Gou dwg boux ganbu bangfuz ndeu, youq diuz loh dazyinx bouxhoj duetgungz bienq fouq buetcoh siujgangh haenx, gou daj boux vunz unj bienqbaenz boux vunz ak, hawj va hai baenz duj va minzcuz doxgiet ceiq gyaeundei ndeu.

Aen mbanj gou bangfuz haenx, diuzgen mbouj suenq ca, miz raemx miz naz. Hoeng, aen uk vunzlai mbouj lingzhoz geijlai, dajndaem dajciengx baema caenh geij cungj nwngq. Gou daengz ndawmbanj guh bangfuz le, aeu gij cwngcwz guekgya ndei bae bangcoh daihgya, dazyinx gyoengqde ndaem haeuxdaeq ndei, caemhcaiq youq goek ndaem gij duhhenj、duhndaem ndei daengj, hawj haeuxliengz sou ndaej lai; ndaem gohaeux、lwgmanhheu、lwgfaeg ndei daengj; youq ndawdaemz ciengx bya, gwnzdaemz ciengx mou, guh lizdij dajciengx …… Goengfou mbouj vei vunz miz sim, gou daiq vunzlai ndaem ok gij haeuxdaeq henj- myanmyan, lumj naed gim nei, haeuxsan lumj naed caw luenzruru, lwgmanhheu lumj doengh aen daengloengz heusausau nei. Ndaem haeuxliengz byaekheu, ciengx bya、 yiengz、 mou、 vaiz, yawj daeuj ndei, ndigah gai ndaej ngaenz lai, aen ngaenzbau daihgya hix moj lai lo. Ranzvax gaeuqgeq vaihved doemq roengzdaeuj lo, ranzlaeuz lumj fwn gvaq rangz did nei hwnq hwnjdaeuj, vunzlai cungj najhai lo, riu dwk lumj dujva hailangh nei.

Youq mwh vunzlai angqvauvau, gou yawjraen le gij saehcingz mbouj habdangq.

Ngoenzde gou caeuq beixsauj Ahging gangjgoj. Miz dah lwgmbwk najseng ndeu byaij gvaq henz, sien hozhaenz demq dou gangjgoj, dou roxnyinh le, de hix guh baez “hwng” sing ndeu, faenj gumq couh deuz lo. Beixsauj Ahging naeuz gou nyi, neix dwg bawxmoq ngamq haq daeuj ndawmbanj haenx, vunz Gvangjdungh, dwg Bouxgun. “Bouxgun yawj mbouj hwnj Bouxcuengh raeuz.” Beixsauj Ahging gongz amq heiq ndeu.

Gou ngeixngeix mbouj deng ha, couhsuenq de dwg Bouxgun, vunz Gvangj- dungh soqlaiz cungj gig yiedcingz gyaezhek, baenzlawz cungj mbouj rox yawj vunz mbouj hwnj. Dahraix, gou baez cam, yienzlaiz dwg aenvih daihgya gangj gij vah mbouj doengz couh ngaiz yienghneix.

Lwgbawx yiedcingz gyaezhek, haq daeuj mbouj geijlai nanz couh baij congz- raez, heuh gij bawx ndawmbanj bae laeng de gwnhaeux. Ngoenzhaenx, de guh le bingjdangz suijgyauj, sim’angq lai couh gangj coenz “Vahcoj”——Vah Gvangjdungh（goj heuh Vahbeg）gangj “gwn suijgyauj.” Vahgvangjdungh gangj gwn suijgyauj, Vahcuengh dingq hwnjdaeuj lumj “bae ninz”. Gig mbouj ngamj, ndawmbanj gyoengq bawx cungj dwg gangj Vahcuengh lai, baez dingq couh hojyouq, roxnyinh lij caengz gwn angq, couh ngaiz caenh ma ninz lo. Youq mwhneix, miz boux mehmbwk ndeu gangj Vahsinhminz, Vahsinhminz dingq daeuj hix lumj Vahgvangjdungh, bawx iq baez dingq couh song da ronghsag, lumj“youq diegwnq bungq baengzyoux” nei, angqvauvau yungh Vahgvangjdungh cam：“Mwngz dwg gangj Vahbeg lwi？” Coenz neix Bouxcuengh dingq hwnjdaeuj lumj naeuz：“Mwngz dwg gangj vahbag lwi?” Naeuz vunz gangj vahbag, haenx dwg gig mbouj gingqcungh vunz. Dwg ha, youq dwk ndeindei, byawz nyienh ngaiz vunz naeuz swhgeij dwg bouxbag, gangj vahbag ne? Mehmbwk gangj Vahsinhminz haenx sikhaek mbouj angq lo, lwgda daengx dwk hung lumj aen doengzlingz nei：“Mwngz gangj gijmaz? Byawz gangj vahbag……” Ciengzmienh cengdi luenh caez.

Gizsaed, gangj caen, Vahgvangjdungh caeuq Vahcuengh, Vahcuengh caeuq Vah- sinhminz, lij miz Vahyauzcuz daengj, yaemdiuh、eiqsei mbouj doengz geijlai, vunzlai gangjvah couh lumj gaeq caeuq bit gangj, nanz le gij ngaekngeu yied daeuj yied hung, neix doiq doxgiet mbouj ndei.

Gawqyienz dwg vah mbouj doeng, gou couh doiq bingh roengz yw, youq ndawmbanj bujgiz Vahbujdungh. Aenvih gou cam daengz, gij yozliz vunzmbanj ceiq daemq dwg siujyoz bizyez, bouxboux cungj rox gangj Vahbujdungh, gyauhliuz hwnjdaeuj fuengbienh vaiqvit. “Baezneix, haengjdingh baenz！” Gou youq ndawsim gag naemj.

Hoeng, gou siengj genjdanh lai lo.

Lwgbawx ndawmbanj gangj gvenq Vahcuengh lo, sawqmwh hawj gyoengqde seizseiz gangj Vahbujdungh, hoj guh lai, gyoengqde roxnyinh launyaenq. Ngoenz- haenx, gou son beixsauj Ahging gangj Vahbujdungh, de sien najhoengz gonq, bak hai haep geij baez, hoeng gangj mbouj ok sing daeuj！Gou haemz diet mbouj baenz gang, yienghneix couh iugouz daihgya bingzseiz gangjvah itdingh aeu gangj Vahbujdungh. Mbouj gangj, yienghyiengh cungj mienx gangj.

Ginggvaq diqdiq bungzbungz, vunz- mbanj gvenq gangj Vahbujdungh lo, boux lwgbawx iq daj Gvangjdungh haq daeuj haenx hix caeuq daihgya doxhuz doxndei lo. (caengz sat)