4 nyied 27 hauh, bi 2024 “Gvangjsih Yinznanz Gveicouh sam swngj（gih） Heiqcuengh doxdax” hoz- dung（gietsaiq） youq Denzlinz Yen Heiqcuengh Cunghsinh banh, hawj gyoengq vunz gyaez yawj heiq gvaq- yinx lai.

Baez doxdax hozdung neix miz Yinznanz Swngj Funingz Yen、Gvangjnanz Yen caeuq Gveicouh Swngj Cwzhwngh Yen caeuq Bwzswz Si Yougyangh Gih、Cingsih Si、Dwzbauj Yen、Lingzyinz Yen、Lungzlinz Gak Cuz Swciyen、Sihlinz Yen 19 aen doih Heiqcuengh caeuq Denzlinz bonjdeih 73 aen doih heiq camgya. Ginggvaq cosaiq doxdax haenqrem, 92 aen doih camgya doxdax miz 20 aen doih gvaq ak doihde, doxceng gim、ngaenz、doengz 8 aen ciengj, caeuq bienheiq、daujyenj、bouxyienj ceiq ak daengj ciengj.

Ciuq cam rox, 《Ndaej Gienq Ranz Doxhuz》《Yw Gik Miz Fapndei》《Yiemhranz Ndik Raemx》《Cej Yangz》 daengj 20 aen heiqmoeg baugvat miz gyadingz doxhuz、saenqhwng lajmbanj、 gojgaeq ciuh- geq、ndwenngoenz vuenyungz daengj neiyungz, langhbaij Heiqcuengh seizdaih moq funggek lai yiengh, yienjok yienghndei lwg Bouxcuengh gaenxguh hozndei、 ciengq ak foux ak.

Heiqcuengh Baekloh daj Mingz- cauz byaibi Denzlinz Yen Giucouh Cin haenx hainduj, daengz seizneix gaenq ndaej 300 lai bi lizsij, de youq Denzlinz Yen doekfag、mwnhoengh、cienzswnj, Denzlinz Yen vunzlai gyaez yawj raixcaix. Bi 2024 “Gvangjsih Yinznanz Gveicouh sam swngj（gih） Heiqcuengh doxdax” hozdung muzdiz dwg daplaeb aen bingzdaiz doxgyau vwnzva, hawj doih heiq sam swngj(gih) caemhdaiz dox- dax, hawj Heiqcuengh vwnzva yienj- ok daj heiqbonj cauhguh、yienjok hingzsik、ndaek gyong roq laz、bouxyienj yienjheiq naengzlig daengj fuengmienh mboujduenh doi gaeuq ok moq, caezcaemh doidoengh gizdieg Heiqcuengh vwnzva doxgyau, hawj vunzbiengz lai rox lai yawj Heiq- cuengh.

(Lingz Cungh Luz Cwnggangh)