Vahbouxbien: “Sam Nyied Sam”yaek daengz, vunzlai gak minzcuz gak dieg Gvangjsih guh hozdung lai yiengh angqcoux ciet ndei. Neix langhbaij le vwnzva minzsug ndei raeuz, caemhcaiq coicaenh minzcuz doxgiet.

Mboengqneix，Diuzgai Singzbaek laeng Laizbinh Si Hinghbinh Gih lienzhab doengh aen bouhmonz ndawsi ciu vunzlai diegguenj guh hozdung “aen ciet raeuz · Sam Nyied Sam Gvangjsih”. Hozdung miz daenj buhvaq minzcuz byaij daiz、doiq fwen、diuq fouxfaexsaux、dwkdomq、 caij maxfaex、gingj gvingz daengj cezmuz mizyinx ndeicaemz de. Dieg de lij baij gaiqgwn feih miz gij daegsaek minzcuz caeuq doxgaiq langhbaij gij dinfwngz minzcuz daengj, yinx ndaej gyoengqvunz gak minzcuz daeuj camgya. Daihgya fwngz doxdaz, diuq foux- faexsaux angqvauvau, itmienh cimz gaiqgwn miz feih, itmienh yawj cezmuz ndei, caez roxnyinh gij yienghndei daegbied vwnzva minzcuz, coicaenh gak minzcuz “sam gyau”, hawj vunzlai diegguenj engq caezhoz、 doxgiet.

(Mungz Gveivaz/蒙桂华)

4 nyied 2 hauh, bouxcangh Vangz Fugunh laeng Liujcouh Si Sanhgyangh Dungcuz Swciyen Fuluz Myauzcuz Yangh Fuluz Segih youq ndawranz guh aen daiz bauqva, angqcoux “Sam Nyied Sam Gvangjsih” daeuj daengz. Aen daiz bauqva dwg gij doxgaiq mizfuk mwh Fuluz Myauzcuz Yangh gvaq “Sam Nyied Sam”aen cietbauqva minzcuz cienzdoengj yungh. Aen de aeu goengdienh、ranzmiuh、laeuzgyong daengj gij ranz miz daegsaek haenx guh vunq, dajcang gig gyaeundei, eiq naeuz canhcienz swnh ndei、aeu maz ndaej maz、lwglan lai daengj.

（Gungh Bujgangh/龚普康 Liengz Siumingz/梁秀明）

3 nyied 30 hauh, gaiq daihngeih “aen ciet raeuz · Sam Nyied Sam Gvangjsih” ciet minzsuz vwnzva mbit maknengznuengx caeuq hozdung baijgai “huqdoj ndawndoeng” youq aen gvangjcangz Majsanh Yen Bwzlungzdanh Cin Lungzcangh Cunh Mbanjbanjsang haiguh. Yienhciengz, ndaek gyong Bouxcuengh Majsanh、diuq fouxdwklongj、dwk gvaibanj daengj cezmuz ndeiyawj lienzlienz yienjok. Gyoengq hekyouz mbit maknengznuengx、youz aen haw huqdoj、cimz doxgaiq ndeigwn miz daegsaek, daejniemh gij yienghndei vwnzva Mbanjcuengh. Baez hozdung neix aeu maknengznuengx guh moiz，aeu hoih gyau baengzyoux, gai huqdoj gungh souhaeuj 1.5 fanh maenz ngaenz, hai gvangq roenloh gai huqdoj lajmbanj, bang huqdoj ndaej “ok bya”.

(Dou Dacenz/窦大全)

4 nyied 3 hauh, Vuzcouh Si Mungzsanh Yen Yayiz Minzcuz Yozyau guh vwnzyi yienjok caeuq minzcuz dijyuz yindungvei angqcoux aen ciet“Sam Nyied Sam”. Cezmuz miz foux minzcuz 《Dujva Yauzcuz Hailangh》, guh hozdung minzcuz dijyuz miz fouxfaexsaux、dwk- gyangq、dwkdomq daengj, lai cungj lai yiengh. Gyoengq lauxsae hagseng angqyangz coux “Sam Nyied Sam” daeuj daengz.

（Gyangh Yungjluz/江永录 Cwngh Gez/曾 洁）