Mboengqneix, gicej bae Hozciz Si Denhngoz Yen Bohgez Yangh Yauzsanh Cunh caijfangj, youq ndaw ding langhbaij vwnzva mbawcaz Yauzsanh Cunh, gicej yawjraen Cazyauzsanh baucang baenz gak cungj gak yiengh; youq dieg cimz caz, gicej ndaej cimz gij caz feih homfwdfwd diemzsubsub.

Gocaz Yauzsanh sengmaj youq byasang haijbaz 800 mij doxhwnj, gyangbya ndawndoeng daengx bi mokngeungeu, fwnraemx cuk. Ciuq cam rox, Cazyauzsanh lizsij gyaeraez, doxcienz mwh Cinghcauz hainduj ndaem, liz seizneix gaenq miz seiq bak lai bi, Genzlungz nienzgan hak deihfueng aeu Cazyauzsanh guh huq- ndei hawj vuengzdaeq.

Geij bi neix daeuj, Denhngoz Yen yawj gij swhyenz swnghdai、diegvih ndei caeuq gij giekdaej canj- nieb daegbied gagmiz, gaemdawz saenqhwng canjnieb, haenqrengz hwngfat gij canjnieb mbawcaz, ciuq dieg bae hwnqguh aen dieg guhyiengh canjnieb mbawcaz, guh hung guh ak aen binjbaiz canjnieb Cazyauzsanh. Bi 2020 hwnqguh dieg guhyiengh canj- nieb mbawcaz·Denhngoz hoengz, cujyau ndaem Caznganzgouj Yauz- sanh、gocaz geq cwx caeuq caz- ngazhenj, lij miz gyagoeng gai mbawcaz、yawj gingjsaek、lijyouz youqndwi daengj canjnieb bangbouj dem. Dieg guhyiengh dingj aeu nungzyez guh giek、bouxguhnaz guh goek、lajmbanj guh gaiqdap, laebdin gij ndei caeuq daegsaek cazhoengz Denhngoz, vatcimh gij ndei lai yiengh canjnieb mbawcaz, hawj nungzyez swnghcanj、gyagoeng、yenzfaz、guh- yiengh、fugsaeh daengj dox yungzhab.

Daengz seizneix, dieg guhyiengh gyonj roengzgoek daih’iek 7100 fanh maenz, guhsat ndaem mbawcaz biucinj caeuq gaijguh mbawcaz canjliengh daemq gungh 5000 moux, najdieg baenz mbaet mbawcaz 3000 moux, bi dak mbawcaz hawq 70000 gaen, dij cienz 3000 fanh maenz doxhwnj, nangqdaengz nungzhu 726 ranz, ndawde ranzvutgungz 250 ranz, dan gij canjnieb mbawcaz couh hawj gyoengq boux caeuqfaenh daengx ranz bi bingzyaenz lai sou 10000 maenz doxhwnj.

Vihliux hawj vunzlai daj gij canjnieb mbawcaz ndaej souh’ik, Denhngoz Yen gaenxmaenx yinx aen giyez cienmonz guh caz daeuj, yinx gij dinfwngz guh caz ndei Gyangh、Cez daeuj, doenggvaq hwngfat vunqsik “gunghswh+dieggoek+dangjgen+nungzhu”, guh hung gij canjnieb mbawcaz Yauzsanh, hawj swhyenz ndaej cingjhab, doenggvaq diegnamh haeujguj、diegnamh riuzcienj、goq vunz guhhong daengj fuengsik, yinx vunzlai ndaem caz, hawj vunzlai henzgyawj ndaej lai sou baenzmiz, hawj cizdij ginghci ndawmbanj hwngfat.

“Gaxgonq mbawcaz ndawmbanj cungj dwg gak ranz gag bae gai, gaen 20 maenz baedauq, gou raen bienz- ngeiz lai lo, bouxminz mbouj ndaej cienz, ndigah gou naemj gag cauhnieb, vih ranzmbanj ok di rengz, hawj bouxminz ndaej canhcienz lai di.” Denhngoz Yauzsanh Mbawcaz Siugai Mizhanh Cwzyin Gunghswh bouxfucwz Ya Lungzveih caeuq gicej naeuz. De bae Cezgyangh、Fuzgen daengj dieg gaujcaz hag gingniemh ndei, youq bi 2014 daenggeiq le aen gunghswh mbawcaz ndeu. Gunghswh ndaem、soucawx、guh、gyagoeng caeuq siugai caz cungj guh liux, yungh gij vunqsik “giyez dinghdan soucawx、hozcozse lienzdoengh、nungzhu hohleix mbaet caz”, fatok gij cozyung binjcungj ityiengh、doxcaez soucawx、doxcaez gyagoeng siugai, nangqdaengz vunzlai henzgyawj hwngfat gij canjnieb mbawcaz liux, hawj vunzlai ndaej couhnieb lai ndaej cienz.

Vunzmbanj Yauzsanh Cunh Vuz Swngcangh aenvih aeu yawj boh- meh bi’ndwen geq caeuq lwgnyez iqet, okbae dajgoeng mbouj ndaej, gaxgonq bonjdieg mbouj miz giyez, de cijnaengz guh di honglingz, seizneix bae Denhngoz Yauzsanh Mbawcaz Siugai Mizhanh Cwzyin Gunghswh guhhong, ndwen ndaej 3000 maenz baedauq.“Ndei gvaq bae Gvangjdungh dajgoeng lai lo, mboujdan ndaej yawj ndawranz, lij ndaej cienz dem.” Vuz Swngcangh naeuz. Denhngoz Yen baengh dieg guhyiengh mbawcaz, cungfaen fatok gij daiqdoengh cozyung aen giyez lingxdaeuz, hawj vunzlai gak cuz caencingq ndaej youq bakdou ranz guhhong, hawj “mbawcaz iqet” bienqbaenz “canjnieb hung” saenq- hwng lajmbanj.

Ndaej daengz mizgven bouh- monz、giyez caeuq gyoengq boux ndaem caz doxcaez roengzrengz, gij canjnieb Cazyauzsanh Denhngoz hwngfat hoenghhwdhwd, aeundaej cingzcik ndei lailang. Bi 2017, Caznganzgouj Yauzsanh youq aen hoih gaicawx huq mizmingz daegbied ndeiraeuh Gvangjsih gaiq daihcib’it ndaej ciengjngaenz; bi 2021, Lungz- veih Yauzsanh Mbawcaz Nungzminz Ciennieb Hozcozse ndaej bingz baenz aen se guhyiengh guekgya nungzminz hozcozse; bi 2021, Denhngoz Yauz- sanh Mbawcaz Siugai Mizhanh Cwzyin Gunghswh ndaej bingz baenz aen giyez lingxdaeuz Gvangjsih gyamaenh gya’gvangq vutgungz cwngzgoj; bi 2022, cazloeg、cazhoengz Yauzsanh daengj ndaej nyinhcingq baenz huq youjgih caeuq “huqcinh”, hawj gij canjnieb mbawcaz Yauzsanh lai rengzrwdrwd.