It

Gaxgonq gwnzhaw baengz noix, gyoengqvunz Mbanjcuengh yaek miz buhvaq daenj couh aeu guh baengzdoj.

Aen sigij gonq, lwgmbwk Mbanjcuengh bouxboux rox guh baengzdoj.

Yaek guh baenz baengzdoj, sien daksauj gij faiq youq ndawreih gip dauq haenx, ciepdwk gaujfaiq——dawz ngveihfaiq gauj okdaeuj; goengfaiq——dawz faiq mboeng ndei; laenh- faiq——dawz gij faiqmboeng haenx laenh baenz reh; dazfaiq——dawz faiqreh daz baenz mae; lakfaiq——dawz mae heux baenz foenq; cawj- faiq——aeu gij raemxgiengh haeuxyangz cawj foenqfaiq baez ndeu; baenq lwt——dawz foenqfaiq baenq haeuj aen lwt bae; hoijrok——dawz baenz aen baenz aen loekmae heux hwnjdaeuj; daemjrok; nyumx baengz——aeu romj daeuj nyumx, yienghyiengh caenfwngz caen ndang guh.

Ranz gou vunz lai, daxmeh haethaemh caengz okhong seiz couh ganq guh baengzdoj. Gou daj roxsaeh daengz doeg sat gauhcungh, gwnzndang daj gwnz daengz laj cungj daenj baengzdoj, miz seiz lij fong gumq fong gyaeujhoq dem.

Seizneix gaenq mbouj miz vunz caiq yienghneix guh baengzdoj, gij baengzdoj geijcib bi gaxgonq guh baenz haenx couh bengz lo.

Gou maij soucomz baengzdoj, doenghbaez daengz lajmbanj bae, gou cungj maij cam bouxgeq miz mbouj miz baengzdoj, bungzdaengz miz baengzdoj gou couh cawx dauq ranz yo, bit baengzdoj hajcib hoed, baengzdojndaem bit 200 maenz, baengzdojgek bit 150 maenz. Geij bi roengzdaeuj gou couh rom ndaej mboujnoix bit baengzdoj. Gij baengz neix miz seiqcib bit doxhwnj lo, yawj hwnjbae miz di gaeuq, mbouj youqgaenj, gij baengzdoj caenfwngz guh baenz neix, ciuhneix、ciuhlaeng roxnaeuz daengxciuh caiq mbouj miz lo, gou yied yawj yied roxnyinh gij baengzdoj neix dij.

Ngeih

Dingz dwg hujgeiq gou, bingzseiz dou baez miz saeh cungj doxra, baez miz vah cungj doxlwnh. Ngoenz ndeu Dingz roengzban doxdauq, daengz bakdou ranz gou le dingz ci roengzdaeuj, haeuj ranz daeuj caeuq gou cimz caz gangjgoj.

Dingz naeuz:“Raeuz aeu baengzdoj bae caiz boux geu buh daenj yawj baenz mbouj baenz vei.”

Aeu baengzdoj caiz buh couh caiz buh- dangzcangh, ciuhgonq hix heuh guh buhgoujgaet. Gou naemj, Dingz ndang hung naj seiqcingq, daenj buhbaengzdoj itdingh baenz yawj. Gou naeuz:“Ndei, ngoenzlawz raeuz song boux cungj ndaejhoengq couh bae caiz.”

“Lij caj daengz seizlawz bae, seizneix raeuz couh bae caiz.” Dingz naeuz.

Caiz buh, hawj bouxlawz caiz? Gwnzhaw canghcaizbuh miz daihbaj. Caiz buhbaengzdoj hawj bouxlawz caiz? Bouxlawz rox caiz buh- baengzdoj? Dingz naemj mbouj daengz gij neix.

Gou naeuz:“Gou miz boux yahnax ndeu, de dwg vunz giz raeuz, de hix rox caiz buhvaq, raeuz bae yawjyawj de rox mbouj rox caiz buh- baengzdoj, ndaej mbouj ndaej caiz buhbaengzdoj.”

Gou hix caeux couh naemj caiz geu buhbaengzdoj he, seizneix song ndaek gangj doxdeng, gangj guh couh guh, mbwn caengz laep, dou couh bae ra yahnax caiz buh.

Sam

Daeuj daengz ranz yahnax, cam de rox mbouj rox caiz buhbaengzdoj, de ndaej mbouj ndaej caiz buhbaengzdoj, caiq gangj ndei ngaenz dinfwngz aeu geijlai. Yahnax naeuz, baengzdoj na lai, ci hwnjdaeuj sinhoj, caiqgangj buhdangz- cangh aeu guh gouj naed gaet, gij lwggaet neix deng gag gyaez, caiz geu buh he aeu seiqcib maenz cij ndaej.

Gou soqlaiz yawj mbouj ndaej vunz sinhoj, hix mbouj gamj dam bienzngeiz, couh naeuz: Gawqyienz baenzlai sinhoj, dou couh hawj geu hajcib maenz hawj mwngz ba, mwngz ndeindei caiz、 ndeindei ci hawj dou couh ndaej.

Ciepdwk couh rau baengz、dag ndang caiz buh, bit baengz cingq ngamj gaeuq caiz song geu buh.

Geijcib bi mbouj daenj buh baengzdoj, gig muengh yahnax vaiq di ci baenz hawj dou. Bouxgvan yahnax gvaqseiq lo, de boux ndeu ciengx lwg, ngoenzngoenz aeu ok haw bae baijdan gaij buh roxnaeuz hwnj dinvaq hawj vunz, mbouj ndaejhoengq hawj dou ci baenzlai vaiq. Gou gag naemj, yahnax daiq sinhoj lo, danghnaeuz de ci gij buh dou daenj ndaej ndei, dou caiq lai hawj de di ngaenz dinfwngz hix ndaej.

Geij ngoenz gvaqbae, buh ci ndaej le, dou daenj buh hwnj ndang, roxnyinh hab ndang youh baenz yawj, daenj ok rog bae, bouxboux haenh- ndei.

Miz sam ndaek baengzyoux raen dou daenj gij buhbaengzdoj neix ndeiyawj, gyoengqde hix naemj bae caiz.

Song bit baengz gaeuq caiz seiq geu buh, sam boux baengzyoux sam geu buh, gou couh daiq song bit baengz bae. Yahnax coengh gyoengq baengzyoux gou dag ndei ndangdaej, gou cuengq song bit baengz hawj yahnax le couh geij boux guhdoih dauqbae.

Seiq

Ngoenz ndeu lajbyonghngoenz, yahnax dienhvah naeuz gij buh baengzyoux gou ci ndaej lo. Gou dawz aen siusik neix cuenz hawj gyoengq baengzyoux, gyoengqde dingq le, angq lumj guk okroet nei, baez roengzban couh ndang mbouj swiq, haeux mbouj gwn, doxgyaep doxlaeh bae ra yahnax aeu buh.

Yahnax guh canghcaiz geijcib bi, dinfwngz leih, buhmoq daenj ndaej gig hab ndang. De dawz buh gyau hawj dou le, dou couh yaek dauq bae lo, gou miz di sim genx, roxnyinh lumjnaeuz lij miz di saeh dem. Gou baenq gyaeuj dauq laeng cam:“Mbouj lw saek di baengz lwi?”

“Lw dwg lw di, mbouj rox cuengq youq gizlawz, ra mbouj raen gvaq.” Yahnax naeuz.

“Lij gaeuq caiz geu buh he bw, naeuz mbouj raen couh mbouj raen la?” Gou gag naemj.

Naemj dwg naemj, bouxgeq naeuz “roxnaj gaj dai” gawqyienz de gaenq naeuz mbouj raen, hix mbouj ndei eiqsei caiq cam, ndaw sim gag naemj lingh coenz vah bouxgeq: Cangh lawz cangh mbouj gwn faex, sae lawz sae mbouj gwn namh.

Geij ngoenz gvaqbae, youh miz baengzyoux heuh bae guh buhbaengzdoj, gou naemj bae gizwnq caiz, youh yaepseiz mbouj rox gizlawz miz vunz rox caiz, naemj bae ra yahnax caiz, gienhsaeh baez gonq youh lumj duz fangzraq nei youq ndaw ukgyaeuj baenqcienq, hawj gou cibfaen mbouj nyienh caiq bae ra de.

Baezneix hix miz sam boux baengzyoux aeu caiz, hix yaek daiq song bit baengz bae cij ndaej, danghnaeuz caiq lumj baez gonq, song bit baengz caiz ndaej sam geu buh baengz couh mbouj lwi saekdi, gou caen goembonj lo.

Gou dawz gienh saeh neix caeuq Dingz naeuz, Dingz naeuz:“Mwngz caen huk, mwngz heuh de caiz ndei caiq dauq ha, de dangq naj raeuz caiz, lw mbouj lw baengz couh rox hani.”

“Saeh mbouj doengzhangz, dangq gek goengq byasang. De naemj gwn baengz, caiq naeuz dangqnaj raeuz caiz, raeuz hix yawj mbouj ok.” Gou naeuz.

Caiq bae ra yahnax caiz buh seiz, gou heuh de it boux it caiz, yahnax naeuz ndei.

Song bit baengz caiz ndei sam geu buh le caen lw donh baengz he, gou heuh yahnax rau baengz yawjyawj lij miz geijlai dem, baez rau, cingq ngamj ndaej guh geu buh he dem.

Gou naeuz:“Dwg mbouj dwg song bit baengz baez gonq dinj lai, cij caiz ndaej sam geu buh ni?”

Yahnax dingq le naj nding liux, naeuz:“Baez gonq gou rox hix lw baengz, hoeng caen ra mbouj raen lo, gou mbouj ndei gangj lai. Guh gaiq hong neix, ra baengz mbouj raen baenzlawz gangj hix gangj mbouj hau.”

Yahnax miz di youq mbouj baenz, gou hix miz di youq mbouj onj. Seizneix, boux naihlaux betcib lai bi he dawz bit baengz he haeuj ranz daeuj naeuz:“Gou doiq gyoengq lan naeuz gou lij coz seiz rox daemj baengz guh buhvaq daenj, gyoengq lan mbouj saenq, hix naeuz mbouj raen baengzdoj dwg baenzlawz yiengh, cib lai ngoenz gonq gou daeuj ra mwngz youz, mbouj raen mwngz youq, raen gwnz daiz miz di baengzdoj neix couh dawz bae ranz hawj gyoengq lan yawj, dajsuenq gvaq yaep couh dawz daeuj boiz mwngz, siengj mbouj daengz gou daengz ranz couh fatbingh, deng soengq bae yihyen lo, yw le cibgeij ngoenz cij ndaej dauqma.”

“Dai lo, mwngz yaek haih gou lo.” Yahnax lumj yaek gwn mbei naihlaux nei.

Naihlaux naeuz, de lij coz seiz daemj gvaq baengzdoj, ndawranz hix yo miz mbouj noix baengzdoj, doeklaeng deng feiz remj ranz, gij baengzdoj caeuq gij doxgaiq guh baengzdoj de cungj deng feiz coemh baenz daeuh liux, doeklaeng de couh gaen daeglwg daengz ndawsingz gwnyouq, caiq mbouj guh baengzdoj, ndaw ranz caiq mbouj raen gvaq baengzdoj.

Gou naeuz:“Mehbaj, danghnaeuz mwngz naemj aeu baengzdoj bae guh geiqniemh, couh soengq di neix hawj mwngz ba.”

Mehbaj naeuz:“Mbouj mbouj, gou ndaej gyaeu geijlai bi dem, gij baengzdoj caenfwngz guh neix caiq mbouj miz lo, mwngz ndeindei rom hwnj ba.”

Naihlaux gangj sat couh dauqbae lo, duz ngaeuzlaeng hwetgaeuz de, youq ndaw mokhaemh ciemhciemh mboujraen lo.