Mboengqneix, gicej cam Swcigih Linzyezgiz roxyiuj, bineix doxdaeuj, Gvangjsih dawzcinj seizndei seizcin cauh ndoeng, haenqrengz doicaenh hong ndaem faex, hawj diegnamh lai miz faex. Daengz 3 nyied daej, daengx gih gyonj guhsat ndaem faex cauh ndoeng najdieg 219 fanh moux, ciemq daengx bi cauh ndoeng dajveh 62.57%, beij bi’gvaq caemhseiz dem- maj 10.6%.

Ciuq cam rox, Swcigih Linzyezgiz yaenqfat 2024 nienz daengx gih cauh ndoeng dajveh, iugouz gak dieg yungh dieg ndaem faex cauh ndoeng、dieg raemj faex gvaq、dieg feiz coemh gvaq daengj dieg cauh ndoeng, haenqrengz gungganq gofaex bonjdieg、gofaex bengz caeuq ndoeng faex doxgyaux、ndoeng faex go sang go daemq; daengx bi dajveh doicaenh dieg swnghdai youqgaenj faexnganqciq gezgou gaij- cauh najdieg 10 fanh moux, ndaem gofaex bengz najdieg 2.5 fanh moux, cugyamq daezswng ndoengfaex caet- liengh caeuq comz danq naengzlig. Bineix geiqdoh nduj, daengx gih gaenq guhsat faexnganqciq gezgou diuzcingj najdieg 1.82 fanh moux, gofaex bengz gungganq najdieg 5900 moux.

Bi’gvaq, Gvangjsih guhsat ndaem faex cauh ndoeng najdieg 417 fanh moux, daiqdoengh vunzguhnaz bae guhhong ndaej cienz daih’iek 28 ik maenz, cauh ndoeng daiqdoengh bouxguhnaz demsou cingzcik yienhda. Bineix, daengx gih yaek gyamaenh gij giekdaej seizneix miz le, laebdaeb gyalai rengz ndaem faex cauh ndoeng, daengx bi ceng’aeu guhsat ndaem faex cauh ndoeng najdieg 350 fanh moux.

(Vangz Yenginz)