Mwh iq, cungj roxnyinh roen rinbanj Mbanjcuengh Majhaij gig raez gig raez, aenvih de ceiq gyae ndaej lienz daengz aen cin gig gyae bae, lwgdin iq gou gig nanz byaij doh.

Bouxcuengh maij seuq, ndaw mbanj rog mbanj, danhfanz dwg roen hung miz vunz byaij lai, roxnaeuz roennou hwnjbya guhhong, cungj aeu rinbanj ma bu, roxnaeuz gvangq roxnaeuz gaeb, gwnz namh bu ndaej bingz- rwdrwd, fwndoek noix miz namhhomq, ngoenzndat noix miz namhfaenx, fuengbienh vunzlai byaij. Gyang mbanj, lij miz giz diegdangz rinbanj mbouj suenq hung ndeu. Mwh iq gou cungj youq mwnq guh’angq. Ndaejgeiq mwhhaenx ceiq maij gip rin guhcaemz, dou cuengqhag gvaqlaeng maij youq giz diegdangz rinbanj neix muz cehrin, haj naed daengz cib naed rin hau iq, muz rongh liux lo, cehrin byawz muz luenz muz raeuz mbouj camz fwngz, doengzdoih couh maij caeuq de caemh liuh, hix yinx ndaej engq lai doengzdoih. Mwhneix, baezbaez byaij gvaq mwnq, lij yawjraen lwgnyez ndaw mbanj youq gwnz rinbanj diuqyegyeg, dieg- dangz rinbanj geiqndaej caeuq yawjraen le gij angqyangz mwh iq dou.

Daxgoeng gou dinfwngz ak, daengz mwhneix lij geiq ndaej cingcuj, youq bi- ndwen doxgaiq gwn yungh noix haenx, daxgoeng rox guh gwn dangqmaz. De dwg canghfaex、canghdiet、canghrin、canghvax、canghduk, rox gaek faex gaek rin gaek faiz, lij rox yungh ywdoj. Daj gou roxsaeh geiqsaeh doxdaeuj, couh roxnyinh de dwg bouxcangh dinfwngz ak dangqmaz ndeu. Laebcou gvaq- laeng, daxgoeng couh bae ndoengfaex leh faiz, go lawz dot raez，maj ndaej maengh youh soh couh raemj gode, riengz roen rinbanj rag dauq ranz, rin mbouj bingz, ngefaex rag gvaq hwnjhwnj roengzroengz sing goksadsad, gij sing caeuq ndoengfaex doxhab ndeidingq raixcaix, daengz seizneix gou lij ngeix ndaej raen. Diegdangz rinbanj najdou, seizde bienqbaenz dieg dajsan daxgoeng lo, de lumj canghmohsuz, baq faexfaiz baenz duk, fwngz gaem cax gaem faexduk, daw liux lo, faexduk roxnaeuz luenz roxnaeuz benj youq ndawfwngz de mbin bae mbin dauq. Bied、raeng、ndoengj daengj hongdawz guhhong ndaej gag guh gag yungh, de lij aeu faexduk guh haujlai doxgaiq, gou goj gyaez raixcaix! Seizneix, gaek faex gaek rin gaek faiz cungj youq ndaw mbanj cienzswnj roengzdaeuj, fazcanj ndaej gig ndei, lwgsae daihnduj daxgoeng Mungz Vancunh saefouh lij aeu ndaej aen mingzdaeuz si gaep “dinfwngz canghboh gwnzbiengz”, doxgaiq Mungz saefouh gyoengqde guh baenz de, bienqbaenz vwnzva cauh’eiq canjbinj, baenz le laex soengq vunz, daegbied dwg gaiq deufaex guh ndaej ndei haenx byaij ok Guengjsae lo, bae daengz Meijgoz、Audaliya daengj lajmbwn gak dieg.

Cawz le roen rinbanj, naj ranz laeng ranz vunzlai ndaw mbanj, ndaem ndaej ceiq lai couhdwg faexleiz lo, caj daengz raq rumzcin nduj daeuj, valeiz haemh ndeu couh doxciengj hailangh, hausaksak, hai youq gyang laeuz faex vax loeg ndawde, caeuq ndoeng faexfaiz laeng ranz、nazmbaeklae naj ranz doxciuq, fuk doz gingjsaek seizcin lajmbanj neix caen ndei raixcaix. Yienghneix, daj cin daengz cou, youq liggaeuq ndwencaet cibhaj baedauq, makleiz henj lo, ranzranz cungj yiedcingz iucingj lauxgeng mbanj wnq daeuj caemh gvaq cietbuenqbi, gaj gaeq gaj bit baij baenz congz haeux byaek, caem vanj laeuj hung ndaw ranz gag oemq de, gangjriu gangjgoj, gwn laeuj naeuz angq, mbouj fiz mbouj dingz! Bouxcuengh yiedcingz haenx nyinhnaeuz miz hek daeuj ranz coh hoengh, ranz lawz hek lai、ceiq nauhyied couh ceiq hoengh, bi moq couh engqgya swnh. Ngoenz daihngeih, lauxgeng dauq ranz, cungj hawj rap makleiz ndeu, byaij roen rinbanj dauqbae, aeu bae baen hawj ranz henzgyawj doxndei, faenyiengj gij angqyangz cietbuenqbi Boux- cuengh. Ndaw ranz makleiz gwn mbouj liux, gyoengq dahcej ndaw mbanj cungj rap makleiz riengz roen rinbanj bae haw gai, vuenh dauq huq ngoenznaengz yungh, mbangjseiz lij lw geij gak ngaenz gag yungh, mwh iq gou hozhaenz raixcaix, hozhaenz gyoengq dahcej gag ra ndaej gwn. Seizneix, cungj makleiz gaeuq haenx deng raemj haujlai lo, song bi gonq cujcangj youh heuh vunzmbanj ndaem makleizgim daengj cungj- loih moq, hoeng cietbuenqbi Mbanjcuengh gaenq fazcanj baenz cietlwgmanh lo.

Gaiq guekgya deihleix biugeiq lwgmanh Lungzciz ndawde, lwgmanh Majhaij dwg huq ndei, aen de mbouj hung, saek hoengz- swgswg, naeng na ceh lai, homrang mbouj suenq manh, ceiq ndei guh raemxcimq roxnaeuz cauj byaek, bouxhek gwn gvaq lwgmanh Majhaij cungj maij raixcaix. Youq mwh duetgungz gunggeng, boux suhgi daih’it Gveilinz Si Gungh’anhgiz baij daeuj haenx, cujciz rauveh banh gaiq daih’it cietlwgmanh Majhaij, itcig banh daengz seizneix. Gyaq- cienz lwgmanh Majhaij hix aenvih hekyouz daeuj caeuq ok rog senhconz ndaej ndei caemh bi bengz gvaq bi, bienqbaenz aen canjyez miz daegsaek ndeu, hawj vunzlai demsou fouqmiz. Moix bi cietlwgmanh, cungj yinx baenz cien baenz fanh hekyouz daeuj gamjsouh gij angqyangz vunzlai seizcou dak haeuxliengz, lwgmanh ndinghwdhwd、haeux- daeq henjrwgrwg, baij roxnaeuz venj youq naj ranz laeng ranz, baenz fuk gingj ndei ndeu! Duetgungz gvaqlaeng, beixnuengx vunzlai seizcou dak soucingz dak vuenyungz, dak ok gij cingzngeih naekna gamjaen aendangj, dak ok gij ndwenngoenz vuenyungz vuenheij!

Seizneix, roen rinbanj ranzmbanj youh miz le daezswng moq, aeu ndaej aen mingzdaeuz “conzdungj mbanj ciuhgeq” gvaqlaeng, youq baujhoh cienzswnj caeuq hwngfat vwnzva lijyouz fuengmienh hix guh ok damqra moq. Mwhgonq roen rinbanj hwnjroengz mbouj bingz haenx ndaej cingjleix caeuq coih bingz, youq buenq bya lij dab le song aen liengzdingz, hawj boux maij byaij roen youq neix yietdin, roxnaeuz ingjsiengq, roxnaeuz veh bya veh raemx, roxnaeuz ciengq sei guhdoiq, roxnaeuz eu hot fwen ndeu, angqyangz dangqmaz! Maq- muengh ranzmbanj gou yied daeuj yied ndei, maqmuengh engq lai vunz miz yienz haenx daeuj doxcomz Majhaij, simmaez youq Majhaij, loqraen Majhaij.