“Baenz haemh gou caenh deqdeq, deq mwngz deq cungj deq mbouj raen, cungj mbouj rox mwngz youq laeng gizlawz. Ndawsim gou caenh ndiepndiep, ndiep mwngz ndiep caenh mwngz boux ndeu, deq daengz seizlawz coh raen.” Riengzdwk “Sam Nyied Sam”nauhyied hwnjdaeuj, hot fwen Bouxcuengh 《Mwngz Youq Lawz》 youq gwnzmuengx hoengzhwngq lo, gyoengqvunz heuh de guh hot fwen bouxsaenz“Sam Nyied Sam Gvangjsih”. Gangj daengz aen ciet neix, vunzlai cungj nyaenx mbouj ndaej siengj daengz eu fwen，siengj daengz“gosien”Liuz Sanhcej. Hoeng cawzle fwen, mbangj dieg Gvangjsih youq mwh“Sam Nyied Sam” lij miz aen sibsug ndeicaemz ndeu heuhguh “bungq gyaeq”.

“Bungq gyaeq” youh heuhguh “daeuq gyaeq”, dwg seizgaeuq ndawbiengz Bouxcuengh gij sibsug guhcaemz caeuq sai mbwk gyau baengzyoux, cawjdaeuz youq rangh dieg Dahhoengz Gvangjsih riuz gvaq haenx raen haemq lai, lumjbaenz Bahmaj、 Duh’anh、Fungsanh、Majsanh daengj dieg. Hawfwen vunz lai vunz daih, mwngz caenx gou ndaenj. Ndawde aeu aen ndoengj cang gyaeq roxnaeuz aeu fiengz cug gyaeqcug (gyaeqgaeq、gyaeqhanq、gyaeqbit cungj ndaej) nyumx saek guh baenz roix haenx ceiq daegbied. Danghnaeuz sai mbwk bouxcoz eu fwen eu dwk cingz ngamj eiq hab, couh song boux youq dangqnaj vunzlai caez bungq gyaeq. Sai mbwk song mbiengj gak dawz aen gyaeq ndeu, ndwn doxdoiq, aeu byai gyaeq doxbungq. Mbangj dieg dwg yawjraen boux vunz hab’eiq, cij bungq gyaeq, bungq vaih le couh ngaiz gyau gyaeq hawj bouxhingz. Langh song aen gyaeq doengzseiz bungq vaih, couh nyinhnaeuz song boux neix mingh doxlienz, miz yienz ndaej giet baenz gvanbaz, song boux couh doxvuenh gwn gyaeq, lwgmbauq gwn gyaeqhenj, eiqsei naeuz ciengxlwenx mbouj bienqsim, lwgsau gwn gyaeqhau, eiqsei naeuz cungcig sienhsoh. Danghnaeuz mbiengj ndeu fouzeiq, couh hoh ndei aen gyaeq swhgeij, mbouj hawj vunz bungq vaih, couhdwg naeuz song boux mbouj miz yienzfaenh. Bungq gyaeq caeuq dwkdomq、eu fwen ityiengh, dwg aen sibsug “Sam Nyied Sam” dinghcingz youqgaenj ndeu.

“Sam Nyied Sam” bungq gyaeq lij miz aen cienznaeuz ndeu. Mwhgonq miz boux lwggyax ndeu, ranz de hoj raixcaix. Hoeng, boux vunz de gaenxguh simsoh, maij bang vunz. Miz boux lwgmbwk ranz caizcawj gyaez de dangqmaz, lwggyax goj aenvih mbwk neix simsoh, gig gamjdoengh, nyienh caeuq de doxndei baenzgya. Yienghneix lwgmbwk couh caeuq bohmeh de gangj lo, bohmeh mbouj doengzeiq, suj de youq ndaw rug. Lwgmbwk daengx ngoenz daejsebseb, mbouj rox baenzlawz guh, yinx ndaej bouxsaenz doengzcingz. Sawqmwh, duz funghvuengz ndeu mbin coh de, daiq de mbin daengz najranz laeng bouxyoux bae, ce song aen gyaeq funghvuengz cix mbin deuz lo. Bouxboh lwgmbwk daiq vunz gyaep daeuj, songde couh deuz okbae. Deuz daengz henz Dahhoengz mbouj miz loh le, dah neix mbon song aen gyaeq funghvuengz okdaeuj, hawj bouxyoux aen ndeu, swhgeij ce aen ndeu. Gyoengqde doxdoiq bungq aen gyaeq, ronghgim migmyanz, mbin’ok song duz funghvuengz, gak boux gag gwih duz ndeu couh mbin deuz lo. Songde daeuj daengz giz dieg moq, saedceij gvaq ndaej vuenyungz habhoz. Aenvih ngoenz songde deuz haenx dwg sam nyied cosam, ndigah, vunzlai couh youq ngoenz cietfwen “Sam Nyied Sam” bungq gyaeq, mbaenjgouz gyauyoux swyouz, baenzgya le gvaq ndaej ndei.

Danghyenz, aen sibsug “bungq gyaeq”youq Gvangjsih goj mbouj dwg “Sam Nyied Sam” gag miz. Moix bi mwh Laebcin ngoenzfouh daihhaj, couhdwg “cietngoenzsix”Dungcuz laeng Liujcouh Si Sanhgyangh Dungcuz Swciyen, ciet de youh heuhguh “cietcinsix”. Ngoenzneix ranzranz guh haeux- naengj lai saek、nyumx gyaeq lai saek、cawj doxgaiq ndeigwn, docih dojdaeh nyok hawj, caemh mbaenj bi moq doenghgo ndaej sou lai. Yienh neix Meizlinz Yangh Mbanjmeizlinz heuh ngoenzde guh “cietbungqgyaeq”. Gij gyaeq ngoenzciet mbanj de yungh haenx, itdingh dwg saekhoengz (yungh gij faenj vahoengz nyumx baenz), lij itdingh yungh daehgyaeq cang ndei, cij suenq caezcingj. Ngoenzneix, moix ranz cungj cinjbi bak lai aen gyaeqhoengz yienghneix. Gyoengq lwgnyez venj gyaeqhoengz youq gwnz ndang, bungqraen baengzyoux goj venj gyaeq ne, couh caemz “bungq gyaeq hoengz”, gij gyaeq byawz mbouj ngaiz dek couh hingz lo, eiqsei naeuz yaek miz seizheiq ndei.

Seizneix, bungq gyaeq engq lai dwg miz gij eiqsei ndei “bungq bungq bungq, bungq ok seizheiq ndei”. Lumjbaenz bi 2023 Dava Yauzcuz Swciyen Yenzdanh Cin guh hozdung“cien vunz bungq gyaeq fanh vunz eu”. Mboujlwnh sai mbwk geq oiq, vunzlai doxbungq gyaeq lai saek, caezhoh “Sam Nyied Sam”, hohfuk ndwen- ngoenz moq gyaeundei.