Sai:

Seizcin fwn iq roengznyainyai,

Bak va cien va ceng daeuj hai,

Mbanjcuengh hawfwen vunz lumj haij,

Mehmbwk bouxsai hwnj godaiz.

Mbwk:

Daeggo dahnuengx caez eu fwen,

Aeu fwen cienz cingz baengzyoux lai,

Nuengx cam go dap caen simhai,

Byawz siengj aeu yah hai dungxcaiz.

Sai:

Ndaej caeuq nuengx doxnyangz,

Sim angqyangz,

Lumj gwn dangz haeuj bak;

Aeu fwen daeuj guh cag,

Cam caeuq dap,

Dawz sim rag giz ndeu.

Mbwk:

Danghnaeuz miz bonjsaeh,

Gou hix eiq,

Lau mwngz beix gag deuz;

Mbouj miz liengh gaej iu,

Deng vunz riu,

Gij nyouh biu saetnaj.

Sai:

Gou dwg boux canghfwen,

Singyaem rwenz,

Boux govuengz hix haenh,

Gangj daeuj mwngz mbouj saenq,

Daengz seiz dingq,

Heuh mwngz ndwnj myaiz loeng.

Mbwk:

Bangxdat miz dujva,

Ingj lwgda,

Miz oen gaz nanz mbaet,

Henz miz golwgfaet,

Caeuq duzmaed(duzmoed),

Byawz gamj mbaet dawz ma?

Sai:

Bangxdat miz dujva,

Ingj lwgda,

Baeq hix gaz(bin) bae mbaet,

Mboujguenj loh yawz saek,

Baenzlawz ngaeg(lingq),

Cungj aeu baek bae dawz.

Mbwk:

Maz vunz rengz ceiq hung?

Miz aen cung,

Saedcaih caen geizheih,

Seizseiz dwg yienghneix,

Ngaih vunz eiq,

Mwngz cai seih maz cung?

Sai:

Cungqvunz rengz ceiq hung,

Aen cazcung,

Cin daengz doeng cungj yungh;

Danghnaeuz guh vueddoengh,

Guh laex soengq,

Vunzlai cungj simvuen.

Mbwk:

Maz dan gwn mbouj ndaej?

Raeuz aeu geiq,

Maz vunz gaej swiqndang?

Go lawz maj ceiq sang?

Miz maz gang,

Mbouj dwg caeng raemx yungh?

Sai:

Dezdan gwn mbouj ndaej,

Raeuz aeu geiq,

Vunznaez gaej swiqndang,

Gosang maj ceiq sang,

Cih gim gang,

Mbouj dwg caeng raemx yungh.

Mbwk:

Bouxcuengh gyoengqvunz haengj,

Guh haeuxnaengj,

Lij miz faengx caeuq ceiz;

Vunzlai cungj haenh ndei,

Bei(bi) dem bei(bi),

Mwngz naeuz seizlawz guh?

Sai:

Sam nyied sam haeuxnaengj,

Haemhndaep haengj,

Guh haeuxfaengx gvaqcieng;

Youq duh raeuz gwnzbiengz,

Bouxgeq cienz,

Ceiz mbouj yiem doengceiq.

Mbwk:

Sanglinz maz mizmingz,

Youq ndawsingz,

Cawx mbouj in ngaenzceij?

Byawz mup daengz gij feih,

Angq fouzbeij,

Myaiz couh seih lumj mboq!

Sai:

Haeux Sanglinz mizmingz,

Cienz mbouj dingz,

Vunz ndawsingz cungj haenh;

Feihdauh rangfwngfwng,

Gwn youh unq,

Vunzlai haengj dangqmaz!

Mbwk:

Duzroeg raen nywjnyungz,

Mbouj caengz gwn,

Cungj dwg ndwnmuengmueng;

Duzgyau nyaengq giet muengx,

Mwngz cai ngonz,

Dwg dajsuenq guhmaz?

Sai:

Duzroeg raen nywjnyungz,

Ndi caengz gwn,

Dwg ra vunz daeuj buenx;

Duzgyau nyaengq giet muengx,

Miz dajsuenq,

De maqmuengh ra gwn.

Mbwk:

Roegnyanh youq gwnzmbwn,

Doengzcaez mbin,

Vihmaz bingz baenz raemx?

Hwnj sang youh roengz daemq,

Bungz deng nanh,

Maz mbouj haengj doxliz.

Sai:

Duz roegnyanh caez mbin,

Gaeuq coengmingz,

Giemh rengz mbin gyae’gyangq;

Youq gwnzroen simsangj,

Langh miz nanh,

Cungj mbouj sanq doxliz.

Mbwk:

Vunz bae cawx batgak,

Ndei rox yak,

Sien aeu bak daeuj suengz(cimz);

Roegga boih funghvuengz,

Giet imyuenz,

Lawz byaij roen daengzgyaeuj?

Sai:

Dungj Yungj vunz sinhoj,

Aen sim soh,

Baenzciuh guh gai fwnz;

Gwnzmbwn baez yawjraen,

Cungj gag yaen(doeksaet),

Dahsien caen daeuj coh.

Mbwk:

Bak vad lumj youz cat,

Baez haibak,

Gij fwen dap baenz baiz,

Suenq mwngz dwg vunz gvai,

Dwg wnggai,

Gangj haujlai bouxyoux.

Sai:

Ronggya ha rumdoiq,

Caez gietboiq,

Lawz guhdoih ciuhvunz,

Ma doxceng gvaq ngoenz,

Da doxcaengz,

Lawz ndaej baenz doxbuenx?

Mbwk:

Bouxboux cungj mbouj hob(hab),

Aeu unq dog,

Cij nanz ok ndaej yinz;

Diemjdaeng gvaq lajmbwn,

Gyawz miz vunz,

Boiq ndaej mwngz cij ngamj?

Sai:

Ciuq faenh gou swhgeij,

Aen sim’eiq,

Aeu ndaej maex doengz mwngz,

Lingzleih youh coengmingz,

Sienh youh swnz,

Ninz gwnz oen hix ndaek.

Mbwk:

Mwngz gaej haenh nyaenx lai,

Gou mbouj gvai,

Lumj cwz vaiz ndaw riengh,

Aeu yiengh mbouj miz yiengh,

Engq ndi lengj,

Gaej luenh siengj cij baenz.

Sai:

Daekbaengz aen godaiz,

Raen nuengx gvai,

Sim caenh hai hab’eiq,

Faj naj yiengh hoengzmaeq,

Caencaen seih,

Lumj ndwenngeih vadauz,

Hoengzhoengz youh hauhau,

Gaeuq dungxnyauz,

Raen nuengxsau simsangj.

Mbwk:

Cin raeuj daihdeih,

Doenghgo gwnzngeiq hai va;

Raemx moq haeujma,

Ndawdaemz gij bya doxcaenh.

Sai:

Yamq haeuj seizcin,

Roegenq couh mbin hoenghdouh,

Duzmeh gaen duzboux,

Vuenheij diuqfoux mbouj daengx.

Mbwk:

Daeggo caen gvai,

Ndawsim caenh hai dahraix,

Caeuq go caez haij,

Vaiqvued ndaej beij bouxsien.

Sai:

Cingz youq sing fwen,

Sing yiengj lumj mae rag,

Go nuengx doxdap,

Baenzlawz hix bag mbouj hai!

Gab:

Ngoenzneix sam nyied sam,

Raeuz godaiz roxnaj,

Raeuz song boux got mbaq,

Gwnzmbwn baj hix lau;

Caezsim daengz byoemhau,

Vah fugfauz mbouj gangj,

Cij aeu ndangdaej cangq,

Aen gyadangq hix mwn.