engq miz daegdiemj, hawj engq lai vunz rox gij doxgaiq ndawdiemq. Lwgbawx iq ingj gij sibinz ndawde, ndoengbya heuswd、raemxrij ruru、aen gamj saenzmaed daengj, gingjsaek swhyienz caem- rwgrwg; lwgbawx iq youq ndawmbanj dajcawj gaiqgwn miz daegsaek dieg de, gij ciengzgingj gig lingzdoengh; song dah lwg de dwgcoh haenx, hix seiz mbouj seiz “okgingq”, demgya le haujlai yinxdaeuz …… Mbaw doz swnghhoz lajmbanj gyaeundei、dojgeq、dienseng neix yinx le haujlai vangjyouj daeuj yawj, moix aen sibinz dinj cungj miz haujlai vunz diemj bae yawj.

Lwgbawx iq rox caemz doujyinh、sibinzhau, lij rox cigboq gai huq daengj, gou rox gij saeh neix le, couh ra lwgbawx iq, hawj de guhdaeuz daiq daengx mbanj mehmbwk youq gwnzmuengx gai huq, daihgya doengzcaez baenzmiz buet coh siujgangh.

Lwgbawx iq baez dingq couh sim’angq ngaek gyaeuj dapwngq. Gizsaed caeuq vunzlai sug le, de hix siengj bangcoh daihgya, aenvih “daihgya ndei cij dwg caen ndei”. Naeuz guh couh guh, de bang daihgya youq doujyinh、sibinzhau、siujhungzsuh daengj meizdij bingz- daiz moq mienxcienz cigboq daiqhuq. Dawz gij duhsan、sawzcienz、duhhenj daengj huqdoj cinghsaw swnghdai ndawmbanj gai daengz daengx guek gak dieg, ndawmbanj caiq hix mbouj you gij huqdoj “ciengx youq ndawrug vunz mbouj rox”.

Baez ndeu daengz ndawmbanj sou huqdoj, lwgbawx iq raen daengz Gogoh ciengzseiz dingq vunz gangj haenx. Gogoh dan miz faj fwngz ndeu, yungh diuz gen dog ciengx ndaej baenz ranz vunz. Lwgbawx iq gig gamjdoengh, siengj banhfap bang de gai haeuxliengz. Doenggvaq cigboq gai huq, Gogoh miz cienz roengz daeh. De moix ngoenz sou duhnoh、makyungz couh dawz daeuj hawj lwg- bawx iq, swhgeij cix sij mbouj ndaej gwn. Neix hawj bawx iq gig gamjdoengh, roxnyinh sinhoj hix miz engq lai gyaciz: Aen diemq iq swhgeij bienqbaenz le gij maqmuengh swnghhoz gyoengqvunz ndawmbanj.

Mwh ndawmbanj gak fuengmienh cungj cugciemh bienq ndei, youh miz gij sing mbouj habdangq okdaeuj lo. Baezneix gij hux dwg diuz gunz ndeu yinx daeuj lo.

Cangh Ailingz gangj gvaq:“Raeuz dangq boux dangq daenj buh.” Daenj buh mbouj doengz, singgwz hix mbouj ityiengh, neix youq laeng Simjngeih Simjsam doiq bajliuz ranz Linz neix daegbied mingzyienj. Gyoengqde boux maij buh Bouxcuengh, boux maij buh Bouxgun.

Linz Simjngeih dwg vunz Swconh Cwngz- duh, Linz Aungeih bae Swconh Cwngzduh doegsaw, swnhdaiq “gvaij” Linz Simjngeih ma Gvangjsih.

Swconh ok lwgsau gyaeu coenz vah neix mbouj gyaj. Linz Simjngeih louz hawj gou yinsieng ceiq laeg dwg fouq lwgda de lumj raemxsaw ndawhuz nei, caeuq gij bwnda raezrad、myanzmyanz、youh gienj youh niengh haenx. De riu hwnjdaeuj seiz, song mbiengj mbwnjbak riunyumj, lwgda raez cix riunyumj, song aen cenjlaeuj gwnzgemj hix riunyumj, caen dwg fanh yiengh cingsaenz geuj byai bwnda.

Linz Simjngeih maij daenj buh Bouxgun. Miz mbangj dwg buh Bouxgun cienzdoengj, miz mbangj dwg buh Bouxgun gaijliengz gvaq haenx. Mboujlwnh gijmaz buhvaq daenj youq gwnzndang de, cungj dwg cingqging、gyaeundei. Caen dwg gij mbungqmbaj ndaw byozva, gij valup ndaw vabeghab.

Linz Simjngeih maj ndaej ndei, bak youh diemz lumj uet dangzrwi nei, gyoengqvunz ranz Linz gig maij de. Doeklaeng, Linz Simjsam haq daengz ranz Linz, ndawranz couh bienq lo.

Linz Simjsam maij buh Bouxcuengh, daegbied yawj mbouj gvenq Linz Simjngeih daenj buh Bouxgun. Moix baez raen Linz Simjngeih, cungj riuhu baez ndeu: “Yo, mbouj louzsim yawj, nyinhnaeuz ranz raeuz miz mehdaux daeuj dem!” Ngoenz ndeu, Linz Simjngeih daenj diuz vaqniuzcaij seizhwng ndeu, Linz Simjsam youh lumj gihgvanhciengh nei “bili bala” gangj naeuz:“Yo, ngoenzneix mbouj guh mehdaux lo, gaij guh dah langh vaiz baihsae lo？”

Gij beizheiq Linz Simjngeih bonjlaiz gig ndei, hoeng nanz le, hix dingj mbouj ndaej Linz Simjsam ciengzseiz yienghneix riu, mizseiz hix hoiz coenz naeuz:“Mwngz nyinhnaeuz gij buh Bouxcuengh mwngz daenj neix ndeiyawj ha? Lumj mehmaiq saekndaem.” Linz Simjsam maij daenj buh Bouxcuengh saekndaem. Boux vunz de youh miz di ndaem dem, yawj hwnjbae caen miz di lumj mehmaiq saekndaem. Couh yienghneix, songde ndaq bae ndaq dauq, ndawranz ciengzseiz nauh mbouj duenh.

Ranz doxhuz fanh saeh swnh. Seizneix vunzmbanj swnghhoz yied daeuj yied ndei, mbouj ndaej aenvih buhvaq loengh dwk mbouj doxgiet. Baenzlawz guh cijndei ne?

Yienghneix, gou siengj daengz le buhraez.

Buhraez dwg gij buhvaq cienzdoengj meh- mbwk Cungguek caeuq seiqgyaiq Vazyinz, hix dwg gij yienhsiengq caeuq hingzsik ceiq ronghsag cikcomz youq ndaw vwnzva ndang- daenj lizsij gyaeraez Cungguek, ndaej haenh baenz “gozcui Cungguek” caeuq “gozfuz mehmbwk”. Deng, couh hawj Simjngeih Simjsam daenj buhraez!

Simdoengh mboujyawx hengzdoengh. Gou gig vaiq couh youq dauzbauj cawx ma song dauq buhraez, loxyaeuh hawj Simjngeih Simjsam ranz Linz cungj daenj hwnjbae.

Siengj mbouj daengz Simjngeih Simjsam daenj hwnj buhraez, laebdaeb couh maij lo, roxnyinh daenj buhraez “miz funghguz cix doenghvunz, denjyaj youh lingzdoengh, liuh de mo daeuj sangj youh cwxcaih”.

Aenvih maij, mwh mbouj guhhong, songde lij doxgap hai aen gunghcozsiz buhraez ndeu, simmaez sezgi caeuq gaijndei gij buhraez. Gij lingjdauj ndawcin dingqnyi le, baij gisuzyenz daeuj bangcoh Simjngeih Simjsam. Ginggvaq gak fueng bangcoh caeuq songde roengzrengz, seizneix aen gunghcozsiz buhraez gyoengqde seng’eiq gig ndei, youq gwnzmuengx vunzlai hix haenh ndei lailai.

Seizneix, youq ndawmbanj gou bangfuz haenx, Bouxcuengh、Bouxgun、Yauzcuz daengj gak minzcuz yinzminz doxgyaez doxndiep, lumj ranz vunz ndeu. Yienghhaenx caen dwg “56 aen minzcuz 56 duj va, 56 boux beixnuengx dwg ranz ndeu”.

Daengz bineix, gou youq ndawmbanj guhhong gaenh cib bi lo, mwh coz gou cungj soengq hawj rangh diegdeih ndatfwd neix. Gaenh cib bi buekguh, aen mbanj ciemhciemh bienq ndei, namh cix engqgya homfwt.

Hoeng gou, hix roxnyinh swhgeij daj duz yiengznyoengq bienqbaenz duz manaez ndeu, remcieng fouzbeij.

Gij rengzhaenq manaez mbouj dwg baenzngoenz rongx “auau”, cix dwg youq laeng duzde gyaepgouz muzbyauh mbouj dingz mbouj duenh、 mbouj lau dwgrengz、caemdingh caeuq gouz cungbyoengq. Youq ndaw seiqvunz raeuz, buet baenaj ciengxlwenx dwg gij yienghceij ceiq gyaeundei haenx, aen cib bi baihlaeng, gou gietsim daiqlingx vunzmbanj laebdaeb buet bae, buet dwk buet dwk, couh buet daengz doiq- hamq, cix raen cin raeuj va langh.

(sat)