Bineix 4 nyied 11 hauh, liggaeuq ngoenz sam nyied cosam, Guengjdoeng daihdeih, roeg heuh va rang, mbwn gvengq ndit raeuj, cungqvunz sim- angq yangzyangz, vunzlai cingq angqcoux aenciet “Sam Nyied Sam” moix bi mbat ndeu haenx daeuj daengz. Couh youq ngoenzneix, wngq Sengj Guengjdoeng Moumingz Si mizgven bouhmonz iucingj, gou daiq Guengjsae Gvei Cin Hingh Vwnzva Yisuzdonz Cuzyingj Beixnuengx Gohdui cibngeih boux vunz, bae daengz Moumingz Si Denbwz Gih Sahlangz Cin camgya Sahlangz Cin Daih Cibbet Gaiq “Sam Nyied Sam” Vwnzva Lijyouz Yisuz Hozdung, dangdieg gyoengq beixnuengx angqcoux caeuq caencingz ciepdaih. Youq gij ndwenngoenz yienghneix, gyoengqdou sim’angq fouzbeij, vuenheij dangqmaz. Gyoengq beixnuengx Sahlangz caeux couh youq Sahlangz Cin Sinhcwngz Gunghyenz henz aen huz gvangqlangh ndeu dap aen godaiz lengjliklik ndeu, gwnzde sij miz seiq cih saw hung: “Beijfwen Doiqciengq”. Ngoenzhaenx banringzgvaq it diemj lai cung, dou couh bae daengz gizhaenx lo, youq henz godaiz aen rug ndeu, cang ndang veh naj, daenj ndei gij buhvaq minzcuz dou daiq bae haenx, yawhbienh hwnj daiz eu fwen. Seizhaenx, rogranz gyangdien aen yinhyangj haenx yiengjngaungau hwnjdaeuj lo, sing gig daih gig hung, cungqvunz baenz cien baenz fanh daj seiq fueng bet baih rumj daeuj, comz youq henz godaiz caeuq doiqnaj aen huz haenx, nauhyied dangqmaz. Doengzseiz, gwnz giuz aen huz haenx caemh comz miz haujlai vunz yawj nauhyied, aenvih lau giuz loemq, caemh lau miz vunz fan giuz doek dah, ndigah, gyoengq gingjcaz couh menhmenh gyaep gyoengq vunz haenx daengz doiqnaj aen huz bae, hawj gyoengqde youq henz huz diegnywj roxnaeuz lajfaex, gek aen huz haenx daj gyae muenghyawj gyoengqdou yienjok.

Seizgan daengz lo, boux guh cezmuz cujciz Couh Baujli caeuq Linz Yungzgoh fwngz dawz vahdoengz yamqhwnj gwnz godaiz, byaij daengz cungqgyang, yienjok sikhaek couh yaek haidaeuz lo. Song boux de ndwn youq baihnaj, dou caeuq gij beixnuengx Guengjdoeng geijcib boux vunz caemh menhmenh riengz byaij hwnjbae, ndwn youq baihlaeng song boux de.

Couh Baujli naj hai naj riu, sim’angq yangzyangz, de sien eu diuz fwen ndeu daeuj haiciengz: “Moix bi baez ndeu “Sam Nyied Sam”, angqcoux vunzlai daengz Sahlangz; miz hot fwen ndeu soengq doengzban(soengq hawj mwngz), bouxboux sim van baenz oijmoih.” Dou youq baihlaeng caemh riengz de ciengq, guh hoengh nauhciengz. Ciengq sat, de song boux couh sawjyungh vah Guengjdoeng(gangj hek) doiq gyoengq vunzyawj guh gaisau:“Ngoenzneix, gyoengq beixnuengx Guengjsae caemh daeuj daengz aen yienhciengz raeuz, Guengjsae Sanhgoh Yozvei nyuenz veicangj、Guengjsae govuengz Cinz Siengzcouh caemh daeuj daengz giz raeuz neix lo, ngoenzneix song aen sengj beixnuengx doengz daiz yienjok, gyoengqraeuz dopfwngz angqcoux gyoengq beixnuengx Guengjsae daeuj daengz!”

Henz daiz laj daiz, cungqvunz dopfwngz robrob. Ciep dwk, song sengj beixnuengx couh youq gwnz daiz byaujyenj cezmuz lo, beixnuengx Guengjdoeng cujyau dwg diuq foux, Guengjsae raeuz cujyau dwg eu fwen. Yienjok daengz gyang, boux cujciz lij anbaiz gyoengq canghfwen Guengjsae raeuz roengz daengz ndaw huz bae, youq gwnz song aen ruz iq eu fwen. Boux canghruz menhmenh vad ruz, dou menhmenh doiqciengq, ciengq gij fwen 《Liuz Sanhcej》, youh ciengq gij fwen dou laemzseiz bien haenx. Aen ruz menhmenh yiengq coh doiq hamq vad bae, hawj gyoengq vunzyawj doiqhamq yawjyawj gij yienghsiengq dou. Geij aen vuzyinzgih youq gwnz gyaeuj dou mbinlala ingjsiengq ingj sibinz. Dou itmienh eu fwen itmienh yiengq gij vunzyawj doiq hamq haenx vad fwngz, gyoengqde hix vad fwngz rubrub, naj hai naj riu, sim’angq dangqmaz, dou hix bouxboux gamjdaengz ndawsim raeujrubrub. Ngoenzhaenx, dou eu fwen, miz Vahcuengh, hix miz Vahgun, giethab ndaej ceiq ndei. Cawz eu fwen le, dou lij ciengq diuzgo《Youq Gwnz Byagim Baekging》, dou yungh Vahcuengh ciengq, beixnuengx Guengjdoeng yungh Vahgun ciengq, gig ngamj gig ndei, nauhyied fouzbeij. Doeklaeng dou lij yungh Vahcuengh Vahgun Yinghyij sam cungj vah daeuj ciengq diuzgo《Fwen Gingqlaeuj Bouxcuengh》, gyoengq bouxyawj cungj gamjdaengz hauqgeiz raixcaix, bouxboux hemqyaya hwnjdaeuj, sawj gij yienjok haenx dabdaengz gauciuz bae.

Ngoenzhaenx, dou eu miz bak hot fwen doxhwnj, gyoengq beixnuengx Guengjdoeng ceiq vuenheij, haujlai vunz cungj naeuz, gij fwen yienghneix hab hoz hab sim, ndei dingq ndei yawj. Seizneix, dou senj bouhfaenh daeuj daeng youq gwnz bauqceij, hawj gyoengq beixnuengx bouxdoeg raeuz caez yiengjsouh baez ndeu.

Gou dwg Mbanjcuengh roegvenz nyaeq,

Mbin daeuj gizneix guh Fwencuengh;

Vwnzva gyaulouz caen miz muengh,

Va ndei hai hoengh rim gwnz bo.

Minzcuz vwnzva binjbaiz rang,

Ngoenzneix Sahlangz dap godaiz;

Gyoengqraeuz yienzfaenh ndei lailai,

Eu fwen hwnj daiz caj mwngz daeuj.

Sahlangz dieg neix caen cix lik,

Bya heu raemx bik funggingj ndei;

Daeuj daengz gizneix caen vuenheij,

Mbouj yungh caiq bae yawj Suh Hangz.

Sahlangz gyaeundei youh caenciet,

Minzcuz doxgiet hai va nding;

Sevei doxhuz youh onjdingh,

Hingfuz swnghhoz lumj fwjmaeq.

Ngoenzneix angq gvaq sam nyied sam,

Beixnuengx sim van riuhaha;

Eu fwen roq gyong youh ndaek laz,

Beijfwen mbin gvaq gwnz byai naux.

Daeuj daengz Sahlangz sim hai va,

Guhlumj duzbya ndaej roengz daemz;

Seiqfueng beixnuengx hai sing’yaem,

Beijfwen dek swenz cienz dienyah.

Mbatneix gyoengqdou daengz Guengjdoeng,

Gyoengqsou dak dou lumj beixnuengx;

Guhhong yiedcingz caen mbouj ruengx,

Hawj dou beixnuengx angqvauvau. （1）