Gvaq diegrum diegcumx,

Boengzbwx loemq ga vunz,

Dungxiek gip nywj gwn,

Baiqninz doxing yiet.

Geijlai guk beuq laengz,

Geijlai caengz gvan souj,

Dwk ndaej Lazswjgouj,

Daihdoih haeuj Ganhnanz.

Fanjdungbai mbouj fug,

Baij bing dwk Cizloz,

Cix lumj deng fangzdoz,

Ndonj bakloz bakdaeh.

Gyonjcomz haeuj Veiningz,

Sam doih bing caez angq,

Lumj hai ruz haeuj gangj,

Dangq raemx lae roengz vaengz.

Hoenx bae geij fanh leix,

Saedceij hoj baenz maz,

Ndi miz haeux roengz gva,

Byaij cien bya fanh raemx.

Hungzginh mbouj lau haemz,

Dawz cungq gaenriengz dangj,

Gvaq bya sang dah gvangq,

Ak dangq gyoengq saenzsien.

Hungzginh mbouj lau hoj,

Doq hoenx doq ra gwn,

Deng bongj rumz rwed fwn,

Gwn nywj gwn byaekcwx.

Hungzginh caen yinghyungz,

Bouxgungz roemx seiqgyaiq,

Lwgminz rengz hungdaih,

Guh gaiqgaiq cix baenz.

Haj、Caez Hen Gya Hen Guek

1. Gouq Guek Saeh Youqgaenj

Fwjndaem goenjgeugeu,

Duzyiuh gvaengxgvax mbin,

Rumzhaenq cungj mbouj dingz,

Sarin sinzbyoegbyoeg.

Bing Yizbwnj Gvandoeng,

Hangzciemq dieg doengbaek,

Gwq henx cix gwq laeg,

Lij yaek hoenx cunghyenz.

（18）