Song Guengj couh dwg beixnuengx caen,

Song duz gaeqgim haen’oo;

Ngoenzneix doengz daiz daeuj ciengq go,

Bya youz bae coh ndaw daemz gvangq.

Seizcin sam nyied vunz simsangj,

Bak va hailangh roeg heuh rwenz;

Gou iu gak dieg gyoengq canghfwen,

Ciengq go sing rwenz daeuj Sahlangz.

Gou dwg duzrwi haeuj suenva,

Gou dwg duzbya haeuj dah gvangq;

Daeuj daengz Sahlangz caen cix angq,

Coenz vah mbouj gangj sim gag rwenz.

Raemxdah Cuhgyangh caen ndei cim,

Gyanghaet lae gim haemh lae ngaenz;

Bya raemx doxrangh caen cix baenz,

Song Guengj miz saem daeuj doxlienh.

Beixnuengx doxgyaez caez diuq foux,

Doengzcaez coux daeuj ngoenz ndit rongh;

Song Guengj gaem fwngz mbouj hawj cuengq,

Beijfwen yaek ciengq cien fanh nienz.

Lwglan Mbanjcuengh gyaez ciengq go,

Minzcuz doxgiet va rim bya;

Ngoenzngoenz cungj youq ndaw fwen gvaq,

Cien vunz aj bak fanh vunz riengz.

Cienzswnj minzcuz gij vwnzva,

Hajcib roek cuz doengz guh mwn;

Guengjdoeng Guengjsae fwngz gaem fwngz,

Gwnzbiengz cungj hai va youxngeih.

Raemxdah Cuhgyangh yiengq baihdoeng,

Vareux hai mboeng coh daengngoenz;

Vunzlai riengz dangj byaij diuz roen,

Moqnaj ndwenngoenz ndei fanh daih.

Beijfwen ciengq liux geijcib bi,

Sim oq lumj fiz ndei raixcaix;

Angq ciengq Dangj raeuz Ngeihcib Daih,

Seiq fueng bet baih daeuj doxcomz.

Sahlangz byaraemx caen ndei lah,

Duzrwi mbungqmbaj mbin daeuj cunz;

Gizneix beijfwen sing dekswenz,

Bouxhek daeuj cunz mbouj siengj dauq.

Hwnzloq Cungguek gaiq bouxminz,

Lajmbanj ndawsingz siengj doxdoengz;

Yiengq gij muzbyauh bae yungh goeng,

Loqsiengj miz ngoenz baenz dahraix.

Gimge funghvuengz mbin gvaq banz,

Daeuj daengz Sahlangz hab baengzyoux;

Sam nyied cosam dienheiq raeuj,

Raeuz caez doengz daeuj guh beijfwen.

Lajmbwn gingj ndei youq Sahlangz,

Beixnuengx aeu gvangq hek gyaez daeuj;

Ma daengz gizneix gwn cenj laeuj,

Sam bi dauq daeuj bak lij hom.

Ngoenzneix gyoengqraeuz daeuj doxcueng,

Gimge funghvuengz mbin guhdoih;

Seiq fueng beixnuengx daeuj doxboiq,

Ciuhvunz guhdoih rongh angjdangx.

Mbwn dem ndwenngoenz vunz dem gyaeu,

Youh daengz cincou loh raezrangh;

Ngoenzneix doxbungz youq Sahlangz,

Sim’angq yangzyangz beijfwen gok.

Goreux hai va dujduj hoengh,

Beixnuengx ciengq go sim ceiq sangj;

Angq ciengq hungmbwk gungcanjdangj,

Angq ciengq fu’gyangz Cungguek moq.

Ndaej gwn dangzrwi angq duzrwi,

Ndaej gwn haeux ndei angq bouxndaem;

Singz mbanj bienq yiengh caengz dem caengz,

Yaek geiq aen dangj coq ndawsim.

Ndaw ranz miz haeux ndaej ciengx gaeq,

Ndaw dah raemx lae ndaej ciengx bya;

Guengjdoeng ginghci mbin baenaj,

Ndawsingz lajmbanj cungj ndei caez.

Seizcin sam nyied va hai rang,

Ingj dwk Sahlangz hoengz muenx deih;

Lajmbanj hwngvuengh gingjsaek maeq,

Ranzmbanj gyaeu beij aen diendangz.

Byaraemx hamz cingz va hamz riu,

Roeglaej roegciu daeuj doengz raez;

Gyoengqdou geij boux nuengx Guengjsae,

Hawj sou daegbeix siuq aenbau.

Ngoenzneix raen beix miz gyaeqhoengz,

Hawj dou gyoengq nuengx da hix cuenq;

Dou aeu lwgdomq caeuq mwngz vuenh,

Doengz bae cuenh haw Sam Nyied Sam.

Guh beijfwen le giet baengzyoux,

Bouxboux ciengq daeuj riubahnyex;

Nuengx dwg Guengjsae Liuz Sanhcej,

Ngoenzneix daeuj nyex beix Guengjdoeng.

Sam nyied vadauz hai rim bya,

Va miz geijlai cingz geij laeg;

Guengjsae Sanhcej cingzngeih naek,

Ndaekdomq bau hawj mbauq Sahlangz.

Sam nyied cosam sing fwen lai,

Seiq fueng bet baih vunz caez maez;

Beixnuengx Guengjdoeng caeuq Guengjsae,

Yungh fwen dap ndei giuz youxngeih.

Gizneix vareux bibi sanq,

Gizneix maknganx bibi diemz;

Gizneix beijfwen bibi ciengq,

Beixnuengx doxriengz bibi daeuj.

Ciengq ndaej ndei le ciengq ndaej gvai,

Ciengq ndaej va hai yinx mbungqmbaj;

Cietgo sam nyied caen siuqsaj,

Bimoq binaj caiq daeuj cunz.

（2 sat）