“Sam Nyied Sam” dwg aen ciet lai aen minzcuz caez miz caez gvaq ndeu, aen de miz gij vwnzva naekna haenx, lizsij gyaeraez, ndaej gyaepra daengz cietsangsw Senhcinz. Sangsw youh heuhguh ngoenzsiuhhi, couhdwg ngoenzsw daih’it laeng sam nyied ndawco lighah.

Bouxgonq guek raeuz youq ngoenzsangsw buizcaeq、mbaenjgouz bouxsaenz, nyinhnaeuz ndaej gyaep yakrwix ndoj cai. Handai aeu sangsw guh ciet, dieg cunghyenz daj bouxhak daengz vunzbiengz, mwh de cungj guh aen yizsiz “fuzhi” bae gyaep yakrwix hohfuk, cawz gij uq gaeuq- geq. Daengz Sungcauz, mwh de yawjnaek laexgyauq, aen fungsug sangsw “Sam Nyied Sam” hailangh lai, youh aenvih aen ciet neix caeuq Cingmingz、cietnit gek mbouj nanz, sam aen ciet de ciemhciemh dox- yungz, vunzlai cunghyenz couh mbouj caiq gvaq cietsangsw. Hoeng, “Sam Nyied Sam” youq dieg baihnamz cix bienqbaenz aen ciet cienzdoengj ndeu, ndawde Bouxcuengh、Bouxyaej、Dungcuz、Lizcuz、Gwzlaujcuz、Yauz- cuz、Sehcuz、Mulaujcuz daengj guh ndaej ceiq hoengh. Nanzsung Couh Gifeih youq ndaw《Bang Lingjvai Dap》 couh gangj daengz cungj hozdung neix:“Ngoenzsangsw, sai mbwk doxcomz, gak baiz baenz doih, aeu duq hajsaek guh giuz, doq eu fwen doq bau aen de okbae, neix heuhguh feihdoz (doz couhdwg aendomq, cungj doxgaiq cienzdoengj Bouxcuengh）. Bouxsai mehmbwk doxraen doxgyaez, mehmbwk ciep aendomq couh dwg caeuq bouxsai dinghmingh. ”

Mboujlwnh dwg aen cietsangsw cunghyenz ciuhgeq, roxnaeuz aen “Sam Nyied Sam” gak minzcuz nauhyied seizneix, cungj yienjok Cunghvaz Minzcuz ndiepgyaez seng- mingh、gingqfug swhyienz, maq- muengh caeuq gyaepgouz ndwen- ngoenz ndei. Neix caemh daejyienh le vwnzva gak minzcuz doxgap doxingj, yienjok gij yienghndei lai yiengh Cunghvaz vwnzmingz.

(Caizliuh daj 《Cunghgoz

Minzcuz Bau》 aeu daeuj hoiz)