Gozvuyen yaenqfat《Aen Ganghyau Canloz Gveihva Fazcanj Cunghyihyoz (Bi 2016—2030)》, mingzbeg doekdingh daezok aeu“doidoengh Cunghyihyoz haeuj hagdangz、segih、lajmbanj、gak gya gak hoh, dawz cihsiz giekdaej Cunghyihyoz nabhaeuj gij goqcingz vwnzva cienzdoengj、swnghlij veiswngh cunghsiujyoz.” Gungjswj caemh son hagseng naeuz：“Lai nyinh gij mingzcoh doenghduz doenghgo.” Hawj vwnzva cihsiz Cunghyihyoz haeuj hagdangz、haeuj ndawsaw, yienjok aen leixniemh son’gyauq lai yiengh. Neix bang bouxcoz lwgnyez rox daengz gij vwnzva cienzdoengj ndei Cunghvaz, hawj lwghag gagsaenq gagrox gij vwnzva、minzcuz raeuz gig ndei. Hawj lwgnyez daj iq couh rox Cunghyihyoz、saenq Cunghyihyoz、rox yungh Cunghyihyoz, mboujduenh gungganq gij cingzvaiz Cungguek caeuq vwnzva gagsaenq lwghag, daj ndei giekdaej saenqhwng saehnieb Cunghyihyoz.

2016 nienz 10 nyied doxdaeuj, hagdangz dou dawz swnjcienz vwnzva Cunghyihyoz gyoebhaeuj goqcingz, lai youq gwnz hagdangz daujlun, daengx gyoengq lauxsae cungj doengzeiq aeu moux lai dieg daeuj ndaem go ywdoj lai yiengh, ancoh“Suenbaknywj”, caemhcaiq dingh baiz sij coh sij gij yunghcawq doenghgo. Cienzmienh hai dangz goq, youz lauxsae Vangz Vazcingh、Couh Vei bae son, moix aen singhgiz haj dangzgoq daihroek cujciz ban hag- seng ndeu daengz Suenbaknywj guenjleix caeuq nyinh goyw, gangj- gangj goyw miz maz yungh, caemh- caiq son hagseng yaebyw guh byauh- bwnj. Gyoengq lwghag caencingq lumhmo gij “saw lix” neix, hawj Cunghyihyoz vwnzva haeuj goqdangz, haeuj ndaw cingsaenz caeuq ndwen- ngoenz hagseng, gikcoi gyoengqde sim’angq swnjcienz vwnzva Cungh- yihyoz.

Youq gwnzgoq nyinh go ywdoj, hagseng ndaw hag angq dangqmaz, moix baez youq ndawhag doxnyangz, hagseng couh lumj roeggacak ityiengh humx gou redrwd, mwngz song coenz de sam gawq:“Lauxsae, mwhlawz dauq daengz ban dou guh byauhbwnj?”“Lauxsae, gou youh yaz ndaej sam mbaw byauhbwnj lo, seizlawz bang gou nem mbawmoz ne?”“Lauxsae, gou dawz mbaw byauhbwnj ma ranz, daxmeh haenh gou yaz ndaej gyaeu!” Hagseng Vangz Yijcinh youq ndaw faenzcieng sij naeuz:“Gou daegbied gyaez daengz aen Suenbaknywj hwnjdangz, youq ndawde gou mboujdanh rox haujlai go ywdoj mizmaz yungh, lij hag guh byauhbwnj, majhung le gou hix siengj guh boux canghyw cunghyih, bang vunzgungzhoj yw- bingh cix mbouj yungh maz ngaenz.”

Daj lai son dangzgoq neix le, haujlai lwghag engq gyaez yenzgiu go ywdoj, gag cawx saw daeuj cazyawj. Haj nienzgaep daxboh Vangz Cinhauz lwnh gou naeuz:“Lauxsae, daj hag nyinh go ywdoj le, Cinhauz haeuj ranz ma mbouj yungh gou coi hix mbouj yungh gou fok, mbouj angq soujgih caemh mbouj yawj densi, supsep gwn vanj cuk couh vaiq guh cozyez. Guh cozyez sat, gaem bonj saw ywdoj gag yawj dinghcubcub, laemxseiz lij gaem nge ywdoj duenz dou, raen dou gangj mbouj ok, couh lumj boux lauxsae ityiengh lwnh hawj dou dingq, laemxseiz cix gag dawz ywdoj daeuj yaz guh byauhbwnj.”

Gangj daengz guh byauhbwnj, hixdwg gaujniemh hagseng miz mbouj miz naihsim. Yaeb goyw ma le, aeu vaiqdi ciuq gij siengjfap cihgeij baez mbaw baez mbaw mbe bingz. Yawj daeuj yungzheih, hoeng, guh daeuj cix gig nanz. Mizbaez ngamq mbe ndei mbaw neix, mbaw haenx couh dauq sup hwnjdaeuj, ngamq baij ndei mbiengjlaj, mbiengjgwnz youh dauq luenh liux. Miz mbangj lwgsai aenvih mbouj miz naihsim, mbaet goyw ma le couh oetak haeuj ndawsaw liuxsaeh, song aen singhgiz dauq hai daeuj yawj, ndaemndat yup ndeu, dauqdaej go maz cix yawj mbouj ok lo. Hoeng, haujlai lwghag rox guh byauhbwnj le, hagsib engq miz naihsim, roeb daengz daez nanzguh mbouj caiq lausumsum, cix dwg menhmenh fanfoek doeg daez, veh ok gij swz youqgaenj, yawj gawq gwnz caeuq gawq laj, sij ok dapanq.

2022 nienz 10 nyied 22 hauh lingx hwnjdangz yiengj, gyoengq lwghag riengjret daengz Suen- baknywj, go ywdoj ndeu hawj gyoengqde ngeizvaeg dingz din roengzdaeuj. Gwnzyw dawzmak baenz roix baenz roix, mbangj roix heuoiq, mbangj roix saekhenj, mbangj roix saekhoengz, mbangj roix cix ndaem’aeuj. Gangj saedvah, gou yienznaeuz son dangzgoq neix, hoeng, Suenbaknywj haujlai goyw gou cix caengz raen gvaq, engq mbouj rox de miz maz yungh, gou couh caeuq hagseng itheij hag, mbouj rox couh bae gwnzmuengx cazyawj. Go yw maz, mizmaz yungh ne? Gou caeuq lauxsae Couh Vei sikhaek dawz soujgih okdaeuj ingjsiengq, caengz caj dou ingjsiengq ndaej, Vangz Cinhauz buet daeuj sing sang hemqnaeuz:“Lauxsae, gaej ingj lo, gaej ingj lo, go neix dwg go gyajyinghcaj, mboujsaenq, mwngz sij gyajyinghcaj cazyawj!”Sij gij coh baez diemj, fuk doz diuq okdaeuj, gij saw caeuq de gangj ityiengh, caen dwg go gyajyinghcaj. Gijmaz dwg swnghhoz? Swnghhoz dwg gij sengmingh hozdung hagseng, gij swnghhoz hagseng dwg cienz fueng- mienh. Neix couhdwg lauxsae son goekgaen, neix couhdwg gij muzdiz vwnzva Cunghyihyoz haeuj goqdangz, neix couhdwg gij cozyung swnjcienz vwnzva Cunghyihyoz ceiq ndei de.

Vihliux son cihsiz engq haeuj- sim, coicaenh sonhag ndaej baenz, hagdangz dou dawz nyinh go ywdoj gyahaeuj gak cungj hozdung bae. Aen ciet lwgnyez bi 2023 daegbied dangqmaz, hagdangz dawz nyinh go ywdoj caeuq youzyenz hozdung doxgap daeuj angq. Gou dawz sieng dangzbingj cuengq youq bak Suen- baknywj, hagseng laebdaeb humx gvaqdaeuj, supsup sepsep cam:“Lauxsae, neix miz maz hozdung?”Baez dingq naeuz “nyinh go ywdoj, ndaej genjdanh daezdaengz mingz- coh, gangj ok gij yunghcawq, couh ndaej dangzbingj, gangj ndaej lai couh ndaej lai”, caezgya sikhaek angqvauvau baizdoih sohfwd, yaepyet couh lumj duzlungz baiz dwk raezrangrang, it daengz roek nienz- gaep cungj gaenxmaenx camgya, bouxboux sim’angq raixcaix.

Moix baez lingjdauj daengz hagdangz genjcaz, hix daeuj Suen- baknywj byaijbyaij, mwh haenx gyoengq lwgnyez ceiq angq lo. Hagseng cungj ceng gonq lau laeng daeuj ndomqyawj, engq nyaenx hagsib, engq gyaez guh byauhbwnj.

Suenbaknywj couhdwg goq- dangz. Saedguh cwngmingz, lai fuengsik cienzgangj sonyinx, gij fwnhveiz ndei、vaiqvued sonhag cizgiz doidoengh swnjcienz vwnzva Cunghyihyoz. Hagdangz dou itdingh laebdaeb guh ndei Suenbaknywj, yungh ndei bonj “saw lix” neix, sonyinx hagseng hag vwnzva Cunghyihyoz, hawj lwghag rox engq lai, mboujduenh doidoengh vwnzva Cunghyihyoz hwngfat.