Dahlanz roxnaj Daegyungj dwg youq aen cangj muengxbya Haijnanz ndeu.

Daegyungj youq aen cangj muengxbya guhhong gaenq sam bi lo, hoeng Dahlanz dwg boux mehmbwk dajgoeng ngamqngamq ciu haeuj cangj bae. Daegyungj caeuq Dahlanz vunz youq diegrog, baez dingq sing gangj, couh rox doiqfueng dwg vunz ranz- mbanj.

Vahsug gangj “boux doengzyieng doxraen, raemxda aeng’vangvang”, youq dieggyae, gij vunz roxnaj caemhcaiq doengzyieng miz geijlai boux? Dahlanz caeuq Daegyungj couh yienghneix dox ciuqgoq lo, maz vah cungj gangj, baez nanz le, songde cungj miz di cingzeiq lo. Miz ngoenz ndeu rumzliengz mbwn’gvengq, ban- haemh, Daegyungj caeuq Dahlanz byaij daengz henz haij, yawj daeng- ngoenz menhmenh doek roengzbae, Daegyungj naeuz Dahlanz:“Dangh- naeuz mwngz ndaej baenzneix baenz ciuhvunz buenx gou yawj daeng- ngoenz, geijlai ndei o!” Dahlanz rox gij eiqsei Daegyungj, hoeng de baenzlawz cungj gangj mbouj ok bak.

Baez ndeu hwnjban, Dahlanz deng gihgi dub sieng lwgfwngz, Daegyungj baez rox couh ganj bae yihyen yawj de. Geij ngoenz ndawde, Daegyungj cingjgyaj bae ciuqgoq Dahlanz. Lwgfwngz Dahlanz mbouj ndaej ning, Daegyungj couh lumj ganq lwgnyez nei bang Dahlanz swiq naj. Dahlanz baengh fwngz gwn haeux mbouj ndaej, Daegyungj couh aeu aen beuzgeng ndeu baenz amq baenz amq bwnq de. Sieng ndei le, Dahlanz coemj daengz ndaw rungj Daegyungj bae, gamjdoengh sing daej yaek dek bae. Daegyungj naeuz:“Haq hawj gou ba, ciuhvunz gou baenzseiq cungj in mwngz.” Dahlanz baez ndaejnyi, couh gietdingh caeuq Daegyungj doxbuenx daengz geq.

Bi daihngeih, Daegyungj caeuq Dahlanz ma ranz doxaeu lo. Aiq gij yienghsiengq Dahlanz mbouj lumj bohmeh Daegyungj siengjsiengq yienghde gyaeundei, hoeng Daeg- yungj gyaez Dahlanz, bohmeh Daeg- yungj laengz mbouj ndaej. Gvaq bi ndeu le, Dahlanz seng daeg lwgsai ndeu, Dahlanz youq ranz ciuqgoq lwgnyez, youh nyaengq gij hongnaz. Aenvih siengj hwnq aen ranzlaeuz moq duh bonjfaenh, Daegyungj couh riengz daxboh de bae aen diegdwkrin ndeu dajgoeng aeu cienz

Sam nyied dwg seiz ndaem naz, Dahlanz aemq lwgnyez bae ndaw naz ndaem naz. Hainduj, Daegyungj moix ndwen cungj dauqma mbat ndeu, doeklaeng baenz byongh bi hix mbouj dauq baez he. Liggaeuq ngux nyied cohaj, Dahlanz nyinhnaeuz Daegyungj dauqma gvaq ciet, couh gaj duz gaeq ndeu deq Daegyungj. Hoeng Dahlanz gwq caj gwq muengh, itcig daengz ndaundeiq ronghsagsag, Daegyungj lij caengz raen ngaeuz. Dahlanz saetmuengh lo, umj daeglwg ing youq bakdou daej. De baenzlawz hix siengj mbouj doeng, Daegyungj vihmaz bienqbaenz yienghneix lo?

Ngoenz daihngeih, Dahlanz aemq daeglwg byaij le ngoenz roen ndeu bae ra Daegyungj. Boh Daegyungj naeuz:“Daeuj gizneix guhmaz, vihmaz mbouj youq ranz dawz ranz ne?” Dahlanz naeuz:“Nanzdauh gou daeuj ra boux gvan gou mbouj baenz ha?” Daegyungj youq henz mbouj gangj vah, boh Daegyungj ciep naeuz:“Youzcaih mwngz, mwngz bae lawz bae de, ndawsim bouxlaux dou mbouj miz mwngz.” Daegyungj dingq le hix mbouj vih Dahlanz haeuj saek coenz. Dahlanz baez nyi couh vit daeglwg hawj Daegyungj, yaenq naeuz bonj- faenh yaek bae Bwzswz dajgoeng. Dahlanz nyinhnaeuz yienghneix guh, Daegyungj couh yaek rag de dauq. Hoeng Daegyungj yawj gij saeknaj daxboh le, mbouj miz damjliengh bae laengz Dahlanz dauq. Dahlanz dauq- daej bae Bwzswz lo, lizhai le Daeg- yungj, boux gaenq caeuq de gangj gvaq gij vahmieng gamjdoengh de.

Cungj naeuz aen sim mehmbwk dwg aeu daeuhfouh guh baenz, Dahlanz ngamq daengz Bwzswz ndaej sam ndwen, daxbaj ranznden ndaw mbanj dwk denva hawj de, naeuz laeq lwgnyez de fatndat naek, heuh de sikhaek dauqma. Dahlanz bonjlaiz dwg aeuqheiq cij buet ok rog daeuj, seizneix dingqnyi naeuz lwgnyez bingh lo, aen sim de lumj yaek dek nei. De lumj doq dauqbae, cij raen lwgnyez de ninz youq ndaw rungj daxbaj ranznden. Dahlanz cam daxbaj Daeg- yungj vihmaz mbouj daiq lwgnyez bae yihyen, daxbaj naeuz Daegyungj gaenq daiq boux dahsau ndeu bae ndaw singz guhcaemz haujlai ngoenz lo, lij caengz dauq. Dahlanz daej lo, de doq daej doq umj daeglwg buet coh veiswnghyen bae……

Daeglwg yaek ok yihyen seiz, Daegyungj caeuq boux dahsau ndeu ndwn youq bakdou veiswnghyen. Dahlanz coenz vah ndeu hix mbouj gangj, nyaenx gij haemz cien gaen naek ndawsim, umj daeglwg buet okbae.

Doeklaeng, Dahlanz caeuq Daeg- yungj doxliz lo. Dahlanz daiq daeglwg ma ranzdaiq, daeglwg caeuq yahdaiq goengda gvaq ndwenngoenz, Dahlanz daengz dieggyae bae dajgoeng ra ngaenz lo.

Mboengqgonq, Dahlanz youq gienbaengzyoux ndaw veihsin sij naeuz——“Baez doxaeu indot ndeu, caen hawj gou doeknaiq. Bouxsai caeuq mehmbwk doxaeu le, vihmaz mbouj ndaej lumj mwh ngamq doxgyaez nei doxmaij daengz geq? Maz doiq haij doiq bya gangj vahmieng, maz haij hawq rin nyug sim mbouj bienq cungj gaenq bienqbaenz fwj bienqbaenz rumz. Boux vunz aeu lai gyaez bonjfaenh, byaij maenh gij roen lajdin, sim’angq gvaq gij ndwenngoenz dangqnaj, aenvih gangj mbouj cinj daengzcog maz cungj rox bienq.”