Gangj hwnjdaeuj mbouj lau vunz riu, Ausam youq ranz daengx bi mbouj raen de dawz sauqbaet baet ranz gvaq. Couhsuenq nyapnyaj rim daengz lajdin, de hix dwg naengh youq gwnz nyapnyaj yawj densi.

Simjsam ciengzseiz doiq de mo gyaeuj mo rwz, seizgan nanz lo, Ausam gaenq gvenq lo, roxnyinh ndaq de mbouj baenz lawz, Simjsam cij ndaej ngoenzngoenz baet ranz, bienqbaenz bouxbaet ndaw ranz neix.

Ausam miz song boux lwg, gyoengqde cungj bae yienhsingz doegsaw lo, ndawranz cij lw Ausam caeuq Simjsam song boux vunz, couh lumj doiq gvanbaz ngamq doxaeu nei.

Ngoenz ndeu, Ausam naeuz Simjsam:“Lwgnyez bae doegsaw liux, raeuz bae cawx duz ma ndeu daeuj ciengx ba, lainoix hix ndaej gwn gij haeuxlw, lij ndaej hen ranz dem!” Gizsaed, Simjsam sien gaenq siengj cawx lo, ndawranz mbouj miz lwgnyez, ciengx duz ma iq ndeu hix ndaej daeuqangq guhcaemz, haisim dangqmaz. Cij mbouj gvaq Ausam mbouj miz aen sib- gvenq seuq neix, cawx duz ma ndeu daeuj ciengx couh engqgya mazfanz. Yienghneix, Simjsam naeuz Ausam:“Cawx ma caemh ndaej, hoeng mwngz itdingh aeu ngoenz- ngoenz baet ranz.” Ausam riuhwhw, ngaek- ngaek gyaeuj.

Ausam caeuq Simjsam gietdingh bae gwnz haw yawjyawj. Gwnz haw giz dieg gai ma miz haujlai malwg: Miz ma bonjdeih、miz malangz、miz mahahbah. Simjsam yawjhwnj duz mava biz iq ndeu. Duz mava iq neix yawj hwnjdaeuj gig dwggyaez. Hoeng, Ausam mbouj naemj aeu cungj ma neix, aenvih dwg youq ndawbiengz riuz- cienz coenz vah baenzneix——“Gyaeuj va rieng mbouj va, mbouj dai hix baihgya”. Duzma neix gij bwn hau gab fonz, bwn henj mbouj lai, danghnaeuz cawx duzma neix le, doeklaeng lau miz saeh ok.

Simjsam raen Ausam baenzneix gangj, hixnaengz cawx duz ma iq saekndaem bonjdeih ndeu.

Simjsam gig gyaez duzma iq, hawj ma iq guh aen mbonq iq ndeu, seizhah hawj ma iq swiq ndang, seizdoeng hawj ma iq daenj buh iq. Duzma iq rox singq vunz, Ausam caeuq Simjsam mbouj youq ranz, de couh dinghdingh dawz youq bakdou di ndeu cungj mbouj liz.

Ausam yied daeuj yied haengj duz ma’ndaem neix, de daengz gizlawz, ma- ndaem couh riengz daengz gizde. Ausam boux vunz de mbouj ged, moix mbat bae bouqgaicawx cawx ien, de cungj cawx saejdaeuz hawj ma’ndaem gwn. Ma’ndaem ndaej gwn ndei, gig gyaez Ausam, Ausam faek ma’ndaem gamz ngaenz bae cawx ien, doeklaeng ma’ndaem caen gamz bau ien dauq daengz ranz. Ausam angq raixcaix, miz maz ndei gwn cungj ce hawj de.

Ma iq menhmenh majhung, ndang biz bwn luemj.

Ngoenz he, Simjsam daj ndaw naz guhhong dauqma, raen Ausam caeuq ma- ndaem guhcaemz, haemhlwenz Simjsam bok gij naeng duhhenj gaenq mbouj ndaej gib sauq bae, Ausam ciuqyiengh naengh youq bangxhenz mbouj leix mbouj langh de, Simjsam baez raengheiq daeuj naeuz:“Mwh cawx ma gou baenzlawz caeuq mwngz gangj la? Mwngz baenzlawz cungj gyaez seuq ne? Ngoenzcog dwg ngoenzhaw, gou dawz ma bae gai lo.” Ausam vut gaiq gyaeujien, hwet raezrangrang dawz gaiq sauqbaet bae baet ranz, ma’ndaem hix riengz Ausam baihlaeng ngauz gyaeuj baet rieng.

Gvaq geij ndwen le, ma’ndaem gaenq bienqbaenz duz ma hung ndeu.

Miz ngoenz ndeu, ma’ndaem mbouj rox daj gizlawz gamz aen daeh bozmoz ndaem ndeu daeuj, cuengq daengz doiqnaj Ausam caeuq Simjsam. Simjsam gig geizheih, de hai daeh bozmoz baez yawj: Mbwn ha, ma’ndaem baenzlawz ndaej yienghneix guh? Laxlawz Simjsam haetneix dawz gij veiswnghginh bau ndei haenx oet haeuj ndaw congh ciengz suenbyaek bae, ma’ndaem baenzlawz rag ndaej okdaeuj? Simjsam dawz diuzfaex daeuj fad ma- ndaem donq ndeu, ma’ndaem in ndaej heuh “eng’eng”. Daj mwhhaenx hwnj, ma’ndaem gig lau Simjsam, hix gig dingq vah.

Ausam gyaez cit ien, youq gwnz gyaeujcongz de, dauqcawq cungj dwg gyaeujien. Haetneix, gij “cinghseuq laj- mbanj” gunghcozcuj ndaw yienh daengz ranz hoh dem hoh genjcaz lo. Ausam mbouj gib baet ndawrug, gipmuengz yungh din dawz gij gyaeujien sauq haeuj gizgox bae ce, bonj de naemj guhhong dauqma cij sauq gij gyaeujien okbae, bouxlawz rox dauq daengz ranz gyaeujien ra mbouj raen lo, ma’ndaem ngauz gyaeuj ngauz rieng. Simjsam ok bakdou yawj aen doengj cang nyapnyaj, gij gyaeujien cienzbouh youq ndaw doengj, Ausam caeuq Simjsam mingzbeg lo, gij saeh ndei neix itdingh dwg duz ma’ndaem guh.

Mbouj geijlai nanz, ndawmbanj riuz miz bingh mabag daengz, gungh’anh geij ngoenz gonq aeu cungq dwk mabag dai. Simjsam cibfaen lau, lau duzma de banh ndaej bingh mabag, de caeuq Ausam naeuz:“Raeuz gai duzma neix bae ba!” Ausam dingq liux saet hwnjdaeuj, naeuz:“Mbouj gai, ciuhvunz cij raen ndaej duzma baenzlai ndei.” Simjsam naeuz:“Danghnaeuz ma raeuz ndaej bingh lah vunz, vunz heuh lumj mabag raeuq, mwngz boiz ndaej hwnj lwi?” Ausam siengjsiengj gij vah Simjsam, roxnyinh miz di dauhleix, gvaqlaeng wh hawj gai ma lo.

Simjsam naeuz:“Raeuz aeu ma bae ndaw singz gai, ndaw singz ndaej gyaqcienz sang, swnhbienh bae yawjyawj lwgnyez.” Yienghneix Ausam couh aeu aen songzmou cang duzma, hwnj cigunghgyauh bae ndaw singz.

Youq ndaw ci, gyoengq vunzlai cungj haenh duzma baenzlawz ndei, haenh duzma gij bwn luemj、gij saek ndongq、 rox vunz gangj、sohnyoemnyoem. Ausam cit ien bap- bap, dingq gyoengqde gangj liux cij naeuz:“Bouxboux haenh duz ma neix ndei, miz bouxlawz ok cienz daeuj cawx?” Vunz ndaw ci baez doeksaet, miz boux siengq lumj dang daeuz nei dap naeuz:“Gou aeu, gou aeu soengq hawj bouxdaeuz gou.” Ausam naeuz:“Ndaej, roengz ci raeuz couh caengh, gaen cibhaj maenz cij gai.”“Cibhaj couh cibhaj.” Boux ndaw ci haenx naeuz.

Aen ci hai daengz ndaw singz lo, miz vunz buenq loh roengz ci, ma’ndaem mbouj rox baenzlawz duet ok bak songzmou, daj gwnz ci buet roengz ci bae lo.

Ma’ndaem buet gvaq roen hung, yied buet yied gyae. Vunz ndaw ci yawj ndaej dadaengx bae, cij raen Ausam buet roengz ci bae gyaep ma’ndaem, cigunghgyauh cijndaej hai gvaq bien loh bae dingz caj.

Ausam doq gyaep doq siengj: Liux lo, duz ma’ndaem neix caen ndaej bingh mabag, haeb vunz le, gou mbouj rox baenz- lawz guh?

De gyaep ndaej hanh dumz byoem- gyaeuj, diemcaw mbouj hwnj, hoeng vih gaeb aeu duz ma’ndaem, Ausam cijndaej buekmingh gyaep bae.

Simjsam naengh gwnz ci, ga saenz mbouj dingz, de hix heiq ma’ndaem dwg mabag, couh hojguh lo.

Ausam buet riengz ma’ndaem, ma- ndaem yied buet yied ak. Yaepseiz couh raen ma’ndaem buet haeuj ndaw diengz- haex henz roen bae, dit cik din ndeu hwnjdaeuj oknyouh. Ausam ngamq yaek haeujbae gaemh ma’ndaem, boux baet diengzhaex cingq iet naj okdaeuj, de ndaq boux vunzsai cingq youq baihrog henz ciengz set nyouh ndeu naeuz:“Seizneix dauqcawq loengh seuq lajmbanj, mwngz cix dauqcawq luenh set nyouh, mwngz yawj, mwngz yawj duz ma’ndaem neix, cungj rox bae ndaw diengzhaex oknyouh, mwngz lienz ma cungj mboujyawx……”

Ma’ndaem oknyouh sat le youh caiq buet dauq gwnz ci, gvaigvet ndonj haeuj ndaw songz bae ninz. Ausam sim baez saet, de gaijbienq cawjeiq lo, gietdingh mbouj gai de lo.