Gaenh song bi daeuj, ranz Lauxcinz gij saeh simfanz gienh dem gienh: Dahlanz lij caengz ra ndaej hong; Daeggyangz aenvih saenq bouxwnq luenh guh seng’eiq, cibgeij fanh maenz ngaenz deng yaeuh cienz goem liux, lij yiemq bouxwnq ngeihcib geij fanh dem. Lwgbawx ndatheiq lai, daiq lan deuz ok rog bae duenh seizgan lo, aen ngaeuz cungj ra mbouj raen; seizneix, ndangdaej Lauxcinz lij fat bingh dem……

Seizneix mbouj miz cienz cawx dauq ranz ndeu, siengj dauqma ranzcoj hwnqranz, couhcinj miz cwngfuj bangbouj di, vanzlij ca hauj- lai cienz. Cienz mbouj cienz, ranz mbouj ranz, yawj hwnjdaeuj, aiq mbouj ndaej raen lwgbawx caeuq daeglan gvaq lo. Gij saeh neix couh lumj deng vunz mbat dik dem mbat daemh nei, hawj de ndaeng in naj foeg, ndok yaex sanq bae.

Gij saeh luenhlablab neix, couh lumj diuz mingh aen gyacuz de deuz mbouj duet, hawj vunz simfanz dungxnyap.

Siengj daengz neix, Lauxcinz gag siengj, danghnaeuz bingh de youqgaenj, yah de dwg mbouj dwg hix yaek vut de bae ne? Gij gumzgamx neix, hawj de sim luenh uk in. De song da haep maenh, ngaemgyaeuj mbouj oksing, neix couhdwg gij laizyouz de hainduj ndoj mehyah lo.

Roek

“Ding ling ling, ding ling ling……” Seizneix, soujgih yah de yiengj hwnjdaeuj lo.

“Dwg Nungz Swjgyah, dahlwg Nungzgoh, de naeuz yaek gvaqdaeuj yawj mwngz, lij naeuz soengq haeux- caeuz hawj raeuz ne. Gou hix caeuq de gangj lo, mwngz seizneix lij gwn mbouj ndaej maz.” Yah de ciep liux denva, lwnh naeuz de.

“O, gujsuenq dwg Nungzgoh ngoenzneix daeuj yawj gou le, youh naeuz de nyi bw. Ranz de, caensaed, rox gyo’mbaiq, lij daegbied guhhek dem.” Lauxcinz haenh naeuz.

Swjgyah samcib lai bi, caeuq dahlwg Lauxcinz nienzgeij ca mbouj geijlai. Doeg sat dayoz le, daengz ndaw singz bae cauhnieb guh gij seng’eiq gencaiz, seizneix dang laux- banj le. De ciengzseiz dauqma yawj bohmeh beixnuengx, saekseiz hix cawx haujlai doxgaiq daeuj ranz Lauxcinz gangjgoj.

“Siengj de cibgeij bi seiz, gaenj aeu guh soujsuz, ra raeuz…… Seizneix, youh gvaqbae ngeihcib bi lai lo.” Yah de doenghsim danqheiq naeuz.

“Dwg ha, lwg neix caen baengh doegsaw guh daihsaeh. Gvaq baenz- nanz lij gvaqniemh raeuz, nanz ndaej lai lo.” Lauxcinz caemh yaengyaeng ngaekgyaeuj.

Caet

Mwhhaenx dwg ngeihcib geij bi gaxgonq, ngoenz seizdoeng nitsizsiz ndeu. Youq ndaw ranzmbanj Bouxcuengh neix, fwnmoenq laebdaeb doek liux cibgeij ngoenz cungj mbouj rongh.

Haemhhaenx, Nungzgoh baih- gwnz bax geu buhfwn ndaem mbang- mbetmbet, laj daenj gouh haizraemx ndaem laeuh raemx ndeu, din sang din daemq caij raemxboengz bae ranzcoj Lauxcinz. Baedauq miz cib lai goeng- leix gyae, neix dwg de byaij aen mbanj daihsam lo.

Youq gwnz roen, gij vah canghyw itcig yiengj henz rwz de:“Dahlwg mwngz dwg lanzveijyenz, gaenq fat nong, gig youqgaenj, aeu vaiqdi gyau haj bak maenz ngaenz guh soujsuz cij ndaej……”

Mwh de roq dou Lauxcinz seiz, dwg yah de hai dou, Lauxcinz bae baihrog banhsaeh lij caengz dauqma. Nungzgoh byaij bae byaij dauq, simgaenj lumj feiz coemh.

“Nungzgoh, mwngz ra Lauxcinz miz maz saeh? Naeuz gou nyi, gou hix guh ndaej cawj.” Yah Lauxcinz naeuz.

Nungzgoh naeuz siengj ciq haj bak maenz ngaenz bae hawj dahlwg yw bingh, aeu sikhaek guh soujsuz cij ndaej.

“Gou seizneix ngamq miz sam bak maenz ngaenz, gou ciq hawj mwngz sam bak maenz, camhseiz dawz bae gouqgip, gizyawz raeuz caiq siengj banhfap.” Yah Lauxcinz naeuz.

“Gyo’mbaiq, gyo’mbaiq meh- simj lo. Gou ngoenzneix byaij le sam aen mbanj, cungj ciq mbouj ndaej saek maenz ngaenz, seizneix ndei lai lo, dahlwg miz cienz gouq mingh lo…… Ai, gou sikhaek bae gyau sam bak maenz neix, gouz canghyw guh soujsuz gonq. Lwgnyez gaenq in baenzngoenz lo……” Nungzgoh doq gyo’mbaiq, nyaenx mbouj ndaej doq lae raemxda. Gangj sat couh ganjgip coh baihrog buet bae.

“Nungzgoh, mwngz caj gou aeu liengj, gou buenx mwngz bae. Gou miz boux caencik ndeu youq yihyen, gou bae ra de mbat ndeu, yawj de bang ndaej lwi.” De rox miz vunzsug ndei banhsaeh. Dingjlingz buenq loh youh bungz daengz Lauxcinz, gyoengqde couh caez bae lo.

Daengz yihyen le, yah Lauxcinz caen gouz ndaej canghyw hawj dahlan Nungz Swjgyah guh soujsuz gonq, gij ngaenz gizyawz gvaqlaeng caiq siengj banhfap.

Soujsuz gaxgonq, dah husw duet buhvaq Nungz Swjgyah liux, gvet cawz gij bwnndang henzgyawj dungx gvaz bae, youh goemj mbaw baengzyw hwnj gwnz ndang de bae, cij loh ok giz aeu guh soujsuz. Dwk ywmaz roengz buenq ndang baihlaj le, canghyw couh hainduj guh soujsuz lo……

Seizhaenx, Nungz Swjgyah boux vunz cungj singjsag. Gij dungx in caeuq najmong cungj geujnaux de.

“Couhdwg gizneix, hai roengz- bae……” Lwgda Nungz Swjgyah daj gij daeng gwnz denhvahbanj dingj gyaeuj ronghsagsag haenx yawjraen fwngz canghyw dawz soujsuzdauh hainduj roengzfwngz, de sikhaek haepda. Sawqmwh, de roxnyinh dangqnaj miz bang fangzrwix rig heuj rig faenz coemj coh de…… De buenq ndang baihlaj daj ywmaz liux, doengh mbouj ndaej saekdi, cij rox simdaeuz diuqbubbub lumj roq gyong nei.

Guh soujsuz sat le, aeu louz youq yihyen dwk diuqcim aen singhgiz ndeu. Aenvih meh Swjgyah aeu baema cij daegnuengx iq, youh aeu bae dajleix daxbuz gyad youq gwnz congz moix ngoenz youh aeu cuengq vaiz hwnj ndoi dem…… Caen mbouj miz banhfap ciuqgoq Swjgyah. Ndigah, dwg daxboh youq yihyen dajleix de.

Lauxcinz gvanbaz raen yiengh- neix couh ngoenzngoenz roengzban le soengq ngaiz gvaqdaeuj dingjlawh, hawj daxboh Swjgyah gwn ngaiz le, yietnaiq yaep ndeu.

Simjcinz vanzlij rex de byaij- byaij、bae diengzhaex dem. Mboengq- haenx nitsizsiz, de raen Swjgyah geij ngoenz cungj daenj dauq buh hag- dangz heuoiq mbangmbiemj, dwk diuqcim seiz, gij raemxyw gaet lae haeuj ndang bae seiz, Swjgyah saenzdiegdieg, de sim’in dangqmaz.

Aenvih Swjgyah yingzyangj mbouj ndei, yienznaeuz gaenq ndaej cibseiq bi, hoeng aen ndang caeuq Dahlanz de ca mbouj geijlai. Ndigah, Simjcinz ma ranz le, de couh gangjfug Dahlanz, soengq geij geu buhboemz hawj Swjgyah. Gij buh neix, Swjgyah cungj muengh haujlai nanz, bohmeh cungj mbouj cawx ndaej hawj de……

Swjgyah roxnyinh Aucinz gvan- baz guh gij saeh neix, lumj ndit raeuj mbouj dingz mbouj duenh raeuj aen ndang bonjfaenh, engq hawj de roxnyinh aen mbwn nit seizdoeng neix raeujrubrub.

Bet

Mboengqneix nyaengq lai, Swj- gyah nanz mbouj raen Aucinz caeuq mehsimj lo, hoeng moix baez raennaj, gyoengqde cungj gangjgoj mbouj dingz, lumj ranz vunz ndeu nei. Baezneix daeuj yihyen yawj Aucinz hix doxdoengz.

Swjgyah liujgaij liux gij bingh Aucinz, couh nai de ciengx ndei ndangdaej. Vihliux mbouj hawj Aucinz simcingz bienq naekcaem, de couh cam gij cingzgvang song lwg gyoengqde. De cij rox ranz Aucinz bungz daengz baenzlai saeh.

Aiq gangj buenq aen cungdaeuz le, vih hawj Aucinz yietnaiq, de cuengq song cien maenz ngaenz haeuj laj mon（swiz） Aucinz bae, naeuz mehsimj gvaqlaeng cawx di doxgaiq hawj de gwn bouj le, couh vaiqdi baema lo. De rox gvanbaz neix ceiq guhhek, mbouj yienghneix guh, gyoengqde haengjdingh mbouj nyienh.

Gyanghwnz, rog cueng laep- cupcup, aen singz iq laj dinbya neix caemrwgrwg. Swjgyah youq gwnz congz foekfan baenzhaemh ninz mbouj ndaek.

Aenvih geij bi gonq deng binghraq, gunghswh mbouj miz souhaeuj lai. Song mbiengj bohmeh aeu ciuqgoq, lwgnyez hix yaek hwnj gauhcungh…… Ai, vunz daengz cungnienz, fanh saeh yousim……

Lauxcinz okyen ngoenzhaenx, mbwn ndei ndit rongh, cienzyw gaenq miz vunz bang gyau caez; Dahlanz sousib hingzlij naeuz aeu bae gungh- swh Swjgyah hwnjban, caj onjdingh roengzdaeuj le, lij daiq lwgnyez okbae ndaw singz doegsaw dem; Daeggyangz gaenq boiz liux geijcib fanh maenz ngaenz, hix ciep ndaej lwgyah dauqma lo; mbouj geij nanz, ranz gaeuq ranz geq Lauxcinz couh yaek haihong hwnq ranzmoq……

（2 sat）