3 nyied 28 hauh, bi 2024 Denzdungh·Swhlinz hawfwen Yangj- nganz youq Denzdungh Yen Swhlinz Cin banh, doenggvaq doxdax eu Fwenleux、baijgai gijgwn ndei caeuq huq reihnaz、bouxminz guh fwen、hozdung mizyinx、vwnzyi vanjvei daengj baenzroix hozdung, langhbaij gij yinxdaeuz Fwenleux Bouxcuengh, hix yinx canghfwen gak dieg daeuj doxcomz, caezcaemh gvaq hawfwen.

Hawfwen Yangjnganz Denzdungh dwg swcigih gaep feihvuzciz vwnzva yizcanj daibyaujsing hanghmoeg, liz seizneix gaenq miz 270 lai bi lizsij.

Vih raeb Sam Nyied Sam Gvangjsih daeuj daengz, hawfwen bineix miz hozdung laiyiengh. Gwnz haimuqsik, yienj 《Fwen Gingqlaeuj Denzdungh》 le, riengzlaeng, 《Beix- nuengx》《Baksaek Doenghlig》《Saj- dez》 daengj lai aen cezmuz ndeiyawj doxlwnz hwnj daiz yienj, vunzlai ndaej yawj ciengz heiq mizyinx raixcaix ndeu.

Ngoenzhaenx guh fwenvuengz doxdax, yinx ndaej haujlai boux gyaez fwen caeuq hekyouz aen yanghcin henzgyawj daeuj yawjngonz. Yienh- ciengz vunz lai vunz daih, gyoengq canghfwen doxlwnz hwnj daiz eu fwen, langhbaij sing fwen bonjfaenh, aeu fwen gyau youx, aeu fwen cienz cingz. Coenzfwen neiyungz lai, sing fwen rwenzhap, ndeidingq raixcaix.

(Ciengj Vwnzyoz)