“Bineix ranz gou miz gosangh 16 moux, baez ciengx nonsei 4-4.5 ndoengj, seizneix gai 2 baez reh lo, baez ndaej 230 goenggaen baedauq.” 4 nyied 26 hauh, Nazboh Yen Bwzswngj Yangh Nazmungj Cunh Mbanjnazmungj boux ciengx nonsei Liengz Cunghbingh gaisau bineix ciengx nonsei cingzgvang：“Bineix reh gyaqcienz sang, goenggaen 65 maenz baedauq, gai ndaej 3 fanh lai maenz lo.”

Seizneix Gvangjsih cingqdwg reh nonsei seizcin baenz gai, dwg mboengq nyaengq ciengx nonsei byonghbigonq, daengx gih boux ciengx nonsei cungj lumj Liengz Cunghbingh nei, youq ndaw suen gosangh caeuq ranz ciengx nonsei nyaengqnyatnyat. “Bineix doxdaeuj, daengx gih mbwn hab gosangh sengmaj, reh seizcin miz gij daegdiemj ‘sam caeux、sam sang’ , couhdwg lwgnonsei ok cang seizgan caeux、 ciengx nonsei seizgan caeux、 reh baenz gai seizgan caeux, boux ciengx nonsei yiedcingz lai sang、fat lwgnonsei lai sang、 reh gyaqcienz lai sang.” Swcigih Canzyez Gisuz Doigvangqcamh mizgven boux fucwz gausai, raen bi’gvaq seizcou reh gai ndaej gyaqcienz, Gvangjsih vunz ciengx nonsei yiedcingz lai sang, lai roengzsim bae guenjhoh gosangh, hawj gosangh didnyez caeux、maj ndaej ndei, lij daezgonq dingh lwgnonsei、gyalai ciengx nonsei.

Ciuq cam rox, daengx gih lwgnonsei ceiq caeux youq 2 nyied ndawnyieb ok cang, daengz 3 nyied 31 hauh, daengx gih gyonj fat lwgnonsei gyalai 30.32%. 3 nyied co, Yinh- cwngz、Nazboh daengj dieg hainduj ciengx nonsei, riengzlaeng daengx gih gak dieg hainduj ciengx. 3 nyied 30 hauh, bineix baez nduj reh seizcin youq Nazboh Yen baenz gai, gyaq- cienz goenggaen 64 maenz, doengzbeij demmaj 14.3%, seiz baenz gai caeux gvaq bi’gvaq 8 ngoenz, riengzlaeng Yinhcwngz、Sanglinz、Cingsih、Yiz- couh、Liujcwngz daengj dieg reh laebdaeb baenz gai. Daengx gih reh baenz gai gyaqcienz laebdaeb sang, 4 nyied doxdaeuj bingzyaenz gyaq- cienz dwg goenggaen 58.15 maenz, doengzbeij demmaj 10.03%.

(Cinz Cing Gyaj Sezfungh Bwz Sez)