Youq bozvuzgvanj raen lai、bae denyingjyen youqndwi、bae dieggingj yawj minzcuz vwnzva……Ngoenzgyaj “haj it”, Gvangjsih gak gaep vwnzva caeuq lijyouz bumwnz gunghawj doxgaiq lairaeuh, vwnzva caeuq lijyouz hawciengz diemjrongh lai raixcaix、hoenghhwdhwd.

Gunghgung vwnzva fuzvu gung- hawj fungfouq lai yiengh. Daengx gih gak gunghgung vwnzva cangzgvanj banh hozdung miz daegsaek vwnzva, yinx hekyouz siminz doxceng dingzdin yawj. Nanzningz Si Bozvuzgvanj、duzsuhgvanj caepcawq le bae damqra gij saenzmaed bozvuzgvanj、Cungguek Dwzgoz yisuz gyauhliuzcanj daengj baenz roix hozdung vwnzva lai cungj lai yiengh. Geiqniemh langhbaij heiq saenamz 80 hopbi nem gaiq daihbet daengx guek heiqvah heiqmoeg maenhndei baijyienj hawj bouxyawj yawj gvaqyinx dangqmaz.

Vwnzva lijyouz cawjdaez hozdung ndeiyawj dangqmaz. Liujcouh Si Yauzbu Gujcin banh “Sanhcej guh- moiz”、 daejniemh ciuhgeq guhlawz aeubawx baehaq daengj hozdung, Sanhgyangh Dungcuz Swciyen Cwngz- yangz Bazcai Gingjgih doiok “haigeng·ciet gingq vaiz” daihhingz minzcuz vwnzva hozdung, hawj hekyouz cung- faen roxnyinh gij minzcuz fungcingz noengznwd. Gveilinz Si saekhoengz lijyouz laebdaeb dauqndei, Cenzcouh Yen、Hingh’anh Yen caeuq Gvan- yangz Yen daengj dieg bienqbaenz dieg hekyouz baeyouz dajgaj.

Leih minz lijyouz cwngcwz bangdoi vwnzlij hawciengz hwngfat hoenghvuengh. Vuzcouh Si Denh- lungzdingj Sanhdi Gunghyenz、Dwngzyen Sizbyaujsanh daengj dieg- gingj caeuq Vuzcouh Gijdiz Hungz- singh Sezlizfangh Binghsez Seiqgyaiq doiok fei haeuj dou aeu cienz buenq ndeu daengj banhfap hawj bienzngeiz. Bwzswz Si Davangzlingj Gingjgih、Lingzyinz Yen Haugunhhuz、Dwzbauj Yen Dieggingj Maxdaemq faenbied doiok fei baenzdauq ndaej bienzngeiz、haeuj aen dou nduj mbouj aeu cienz、aeu cienz buenq ndeu caeuq boux daegdingh mbouj aeu cienz daengj banhfap.

Meijdonz soqgawq yienh’ok, ngoenzgyaj “haj it”, Gvangjsih vwnzlij soq dinghdan（baugvat gingjgih、dozninz、naenghci daengj） doengzbeij demmaj mauhgvaq 56%, ndawde, dieg baiz youq baihnaj sam mingz dwg Nanzningz、Gveilinz、Liujcouh； cawz vunz bonjdieg le, lijmiz Sinhcin、Gvangjcouh、Dunghgvanj daengj dieg hekyouz youq ngoenzgyaj daeuj Gvangjsih lijyouz dem. Ngoenzgyaj hamj dieg baeyouz ciemq lai, hekyouz bae dieggyae youz laebdaeb gyalai, lumjbaenz gaiqgwn youq bouq gwn, Gvangjsih hekyouz diegwnq roengz- dan youq bouq gwnndoet doengzbeij demmaj mauhgvaq 108%.

(Hij Danhdingz)