Ngoenzneix dwg singhgiz haj, laj byonghngoenz yaek roengzban seiz, beixsauj dwk dienhvah hawj gou naeuz daxmeh youq ranz do diegbanj seiz mbouj siujsim daenghlaemx, ga baihswix deng geuj goenx lo, seizneix byaij loh ndiengqga ndiengqgwd, de muengh dou couhmoz ndaejhoengq baema yawjyawj daxmeh.

Ndaejnyi daxmeh deng sieng, gou ndawsim cungj miz di vueng lo. Ndigah roengzban gou couh daengx ranz seiq mehlwg ganj baema yawj daxmeh. Aen ci couh lumj aen sim gou, itloh doengfafa, mbwn yaepyaep ruemhri dou couh daengz ranz lo. Yamq haeuj ranz raen boux canghyw ndaw mbanj daenj geu buhhau cingq youq ranzding coengh daxmeh naenx ga cat ywraemx. Boux canghyw neix naeuz ga daxmeh mbouj suenq deng youqgaenj, cat geij ngoenz yw siengndok, yiet geij ngoenz wngdang couh ndei lo. Lij daengq naeuz daxmeh nienzgeij geq lo, ndok beij bouxcoz coiq, geuj deng didi hix yungzheih deng sieng, baezlaeng aeu lai haeujsim byaij loh. Geij ngoenz neix rumznamz, ndawranz deihbanj dumz, raeuz lai, caenhliengh gaej do diegbanj, mienxndaej bouxlaux caiq daenghlaemx baez ngeih.

Doeklaeng cejdaih、cejngeih caeuq nuengxnyaeq hix cungj ganj ma lo. Dou geij cejnuengx yaek miz buenq bi mbouj ndaej guhdoih lo, baezneix suenq ma ndaej caezcwt baez ndeu. Gya hwnj ngoenzcog youh dwg couhmoz, cejdaih couh daezyiq dou geij beixnuengx louz roengzdaeuj ginggoj haemh ndeu.

Gwn caeuz imq le, dou geij beixnuengx yo eij gvaqdaeuj baenz gien ndeu naengh roengzdaeuj gangj rog gangj ndaw, ging saeh lwnh cingz. Gaenlaeng hwnj congz ninz le ndaep daeng hix ging daengz gaeq haen sam baez cij menhmenh ninz ndaek.

Ngoenz daihngeih haetromh, mbwn ngamq ronghriq, cejngeih couh cacoemj hwnqcongz aeu dauqbae, aeu bang daeglan cawj haet gwn. Daeglan cejngeih gaenq hwnj cuhcungh ngeih nienzgaep lo, bingzseiz cij rox gwn caeuq ninz, cungj mbouj rox guh di hongranz, dajcawj dajsaeg gij hong neix cungj mbouj ning fwngz guh gvaq, seizneix yienghyiengh mbouj rox guh, lij aeu cejngeih baenzneix causim de. Daxboh rox gij baedauq le, couh laengz cejngeih roengzdaeuj caeuq dou gwn haet caiq byaij. Cejngeih euq mbouj gvaq daxboh, cengqgengz louz roengzdaeuj gwn haet.

Youq gwnz daiz gwn haet, cejngeih miz di najsaep simfanz, cacoemj swd le geij gaemz raemxcuk, couh naeuz gwn imq yaek aeu dauq lo. Daxboh yawj ndaej ok gij simgei cejngeih, daegdaengq naeuz aeu cejngeih buenx gwn, cejngeih cij ndaej dingq vah naengh henz ndang daxboh. Daxboh doq gwn doq miz sim fouz eiq dwen gij saeh doenghbaez dou geij beixnuengx bae ndawreih guhhong. Gangj dwk gangj dwk, daxboh couh naeuz:“Sou geij beix- nuengx lij miz bouxlawz geiq ndaej ndwenngux seizhaenx raeuz bae ndawreih loengx megsuek? Seizhaenx raeuz dwg baenzlawz guh?”

“Geiq ndaej seizhaenx nuengx- nyaeq ciengz gaijgik hozhat bae gwn cuk, gwn le caet bet baez cuk cungj caengz ndaej rangh megsuek……” Daxboh ngamq gangj sat, vah cejdaih couh ciengj dwk byot okdaeuj lo. Daihgya dingq le cungj riuhaha yawj coh nuengxnyaeq, nuengxnyaeq naj nding cix mbouj rox gangj maz, cij ngeng gyaeuj daengx da cang guh naemj mbouj hwnj gij saeh neix.

“Gou geiq ndaej seizhaenx daxboh aeu duzcwz rag rauq youq baihnaj loengx namh, raeuz geij beixnuengx dawz gvak youq baihlaeng lumx namh haeuj laj goek miuz bae……”

Dingq daeggo dahcej gangj dwk gangj dwk, gij saeh seiziq bae ndaw- reih loengx megsuek couh menhmenh yienh youq dangqnaj gou daeuj lo:

Youq laj ndit haenq ndat lumj hwnj feizyiemh nei, daxboh gwnz gyaeuj daenj aen mauhnyangj, fwngz- swix beng cagvaiz sek cwz, fwngzgvaz gaem diuz rengh fag rauq, haeujsim loengx reih. Cij raen gij namh daj song gyaeuj aen rauq fan okdaeuj gyonj haeuj laj goek miuz, gij rum caeuq nya hix deng rauq gyonj daengz gyaeujreih…… Yawj gij reih daxboh loengx gvaq haenx, baenz coij baenz rangh, cij miz gomiuz lied baenz doih baenz doih cingjcingj caezcaez, ndawsim gaej gangj miz geijlai angq lo. Dou geij beixnuengx boux gaem faggvak gaenlaeng, saejdawz gij rum rag raez loengx mbouj hwnjdaeuj haenx, swnhbienh lumx dawz gij namhndaek luenzlili loengx gvaqbae youh manzgyaengj ringx roengz laj coij daeuj haenx.

Seizhaenx dou cungj dwg lwgnyez, bouxboux ak lah, daxboh lau dou caenh naemj lah mbouj guhhong, couh faen reih baenz haj duenh, moix boux bau lumx duenh ndeu. Vih guh ndei gij hong daxboh faen hawj haenx, dou cungj mbouj gamj rubrab, bouxboux cungj haeujsim bae saej rum lumx namh. Daxboh dwg boux vunz guhhong saeqngaeh, de cungj daengq dou lumx namh ndei le aeu geiq ndaej youq laj goek gomiuz gvak song gvak.

Ndwenngux gaenq haeuj seiz- hah, hwngqndat dangqmaz, aen daengngoenz lumj aen giuzfeiz ndat nei venj youq gwnzmbwn, dak ndaej gwnzdieg ndatfwdfwd, gij namh ndawreih dak ndaej youh rauj youh ndat. Yawj gij gomiuz megsuek ngamq maj gvaq dabaeu di he, seizneix gaenq deng ndit dak ndaej gyaeuj ngaem duiqdwddwd, miz di mbaw gaenq reuq ndaej gienj baenz doengzien youh raez youh luenz.

Seiz naengh laj faexraemh yietliengz, gou ndawsim ngeizvaeg, couh cam daxboh:“Daxboh, seizneix ndit baenz ndat, gomiuz megsuek cungj reuqret, miz di mbaw cungj gienj hwnjdaeuj lo, raeuz vihmaz mbouj rwed di raemx hawj gomiuz gwn ne? Mwngz lij heuh dou youq laj goek gomiuz gvak song gvak dem?” Daxboh dingq le mbouj gaenj mbouj menh duet mauhnyangj roengzdaeuj, doq aeu mauh vadvad rumz, doq riu naeuz:“Hei! Neix mwngz couh mbouj rox luba? Bouxlaux ciengz naeuz ‘miz cienz nanz cawx daengz aen mbwn rengx ndwenngux’ ha. Ndwenngux cingq dwg aen seizciet ndei gomiuz roengz din maj rag ne. Mwngz mbouj rox, youq seizneix, raeuz aeu habdangq hawj gyoengq gomiuz gak hat gak hat, gvak song gvak nyauj song nyauj, gij namh laj goekgaen gyoengqde, namh lom le mboeng le, couh bienq rauj bienq hawq, gij rag gyoengqde youq gwnz feuh gwn mbouj daengz raemx, couh haenqrengz coh gizlaeg bae roengz din maj raez, ra daengz raemx gwn imq majhung maj sang. Seizneix sou cij yawjraen biujmienh, gyoengq gomiuz reuqretret, di ndeu cungj mbouj miz cingsaenz. Gizsaed gij rag gyoengqde gaenq caegcaeg youq lajnamh haenqrengz bae ra raemx gwn, coh gizlaeg maj raez bienq genq, ding roengz gizlaeg. Caj daengz ndwenloeg ndwencaet, doek fwn lai, raemxrongz lah, gomiuz couh sikhaek coh baihgwnz maj sang majhung, couhsuenq nyangz raen rumzraq fwnraq, gomiuz hix genqgeng mbouj lak, lij ndaej demcanj haujlai dem.”

Dingq le gij vah daxboh, dou fwt naemj doeng lo. Daj seizhaenx hwnj, gwn haemz gwn hoj couh baenz gij caizfouq seiqvunz dou: Seiz nyangz daengz “duzguk lanzloh”, dou mbouj ienq mbouj gvaiq, cungj caenhsim naemj banhfap bae gaijgez; youq ndaw ndwenngoenz daemdeng gij haemzhoj, haeb heuj gamz raemxda hix aeu dingj gvaqbae.

Coih miuz aeu swnh caeux, son vunz aeu swnh iq. Dingq gij vah daxboh gangj daengz gij saeh bae loengx reih, cejngeih hix lumj roxsoq lo, de menhmenh naengh youq henz ndang daxboh, gwn le song vanj cuk, cij dawz aen daeh, biek gvaq gyoengqdou dauqbae lo.