Laebcin gvaqbae, hawxsij daeuj daengz, geij raq fwn doek roengz daihdieg, lajmbwn gwnznamh, doenghduz doenghgo, lumj ninzndaek ndiusingj nei, go’nywj ngaznomj gungj ok gwnznamh, mbouj gvaq geij ngoenz, daihdieg dauqcawq heuoiq cupcup, seizcin daeuj daengz lo!

Mbwn yienznaeuz yaep nit yaep raeuj, hoeng rumz gaenq mbouj caiq gyoet, rumzraeuj ci naj, hawj vunz ndang raeuj sim hai, lwgda najbyak cungj dwg angq. Duzroeg youq gwnz faex ciengq go, valeux hai youq gwnz nye hoengzfwgfwg, seizcin, caen daeuj daengz dahraix lo!

Gij rumzraeuj ndwensam, ci aen cietndaemfaex daeuj daengz. Daeglwg gou youq hagdangz dingqnyi lauxsae gangj seizcin hab ndaem faex, ma ranz couh heuh gou daiq de bae ndaem go faex ndeu.

Gij vah daeglwg, hawj gou dauq- ngeix gij saeh mwh gou lij iq, daxboh gou daiq dou geij beixnuengx hwnj bya bae ndaem faex.

Gou lij iq, moix bi daengz seizcin, daxboh gou couh ra gak cungj dinfaex roxnaeuz cehfaex daeuj, daiq dou hwnj bya bae ndaem. Boh gou cungj naeuz:“It bi youq seizcin couh aeu guh ndei dajsuenq, ndaem go dinfaex ndeu roengz namh bae, couh- dwg ndaem aen maqmuengh ndeu roengzbae, dinfaex roengzrengz maj, sou hix majhung vaiqdi ha! Caj daengz dinfaex maj sang le, sou couh majhung baenzvunz lo!”

Miz bi ndeu, cieng gvaq liux, caengz daengz seiz haihag, daxboh daiq dou sam beixnuengx hwnj bya bae. Mwhhaenx laebcin yienznaeuz gaenq gvaq lo, hoeng mbwn lij nit, dinfaex nanz ra, daxboh bi’gvaq seizcou soucomz gij ceh go’gyaeuq、ceh gocamz, seizneix ngamjhab dawz okdaeuj ndaem lo. Dou aemq cehfaex, gwed gvak gwed canj, riuj geij aen faengxcieng, dingj rumznit okdou lo.

Seiznit maeuq youq ndawranz haujlai ngoenz, seizneix ndaej okdou, dou angq lumj duzroeg ndaej cuengq mbin nei, angqhemq saetdiuq, cim bae yawj dauq. Ngamqngamq gvaq aen seiznit, gwnzbya mbawfaex gaenq loenq liux, cij lw nga faex ndoq- ndangndang, gohaz baenz benq roz henj, lienz duznoucoengz hix mbouj raen okdaeuj ra gwn lo.

Mboujgvaq, youq gwnz roen dou lij raen gwnz gofaex did ok ngaz moq, rangz moq cuenq ok gwnz namh, rin baihlaeng va hai rangfwtfwt. Gij saeh huq moq neix, cungj hawj dou sim- angq dangqmaz.

Dou gig sim’angq, aenvih ndaej hwnj bya guhcaemz, ndaej raen baenzlai doxgaiq moq, engq aenvih gij maqmuengh ndei daxboh. De naeuz:“Raeuz ngoenzneix ndaem cehfaex, mbouj gvaq geij bi, gij faex neix couh majhung lo, go’gyaeuq hai va gyaeundei, giet ok makgyaeuq ndaej dok youz, raeuz couh miz souhaeuj lo; gocamz majhung baenz faex, ndaej hoh raemxnamh bangxbya mbouj deng lae ndwi, gij mbaw、gij nye de doek roengz lajnamh, hawj namhroz bienq namhbiz, hawj ndoeng engq noengq bya engq mwn, baujhoh swnghdai doxdaengh.

Dingq gij vah daxboh le, Go- daih caeuq go’ngeih cungj ngaek gyaeuj naeuz ndei, gyoengqde muengh duzroeg daeuj gwnz faex caux rongz. Gou engq sim’angq lo, aenvih gou maij va’gyaeuq, gou muengh ndaej aeu va’gyaeuq guh baenz aen gengx, daenj gwnz gyaeuj, couh lumj dahsien gyaeundei lo.

Cehfaex caengz ndaem roengz namh bae, dou couh muengh gwnz bya faex baenz ndoeng lo, go’gyaeuq hai va baenz moengj lumj fwjhau byai- mbwn, gocamz sang daemx gwnz mbwn bae.

Dou daeuj daengz gij reih bangxbya ranz dou, youq geh rin ra dieg namh, daxboh caeuq godaih youq baihnaj vat gumz, gou riengz- laeng cuengq cehfaex, go’ngeih gaen- laeng gou moek namh.

Daxboh gaem cax gvej nya, aeu faggvak gvak soeng namh reih cij vat gumz faex. Daxboh doq mbak namh, doq son dou baenzlawz guh- hong. Godaih hag gij yiengh de, vat gumz youh vaiq youh ndei. Gou geq naed cehfaex cuengq roengz gumz bae, cehgyaeuq moix gumz cuengq song naed, cehcamz saeq lai, moix gumz lai cuengq geij naed…… Go- ngeih gaenlaeng gou, yunghsim mbak namh moek ceh.

Dou doq guhhong, doq gangjgoj, gangj vahriu, doxdax boih sei ciuhgonq, doxdax cieplungz cwngzyij, nanz mbouj nanz riuhaha, guhhong hix lumjbaenz mbouj rox baeg lo.

Guhhong baeg le, dou couh naengh youq gwnz rin yietnaiq, hai faengx daeuj gwn. Youq ranz daxmeh heuh dou gwn faengx, dou bouxboux yiemz, daengz gwnz bya guhhong baeg le, cij raen faengx youh rang youh van, sam beixnuengx doxciengj gwn.

Gwn faengx sat, dou ndaej bae guhcaemz yaep he. Dou bae benz faex, roxnaeuz bae ra rin geizheih, roxnaeuz riengz rizdin bae ra duznoucoengz. Youq benq reih ndaem lwgmaenz he, dou raen gwnz gonj rin hung ndeu miz duznoucoengz ndeu, duz de naengbwn wenqyupyup, ndiengq rieng naengh youq gwnz rin, song nyauj got aen lwgmaenz ndeu, aeu gij heuj soem de haeb naeng lwgmaenz, aen lwgmaenz baenq vaiqvitvit, naeng lwgmaenz loenqbyakbyak, daengz gij naeng lwgmaenz bok ndaej seuqsaksak, duz de cij ansim gwn. Dou daj iq daengz hung, soqlaiz caengz raen hix mbouj rox noucoengz gwn lwgmaenz lij rox bok naeng, seizneix ndaej raen, caen geizheih raixcaix. Dou ndoj youq raeb rin haenx, mboet caw haengz lwgda caegcaeg cazyawj de, lau oksing duz de doeksaet deuz bae. Daengz ngoenzneix, gienh saeh neix dou lij geiq ndaej cingcing cujcuj.

Guhhong yietnaiq seiz, dou lij youq gwnz rinbya dik saw, youq ndaw gamj gwnz ciengz sij sei. Guhhong hawj dou lienhndang, guhcaemz hawj dou sim’angq, gwnz bya gyangdoengh hawj dou raen daengz gak cungj huqsaeh moq, gij huqsaeh neix ndaw saw mbouj sij miz, hagdangz hix mbouj son daengz.

Cehfaex ndaem roengz namh mbouj geijlai nanz, couh haihag lo. Gou bouxvunz yienznaeuz ndang naengh youq gyausiz, hoeng sim gaenq mbin daengz gwnz bya bae lo, gou ngeix gij cehfaex de. Fwn cin doek raq dem raq, mbouj rox gyoengqde gwn raemx imq mij imq ne? Dauq ndiu rox caengz? Did ngaz mbouj caengz? Dingj ok gwnz namh daeuj caengz? Duznoucoengz haeb mij haeb gij nyod de?

Siengj bae ngeix dauq, ngeix ndaej aen gyaeuj gou ngunh caez. Gou ma ranz coi daxboh bae yawj vaiqdi, daxboh cungj riu naeuz:“Mbouj youqgaenj, naedceh mingh geng rengz ak, gag rox maj ndei majhung, raeuz aeu naihsim caj de maj.” Gou muenghndwi le, cijndei muengh gij cehfaex haenx vaiqdi did ngaz, vaiqdi majhung, vaiqdi hai va giet mak.

Seizgan ngoenz dem ngoenz gvaqbae, gou ngoenzngoenz muengh, seizseiz niemh, nanznengneng cij daengz seizcin bi daihngeih. Dou riengz daxboh hwnj bya bae yawj. Va! Cijraen gij ceh de caen hwnj baenz faexlwg gvaq lo! Go’gyaeuq lwg hwnj song sam mbaw oiq, mbaw oiq youq laj ndit menhmenh bibuengq; gocamz lwg mbaw lumj bwn duzgaeq, riengz rumz mbinyebyeb, caen ndeigyaez lai lo! Faex ndaem baenz gaiq lo, dou sim- angq dangqmaz.

Doeklaeng, ndaejnyi naeuz gij go’gyaeuq de majhung hai va lo, gij gocamz de maj sang lo, benq dieg gaxgonq ndoqndangndang haenx, seizneix gofaex mwncupcup lo. Hoeng dou ne, gaenq majhung lo, liz diegcoj bae gizgyae lo, caiq mbouj ndaej hoengq miz sim bae san gengxva caeuq benz faex ra rongz roeg lo.

Seizneix, gou naengh youq aen ranzbanhgoeng, gij siengjniemh lumj raemxrongz, nyoengx hwnj ndawsim gou daeuj. Gou gietdingh dapwngq daeglwg, caeuq daxboh gou doengz- caez daiq de bae ndaem faex.

Gou ra ndaej geij go dinfaex gomak, hai ci daiq daeglwg gou ma ranzcoj. Daxboh fan ra faggvak fagcanj okdaeuj, dou gwed gvak gwed canj, riuj dinfaex gomak, lumj gou lij iq mwhhaenx, bae coh gij dieghoengq ranz dou.

Dou doengzcaez gvej nya, mbak reih, vat gumz, daeglwg cuengq dinfaex roengz gumz, rex cingq, gou caeuq daxboh dienz namh, caij ndaet. Doeklaeng caiq bae ndaw daemz daek raemx daeuj rwed, go faex ndeu couh ndaem liux lo.

Gou doq guhhong, doq lwnh gij goj dou lij iq ndaem faex de hawj daeglwg dingq. Daeglwg dingq ndaej doekngaez. Daxboh gou ceij ndoeng faex gwnz bya, doiq lanvaihseng naeuz:“Mwngz yawj, gij ndoeng faex haenx dwg daxmeh mwngz caeuq bohnax mwngz doengzcaez ndaem, seizneix majhung baenz ndoeng lo, mwngz hix aeu hag guh vunz gaenx o!” Daeglwg ngaek gyaeuj riu, engq roengzrengz guhhong, aeu faggvak iq mbak namh, hanh dumz ndang caez hix mbouj goq.

Seizcin daeuj daengz lo, ra hoengq daiq lwgnyez bae ndaem geij go faex ba, ndaem go faex ndeu roengz namh, gwnzbiengz couh lai di heu; ndaem naedceh gaenx ndeu haeuj ndawsim lwgnyez, lwgnyez majhung aiq baenz vunz gaenx vunz ndei!